KNAPK sakkortuumk assoralisimaartoq

Kalaallit Nunaanni Aalisartut Piniartullu Kattuffia, KNAPK, piffissami kingullermi annertuumik assoralisimaartoq aalisarnermik suliaqartuniit arlalinniit sakkortuumik isornartorsiorneqarpoq. Pele Blytmann siuttoralugu kattuffimi siulersuisuunerit nutaat misilittagakippallaartut suliassarlu kivissinnaanngikkaat Qalerualinniat Aalisagarniallu Kattuffianni, QAK-mi, siulittaasoq Henrik Sandgreen sakkortuumik isornartorsiuilluni oqarpoq.

Misilittagakippallaartut

KNAPK-p qanoq ingerlanissaa pillugu aalisarnermik suliallit piffissami sivisuumi ilisimatinneqarsimanngitsut tamannalu pissusissamisuunngitsoq Henrik Sandgreen isumaqarpoq.

- KNAPK-p ataatsimeersuareernerata kingorna siulersuisuunerit nutaat ingerlaannaq sulilissasut isumaqarsimagaluarpugut, kisiannili taamak pisoqanngilaq, tamannalu pitsaanngitsumik aqutsisoqarneranut ersersitsivoq.

- KNAPK-p maannakkut aqunneqarnera kattuffilerineq pillugu misilittagakippallaarnermik ersersitsivoq. Siulersuisuunerit suliassaq kivissinnaanngilaat annertuumillu ikiorneqartariaqarlutik, taamaammat siulersuisuunernik kattuffilerinermik ilisimasaqarnerusunik taarsiinissaq avaqqunneqarsinnaanngilaq, Henrik Sandgreen oqarpoq.

KNAPK-p maannakkut aqunneqarnera nunatsinni kattuffiit isigineqarnerannut annertoorujussuarmik innarliisoq, taanna aamma isumaqarpoq.

Paasiuminaatsoq

Piffissami kingullermi KNAPK-p pisortaata Vittus Qujaukitsup soraarsinneqarnera QAK-p siulittaasuata paasisinnaanngilluinnarpaa.

- KNAPK-p ingerlanneqarnera ulluinnarni aqutsisut aamma siulersuisuunerit akisussaaffigaat, taamaattumik KNAPK-p taamatut inissisimalersimaneranut Vittus Qujaukitsoq akisussaatinneqarani Nikkulaat Jeremiassen siuttoralugu siulersuisuunerit siulliit akisussaatinneqartussaagaluarput.

- Pisortap soraarsinneqarnera immikkoortortaqarfiit taamatut kissaateqarnerannik aallaaveqartoq KNAPK-p siulittaasua Pele Blytmann oqarpoq, tamannalu paasiuminaappoq. KNAPK-p immikkoortortaqarfiisa qanoq kissaateqarnerat malillugu siulersuisuunerit aalajangiisassappat imaluunniit siulersuisuunerit namminneq aalajangiisinnaassuseqarpat? Henrik Sandgreen aperivoq.

Kattussuunneq pisariaqartoq

Kalaallit Nunaanni aalisartut piniartullu pitsaanerpaamik sullinneqassappata kattuffinnullu tatiginninneq pilerseqqinneqassappat, aalisarnermut piniarnermullu kattuffiit pingasuusut, tassa KNAPK, SQAPK aamma QAK, ataatsimut kattutsinneqarsinnaanerat periarfissanut ilaasinnaasoq, Henrik Sandgreen isumaqarpoq.

- Nunatsinni aalisartut piniartullu pitsaanerpaamik sullinneqassappata aaqqissuussaanermik nutaamik nassaartoqartariaqarpoq. Imaassinnaavoq kattuffiit maanna pioreersut pingasut kattussuutsinneqarnerisigut kattuffik ataasiinnanngortinneqarsinnaasoq imaluunniit kattuffiit taakku ataatsimut suleqatigiiffigisinnaasaannik pilersitsisoqarsinnaasoq.

- Ataaserli qularnaappoq tassa aalisartut piniartullu ataatsimut katersuuffeqarnissaat maannakkut annertuumik amigaataavoq, taanna oqarpoq.

