Nukissiorfiit pisortaat: Aasianni pilersuineq qulakkeerniarlugu sapinngisarput tamaat iliuuseqarpugut
Aasianni innaallagissiorfik Nukissiorfinniit sapaatip-akunnerani matumani misissoqqissarneqassaaq. Innaallagissiorfiup marlunngormat ikuallareernerata kingorna misissuisoqartussanngorpoq.
Generatori sapaatip-akunnerani kingullermi marlunngornermi ikuallaleraluartoq sukkaannaq qaminneqarpoq.
Assi: Aannguaq Hansen
Aasianni innaallagissamik kallerup inneranik pilersuineq sapaatip-akunnerata siuliani marlunngornermi ajornartorsiorfioqqippoq. Innaallagissorfik ikuallammat illoqarfik tamakkerluni qamittoorpoq.
Nukissiorfiup eqqani ikuallattoqarujussuarneranit qaammat qaangiuttoq una pisoq pivoq. Nukissiorfiup atortorissaarutaanut nillusaatip imaanut aqqutaa tasani ikiuallappoq, taamaalillunilu illiqarfik aamma qanittoorluni.
Marlunngormat ualikkut nalunaaqutaq 15.30 innaallagissiorfimmi generatoriisa pingasut ilaat ataaseq kalerrisaarilersimasoq, Nukissiorfinni teknikkimut pisortaq Filip Sivertsen marlunngornermi ikuallattoq pillugu nassuiaavoq:
- Generatorip ataatsip saniani ikuallattoqalerpoq. Naluarput qanoq ililluni ikuallalersimanersoq, suli misissuiffigineqarpoq. Qatserisartut kinguninngua ornigupput, minutsillu qulit missaat qaangiuttut ingerlaannaq qaminneqarluni, Filip Sivertsen oqarpoq.
Misissuisussat marlunngornermi tikissasut
Nukissiorfiit sulisui innaallagissiorfimmut suli isersinnaanngikkallartut aamma oqatigaa. Pisariaqartitsisoqartillugu sarfalersuisut ikinneqartut illoqarfiup kangiatungaanut kitaatungaanullu pilersuillutik, aamma imermik.
Nalunaaqutaq 17.30 missaani generatorini pingasuni marluk ikinneqarput, illoqarfillu tamarmi innaallagiaqaqqilerluni.
Taamaattumik marlunngormat ikuallattoqarneranut suna pissutaanersoq suli paasineqanngimmat, Nukissiorfiit innaallagissiorfimmik misissuisitsiniartut pisortaq oqarpoq:
- Pilersuineq qulakkeerniarlugu Nukissiorfiit tungaannit sapinngisatsinnik iliuuseqarpugut. Qullersaqarfimmeersut marlunngorpat Aasiannut aallartissavavut, taakkualu atortorissaarutivut tamaasa misissussavaat. Innaallagissiorfiinnaanngitsoq aamma kiassarnermut imermillu pilersuisut arlaatigut aarlerinartoqarnersut misissuiffigissavaat.
- Aaqqinneqarsinnaasut aaqqinneqassapput, piffissartornarnerusumillu suliassamik peqassappat qanoq iliorneqassanersut pilersaarusiorneqassallutik, Filip Sivertsen oqarpoq.
Innaallagissap aqqutai tamarmik kissarpallaarnersut misissorneqassasut, tamanna ikuallattoqarsinnaaneranut aarlerinaateqartarmat aamma oqaatigaa:
- Aasianni misissueqqissaasssaagut. Tikittussallu allanik takunnissinnaagamik, aaqqissuussaasumik atortorissaaruterput tamarmi misissuiffigeqqissaassallugit, Filip Sivertsen oqarpoq.
Misissuineq unitsinneqartoq
Novembarip aallartinnerani ikuallattoqarnera politiit misissuinertik unitsikkaat, ajoraluartumillu qanoq ikuallalersimanera paasineqarsimanngitsoq, pisortaq Sermitsiamut oqarpoq.
- Kingullermik ikuallattoqarnerani imaaniit tarajulimmik nillusaatit ajoquserneqartut sulisutta sanasullu allat iluarsiivigaat.
- Aasianni innaallagissiorfiullu eqqaani ikuallannerit eqqaassanngikkaanni ikuallannerit taakku marluk imminnut attuumassuteqanngilluinnarput, Filip Sivertsen oqarpoq erseqqissarlugulu Nukissiorfiit illoqarfimmi pilersuinerup aalaakkaanissaa qulakkeerniarlugu nukippassuit atoraat:
- Aasiaat ukkataraarput, sapinngisatsinnillu pilersuineq aalajaatsoq qulakkeerniarlugu iliuuseqarpugut. Neriuppugut eqqissisimalluta juulli nallersinnaassagipput. Pisut taakku sulisutsinnut aamma artukkiipput.
