KNAPK-p aningaasaqarnera ilungersunartumiittoq: Immikkoortortaqarfiit sakkortuumik kinguneqartitserusupput

Kalaallit Nunaanni Aalisartut Piniartullu Kattuffiat, KNAPK, ukiuni kingullerni sisamani annertuumik amigartooruteqarpoq, ukiorlu manna amigartooruteqarnissaq aamma naatsorsuutigineqarpoq.

Kattuffiup taamatut inissisimanera attanneqarsinnaanngitsoq, kattuffillu siumut saateqqinniarlugu siulersuisuunerit nutaat annertuumik suliassaqartut immikkoortortaqarfiit isumaqarput.

Aammali KNAPK-p maannakkut ilungersunartumik inissisimanera pisortaanermut Vittus Qujaukitsumut kinguneqartinneqartariaqartoq immikkoortortaqarfiit arlallit isumaqarput.

Sipaarniartoqassasoq

KNAPK-mi siulittaanngorlaap Pele Blytmannip kattuffiup aningaasaqarnera qanittumi aatsaat tamakkiisumik paasisaqarfigisimallugu oqaatigaa.

- KNAPK-p oktoberimi ataatsimeersuarnerani naatsorsuutit ilungersunartumik inissisimasut tamakkiisumik aatsaat paasivarput, kisianni taakku uniffiginagit ingerlaqqissaagut, taanna oqarpoq.

Sipaarniartoqarnissaalu avaqqunneqarsinnaanngitsoq, piffissamilu aggersumi immikkoortortaqarfiit qaninnerusumik suleqatigineqarnissaat anguniarneqassasoq, taanna erseqqissaavoq.

- Maannakkumut qaammat ataaseq sinnilaaginnarlugu siulittaasuuvunga, taamaammat ukiut siuliini naatsorsuutit pillugit annerusumik uanga oqaaseqarsinnaanngilanga, kisianni allaffissornikkut nunanullu allanut angalanerit annertuumik sipaarniarniarfigisariaqassavagut.

- KNAPK-mi siulittaasunngornissama tungaanut Ilulissani aalisartut piniartullu peqatigiiffianni siulittaasuunikuuvunga, piffissamilu tassani kattuffik matoqqavallaartumik ingerlanneqarsimasoq isumaqarpunga, taamaammat maannakkut ammanerusumik ingerlatsisoqarnissaa qularutigineqassanngilaq, Pele Blytmann oqarpoq.

KNAPK-p ukiuni kingullerni aningaasatigut ilungersunartutut inissisimanera pisortaanermut Vittus Qujaukitsumut kinguneqartinneqassanersoq taassuma maannakkut oqaaseqarfigerusunngilaa.

Ilungersunartoq

Nanortalimmi aalisartut piniartullu peqatigiiffianni siulittaasoq Thor Eugenius KNAPK-p Ilulissani ataatsimeersuarnerani peqataavoq, tassanilu kattuffiup aningaasaqarnera pillugu paasissutissat tamakkiisut aatsaat paasisaqarfigalugit taassuma oqaatigaa.

- KNAPK-mi siulersuisuunerit kingulliit Kujataanut angalanngisaannarput, immikkoortortaqarfiillu kattuffiup aningaasaqarnera pillugu paasitinneqarneq ajorput. Taamaammat ataatsimeersuarnermi naatsorsuutit pillugit saqqummiussat soorunami tupaallaatigaakka.

- Kattuffiup aningaasatigut inissisimanera ilungersunartutut nalilerneqartariaqarpoq, taamaakkaluartoq ataatsimeersuareernerup kinguninngua atorfilittat siulittaasuusimasorlu Europap avannaani aalisarneq pillugu nittarsaassinerit annersaannut Aalborgimi ingerlanneqartumut angalapput, tamannalu akuersaarneqarsinnaanngilaq, taanna oqarpoq.

KNAPK-mi allaffissornikkut aqutsisut pillugit nalilersuisoqarnissaa pisariaqartoq taanna isumaqarpoq.

Atorfilittat pinnguartarfiat

Nikkulaat Jeremiassen siuttoralugu KNAPK-p ukiuni kingullerni sisamani aqunneqarnera, kiisalu sulisunut aningaasartuutit qaffasippallaanerat akuersaarneqarsinnaanngitsoq, kattuffiup Sisimiuni immikkoortortaqarfiani siulittaasoq Ulloriaq Olsen isumaqarpoq.

- KNAPK-mi atorfilittat ukiut ingerlanerini soraarsinneqaraangata tamanna aningaasarpassuarnik naleqartarsimavoq, taassumalu saniatigut maannakkut atorfilittanut aningaasartuutit qaffasissorujussuusut ilisimavarput, taamaammat kattuffik atorfilittat pinnguartarfiattut taaneqarsinnaavoq.

