Kalaallit suliffeqarfissuaataat aatsaat taama angusarissaartigisoq

Nunatsinni namminersortut suliffeqarfiutaasa annersaat, suliffeqarferujussuaq Polar Seafood Greenland A/S, aningaasanik qaloorpoq. Naatsorsuutini kingullerni iluanaarutit annertoorujussuupput.

Suliffeqarfissuaq 2025-mi aatsaat taama sinneqartooruteqartigaaq, akileraarutinummi akiligassat akilereerneranni 241 million koruuninik sinneqartoorpoq, 2924-mi 99 million koruuniusimallutik.

Polar Seafood Greenland Nuummi qullersaqarfeqartoq siorna 1,7 milliard koruuninik kaaviiaartitsivoq, 2024-mi kaaviiaartitat 1,6 milliard koruuniusimallutik.

Ingerlatsinermi sinneqartoorutit 236 million koruuninik qaffapput, ukiup siuliani 95 million koruuniusimallutik.

Angusat suliffeqarfissuup pingaarnertut tunisassiaasa qaffasissumik akeqarnerannik, aalisakkanik tunisassianik issittumeersunik piumanninnerup annertuneranik aalisartunillu, suliffissuarmi sulisunit allaffeqarfimmiunillu pissusissamik malinnilluarnikkut piviusunngortinneqarput. Taama ingerlatseqatigiiffik tusagassiuutinut nalunaarummini allappoq.

2025-mi qalerallit, avaleraasartuut saarullillu akii niuerfinni Polar Seafoodip nukittuumik ingerlatsiffigisaani immikkut qaffasipput.

Nammineq aningaasaatit 1,6 milliard koruunit

Nunarsuarmi eqqissiviilliortoqaraluartoq aalisakkanik tunisassianik issittumeersunik piumanninneq annertuvoq, tamannalu aalaakkaasumik kaaviiaartitaqarnermik malitseqarpoq. Tamatuma saniatigut avaleraasartoorniarnermi angusaqarluartoqarpoq, tamannalu ukiumi ingerlatsinermi angusanut annertuumik ilapittuivoq.

1,6 milliard koruuningajannik nammineq aningaasaateqarnermigut Polar Seafood Greenland nalinginnaanngitsumik aningaasaateqarnikkut nukittoorujussuuvoq.

- 2025-mi angusagut tulluusimaarutigaagut, maniguuppugulli aamma. Angusat ilaat annertuut nunarsuarmi niuerfinni akit pitsaanerisa aalisarnerullu naammaginartumik ingerlanneqarnerata kinguneraat.

- Kisimiilluta angusarinngilarput. Aalisartut 2025-mi akinik qaffasissunik akilerneqartarnerat immikkut nuannaarutissaavoq. Taakkunanimi nalitusiartortitsineq aallartittarpoq, pisortaaneq Bent Salling oqarpoq.

Kilisaat tunigaat

Aalisartitseqatigiiffissuup 2025-ip ingerlanerani pisortat oqarnerattut, kilisaatip Polar Nataarnap tunineqarneratigut suliffeqarfissuup kilisaataataanik nalimmassaapput.

Tunisineq pisassatut pigisat, raajanut TAC-t, appariartornerisa kiisalu aalisarnermut inatsimmut nutaamut nalimmassaarnerup toqqaannartumik kinguneraat, alloriarnerulu tamanna suliffeqarfissuup siunissami pisassanik periarfissaanut pisassiissutinilu piumasaqaatinut naammassinnissinnaassusiatigut naleqqussarnissaanut qulakkeerinninniarneruvoq, ingerlatseqatigiiffik allappoq.

Ukioq manna unammilligassat

2026-p raajanut atatillugu unammillernartuunissaa Polar Seafood Greenlandip ilimagaa, suliffeqarfissuarlu pisassanut appasinnernut suliffeqarfimmini piareersarpoq.

Polar Seafood Greenland 2025-mi 2026-llu aallartinnerani Aasianni suliffissuarmut tunisassiassanut apeqqut pillugu politikikkut aaqqiissuteqartoqarnissaanik neriuuteqarnini attappaa.

