Kilisaatit atorlugit kangerlunni saarullinniarneq ammaqqinneqarsinnaasoq

Kangerlunni tunngaviusumik killeqarfimmiit avammut 3 sømili tikillugu kilisaatit atorlugit qalorsuarsorluni saarullinniarneq, sinerissap qanittuani aalisartunit sakkortuumik isornartorsiuereersullu, taamatut aalisarneq 15. september matuneqarpoq.

Taamaalilluni aalisarnerup teknikkikkut iluarsartuussivigineqarnera pillugu Namminersorlutik Oqartussat nalunaarutaat nutaaq ulloq taanna atuutilerpoq. Kisiannili nalunaarut pineqartoq naapertorlugu, qinnuteqartoqarneratigut kangerluit ilaanni qalorsuit atorlugit saarullinniarneq ammaqqinneqarsinnaasoq, Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg, Demokraatit, Inatsisartunut ilaasortap Bentiaraq Ottosenip, Atassut, pineqartoq pillugu paragraf 37 naapertorlugu apeqqutaanut akissuteqarluni ilaatigut taama allappoq. 

Kilisaatit atorlugit sinerissap qanittuani saarullinniarneq pitsaasuunngitsoq, Kalaallit Nunaanni Aalisartut Piniartullu Kattuffiat, KNAPK, isumaqarpoq.

Akerlianilli taamatut aalisarnerup matuneqarnera, kilisaataatilinnut aningaasatigut annertuumik kingunerlussasoq, Qalerualinniat Aalisagarniallu Kattuffianiit, QAK-miit oqaatigineqarpoq.

Uggornartoq

Aalisarnerup teknikkikkut iluarsartuussiffigineqarnera pillugu nalunaarut nutaaq naapertorlugu, sinerissamiit avammut 3 sømilit iluani ungusiniutit imaluunniit qalorsuit atorlugit saarullinniarnerit tamarmik inerteqqutaalerput. Kisiannili qinnuteqartoqarneratigut sumiiffinni aalajangersimaqqissaartuni, aalisariutit 120 bruttotonsimiit imaluunniit 24 meteriniit mikinerusut, killilimmik qalorsuit atorlugit saarullinniarsinnaanerat ammaqqinneqarsinnaasoq, Peter Borg paasissutissiivoq.

Sinerissap qanittuani kilisaatit atorlugit qalorsuarsorluni saarullinniarnerup matuneqarneranut atatillugu, Aalisarnermut Naalakkersuisoq Peter Borg KNAPK-lu ataatsimeeqatigiissimasut, KNAPK-p siulittaasua Pele Blytmann oqarpoq. 

- Taamatut aalisarneq KNAPK-miit akerleraarput. Kisianni qinnuteqartoqarneratigut inerteqquteqarneq atorunnaarsinneqassappat, aalisartut kattuffii ilanngullugit tusarniaaffigineqassasut, nalunaarummi aamma allaqqavoq. Tamannalu eqqissiallannarpoq.

- Kisianni matusinerup atorunnaarsinneqarsinnaanera soorunami uggornarpoq. Inerteqquteqarnerlu atorunnaarsinneqassappat, kangerluit tamaasa ammaanneqaratik, kisiannili sumiiffiit ilaanni karsikkaartumik qalorsuarsorluni aalisarnerup ammaqqinneqarnissaa kattuffimmiit kissaatigaarput, taanna oqarpoq.

Sinerissap qanittuani qalorsuit atorlugit kangerlunni saarullinniarneq pissutaalluni, bundgarnersortut arlallit aalisarfitik qimaannartariaqartarsimagaat, Pele Blytmann erseqqissaavoq.

Qinnuteqarpata ikiorneqassasut

Peter Borgip siornatigut paasissutissiinera naapertorlugu, kilisaatit atorlugit sinerissap qanittuani saarullinniarnissamut periarfissaq, aalisariutinit pingasunit atorneqarsimavoq. Taakkulu tamarmik QAK-mut ilaasortaasut, kattuffiup siulittaasua Hendrik Sandgreen oqarpoq.

- Kilisaatit atorlugit 3 sømilip iluani qalorsuarsorluni saarullinniarnerup atuutilersinneqarnissaa aallaqqaataaniilli uagut anguniagaraarput.

- Aalisariutit taakku pingasut, saarulliit kangerlunni pisarisimasaat, taamaallaat 1.000 tonsit missaanniipput. Taakkulu umiatsiaararsortut bundgarnersortullu tulaattagaannut naleqqiullugit ikinnerujussuupput.

- Taamaattumik kilisaatit atorlugit sinerissap qanittuani saarullinniarnerup ajornartorsiutitut isigineqarnera paasiuminaatsipparput, taanna oqarpoq.

Raajartassiissutit ikilisinneqarnerisa kingunerisaanik, kilisaateeqqat arlaqartut saarullinniutissatut allanngortiterneqarsimasut, QAK-ip siulittaasua oqarpoq.

- Taakku sinerissap qanittuani saarullinniarsinnaanngippata, tamanna kilisaataatilinnut aningaasatigut annertuumik annaasaqataassaaq, Hendrik Sandgreen oqarpoq. 

15. september aallarnerfigalugu kilisaatit sinerissap qanittuani saarullinniarsinnaajunnaartut, kangerlunni saarullinniaqqilerumallutik qinnuteqassappata, taakku QAK-miit ikiorneqarumaartut, QAK-p siulittaasuata oqaatigaa.