- Pissutsit ilungersunartut aaqqiiviginiarlugit nerrivik tillunneqartarsimanngilarluunniit, maannakkullu aaqqiisoqarnissaa siunertaralugu aningaasartuutit appartinneqartariaqarput. KNAPK-p aqunneqarneranut Vittus Qujaukitsoq pisortatut akisussaasuuvoq, kattuffiullu taamatut inissisimanera pisortamut kinguneqartinneqartariaqarpoq, taanna isumaqarpoq.

KNAPK-p siunissami qanoq ilusilimmik aqunneqarnissaa pillugu Pele Blytmannip avammut nalunaaruteqarnissaa maqaasigini Ulloriaq Olsen erseqqissaavoq.

Kattuffiup siunissaa nalorninartoq

Uummannani aalisartut piniartullu peqatigiiffianni siulittaasoq Malik Johansen KNAPK-p ataatsimeersuarnerani kingullermi peqataavoq, kattuffiulli aningaasaqarnera pillugu paasissutissat tunniunneqartut killeqarpallaarsimasut taanna isumaqarpoq.

- Kattuffiup aningaasaqarnera pillugu paasitinneqarneq ajorpugut, kisianni KNAPK-p aningaasaqarnera ukiuni kingullerni ammuinnaq ingerlasimasoq maannakkut paasinarsivoq, tamannalu assut kipiluttunarpoq.

- Raajarniat KNAPK-miit aninikuupput, maannakkullu ilaasortat qaleralinniit saarullinniillu isertitaanniit kattuffik annerusumik aningaasalersorneqarpoq, taamaammat kattuffiup aningaasaqarnerata siumut saateqqinneqarsinnaanera qularnarpoq, taanna oqarpoq.

KNAPK-mi ilaasortat pisaminnik tunisigaangamik 1,5 procentimik kattuffimmut akiliisarput, aningaasallu taakku ilai ukiullu naajortornerani immikkoortortaqarfinnut utertinneqartarput. Taamaakkaluartoq kattuffiup Uummannami immikkoortortaqarfia suli aningaasanik pissarsimasisimanngitsoq Malik Johansen oqarpoq. Siorna 150.000 koruunit missaat Uummannami aalisartut piniartullu peqatigiiffiannut utertinneqarput.

- Aningaasanik siornatigut novemberip 15-iat sioqqullugu konto-tsinnut ikisoqartuaannarpoq, kisianni ulloq manna tikillugu suli ikisoqanngilaq, aningaasallu taakku peqatigiiffiup ingerlanneqarneranut pinngitsoorneqarsinnaanngillat.

- Kattuffiup aqunneqarnera ilungersunartumik inissisimavoq, taamaammat kattuffiup siunissaa nalorninartutut taaneqarsinnaavoq, taanna oqarpoq.

KNAPK-mi Vittus Qujaukitsoq siuttoralugu allaffissornikkut aqutsineq toqqissisimananngitsoq, taamaammallu pisortamut kinguneqartitsisoqartitsinissaq avaqqunneqarsinnaanngitsoq, Malik Johansen isumaqarpoq.

Nalilersuinissaq pisariaqartoq

KNAPK-mi ilaasortat tunisinermi procenteerutaasa ukioq manna ilaannakortumik tunniunneqarnissaat akuersaarneqarsinnaanngitsoq, tamannalu kattuffiup ajorluinnartumik aqunneqarneranik ersersitsisoq, ukiorpassuarni Kullorsuarmi aalisartut piniartullu peqatigiiffianni siulittaasuusoq Timotheus Petersen oqarpoq.

- KNAPK-p amigartoorutai ilaasortanit akilersorneqassappata tamanna akuersaarneqarsinnaanngilaq. Immikkoortortoqarfimmullu iluaqutaanngitsumik KNAPK-mut akiliisassagutta, kattuffimmut tassunga ilaasortaaginnassanerluta nalilersortariaqalissavarput. Allanik marlunnik kattuffeqarpoq (Sinerissap Qanittuani Aalisartut Piniartullu Kattuffiat, SQAPK aamma Qalerualualinniat Aalisagarniallu Kattuffiat, QAK, aaqq.) allatullu ajornassappat taakununnga ilaasortanngornissaq nalilersugassanut ilaasinnaavoq, taanna oqarpoq.

KNAPK-ip ukiuni kingullerni sisamani aqunneqarnera qulaajaaffigineqartariaqartoq, kiisalu kattuffik taamak annertutigisumik amigartooruteqartarpat pisortaaneq atorfeqartinneqaannassanersoq apeqquserneqartariaqartoq, Timotheus Petersen isumaqarpoq.