Pitsaasumik aaqqiineq piffimi suliffiit, illoqarfiup namminersortuini pingaarutillit, attanneqarnissaanut pingaaruteqarluinnarpoq. Suliffeqarfissuaq Naalakkersuisunik piffinnilu soqutigisaqartunik aaqqissut attanneqarsinnaasoq pillugu siunnerfigissaartumik suleqateqarnissamut piareersimavoq, suliffeqarfissuaq allappoq.

- 2026 nukittuumik inissisimalluta patajaatsumillu suliffeqarfeqarluta, aammali raajanut atatillugu aaqqissussaanikkut unammilligassaqarnerput tappiffigalugu aallarnerparput. Polar Nataarnamik tunisineq alloriarneruvoq pisariaqartoq, ataatsimoorlutalu Naalakkersuisut piffinnilu soqutigisaqartut peqatigalugit Aasiannut politikikkut aallaavilimmik, suliffissuarmi sulisunut – illoqarfimmullumi aamma iluaqutaasumik aaqqiissummik nassaarnissarput neriuutigaarput, pisortaaneq Miki Brøns oqarpoq.

Ukiumut inuiaqatigiinnut 1,3 milliard koruuninik ilapittuuteqartartut

Polar Seafood Greenland aalisakkut akitsuutitigut, aalisartunut avataaneersunut akiliisarnikkut akileraarutinullu akiliisarnikkut kalaallit aningaasaqarnerannut annertoorujussuarmik ilapittuuteqartarpoq.

2025-mi inuiaqatigiinnut ilapittuutit katillugit 1,3 milliard koruuniupput. Taakku aalisarnermut akitsuutinut 138 million koruuninik, sulisunut akissarsianut 525 million koruuninik, aalisartunut avataaneersunut 447 million koruuninik 220 million koruuninillu akileraarutinut akiliutinut agguarsimapput.

Aalisariutip naalagai maskinmesterillu ilinniakkaminnik naammassinnittut

Polar Seafood Greenlandip ilinniartoqarnikkut aaqqissuussinera ukioq manna ukiunik qulinngortorsiorpoq. Ilinniartoqarnikkut aaqqissuussinermi inuusuttut sulisullu assersuutigalugu aalisariutini naalakkatut maskinmesteritullu ilinniartinneqartarput.

2025-mi aqumiut tallimat ilinniartoqarnikkut aaqqissuussinikkut soraarummeerput. Taakkunannga sisamat maanna Polar Seafoodip kilisaataataanni aalajangersimasumik atorfeqarput. Taamattaarlu ilinniartut nutaat tallimat tiguneqarput, piffissallu naatsorsuusiorfiusup naanerani suliffeqarfissuarmi aqumiunngorniat arfineq marluk ilinniarnerminnik ingerlatsipput.

Polar Seafood Greenlandip Upernavimmi, Uummannami Oqaatsunilu ingerlatseqateqarluni ingerlatsinera 2025-mi annertuumik siuariarfiuvoq.

Tunitsiviit 2024-mi ataatsimut amigartoorfiusinnarlutik 2025-mi 19 million koruuningajannik ataatsimut sinneqartoorput.

Miki Brøns: - Tulluusimaarpugut

- Polar Seafood Greenlandip illoqarfinni nunaqarfinnilu aningaasaqarnikkut toqqissisimanermik ingerlatsinermillu ilapittuinera tulluusimaarutigaarput. Aningaasat taakku ilaatigut nerisassanut, ineqarnermut akiliutinut, meeqqerivinnut, atuarfinnut, utoqqarnik isumattuinernut peqqissaavinnullu atorneqarsinnaapput, pisortaaneq Miki Brøns oqarpoq.

- Ukiut tamaviisa inuaqatigiinnut ilapittuutigut 1 milliard koruuninit annertunerusarput. Uagut sulisorpassuagullu pikkorissut suliffeqarfimmik pikkoriffeqarluta pisariitsumillu ingerlatsigatta taakkuu pilersinneqartarput.

- Tamanna nangikkusupparput, Polar Seafood Denmarkimillu tamakkiisumik piginnittuulernitta tamanna aamma takuippaa, Bent Salling oqarpoq.