Partiit assigiinngitsut aallartitaasa ukiuni kingullerni aalisartut piniartullu kattuffiisa siulersuisuunerinut ilanngussuunnerisa kingorna aalisartut avissaartuutsinneqalersimasut, tamannalu qimanneqartariaqartoq, ukiuni arfineq pingasuni KNAPK-mi siulittaasuusimasoq isumaqarpoq.

KNAPK-p ukiarmi ataatsimeersuarnera tikillugu siulittaasuusimasoq Nikkulaat Jeremiassen pisut pillugit oqaaseqarumanngilaq.

Toqqissisimananngitsoq

KNAPK-p maannakkut inissisimanera toqqissimananngitsoq KNAPK-p Sisimiuni immikkoortortaqarfiani siulittaasoq, Ulloriaq Olsen, isumaqarpoq.

- Siunissami KNAPK-mi ilaasortaaginnassanerluta nalilersuisariaqartugut uanga inuttut nammineq isumaqarpunga, taanna oqarpoq.

KNAPK-p aningaasaqarnera ilungersunartoq aaqqiiviginiarlugu siulersuisuunerit piaartumik iliuuseqartariaqartut, Ulloriaq Olsen aamma isumaqarpoq.

- Pissutsit ilungersunartut aaqqiiviginiarlugit nerrivik tillunneqartarsimanngilarluunniit, maannakkullu aaqqiisoqarnissaa siunertaralugu aningaasartuutit appartinneqartariaqarput. KNAPK-p aningaasatigut aqunneqarneranut Vittus Qujaukitsoq pisortatut akisussaasuusimasoq, soraarsinneqarneralu inissaminiittoq, taanna aamma isumaqarpoq.

Ilaasortat kissaataat

Ukioq inatsisartunut qinersisoqarmat KNAPK-p siulittaasua Nikkulaat Jeremiassen, pisortaq Vittus Qujaukitsoq aamma siulersuisuunernut ilaasortaq maannakkullu siulersuisuunernut ilaasortanngoqqittoq Ole Jørgen Davidsen inatsisartunut qineqqusaarput, tamannalu KNAPK-p siulittaasortaavata taamanikkut sakkortuumik isornartorsiorpaa.

KNAPK politikeriusimasunik partiimullu aalajangersimasunut attuumassutilinnit siuttoqarnissaa pissusissamisuunngitsoq, KNAPK-p Ilulissani immikkoortortaqarfiani siulittaasuunermi nalaani Pele Blytmann ukioq isummersorpoq, tamannali peqqutigalugu Vittus Qujaukitsoq soraarsitaanersoq, taassuma oqaaseqarfigerusunngilaa.

- Kattuffimmut ilaasortat pisortap suliunnaarsinneqarnissaa kissaatigaat, taakkulu tusaanngitsuusaassagutsigit kattuffimmut qanoq kinguneqassanersoq nalunngereerparput. Ilaasortat taakkuupput kattuffimmut aningaasalersuisut, taakkulu annaassanngikkutsigit kissaataat malillugu iliuuseqartariaqarsimavugut, taanna oqarpoq.

Henrik Sandgreenip KNAPK-mi siulersuisuunerit pillugit isornartorsiuinera massakkut oqaaseqarfigisinnaanagu Pele Blytmann oqarpoq.

Alianartoq

KNAPK-p maannakkut inissisimanera alianartoq Inatsisartuni Aalisarnermut Piniarnermut Nunalerinermullu Ataatsimiititaliami siulittaasoq, Lars Poulsen, Siumut, oqarpoq.

- Kattuffiup maannakkut inissisimanera uggornarlunilu alianarpoq neriuppungalu pitsaasumik aallaqqikkumaartoq. Siulersuisuunerit nutaat tunuliaquttatik tusarnaarlugit ingerlariaqqinnissaat pisariaqartoq isumaqarpunga, taanna oqarpoq.

Aalisarnermik suliaqartut pitsaanerpaamik sullinneqarnissaat siunertaralugu aalisarnermik kattuffiit pingasuusut paaseqatigiiffiusumik oqaloqatigiinnissaat taassuma kaammattuutigaa.