Kommune Qeqertalimmi allattoqarfimmi pisortaq nutaaq ingerlatsivinnilu aqutsisut nutaat

Saamu Kleemann Kommune Qeqertalimmi allattoqarfimmi aggustip aallaqqaataanit pisortanngorpoq. Taama kommuni nittartakkamini paasissutissiivoq.

Saamu Kleemann ilinniartitsisutut ilinniagaqarpoq, kommunillu nalunaarutigaa aqutsinermik taanna misilittagaqartoq.

- Saamu Aasiammiuuvoq Kommune Qeqertalimmilu siornatigut atorfeqareerluni. Ilinniartitsisutut ilinniagaqarpoq, aqutsinermilu misilittagartuujulluni. Saamup atorfinitsinneqarneranut pilluaqquarput suleqatiginissaalu qilanaaraarput, kommuni allappoq.

Aqutsisut allat pingasut atorfinitsinneqartut

Aasianni kommunip allaffeqarfiani pisortaq nutaaq kisimi atorfinitsinneqanngilaq.

Kommune Qeqertalimmi immikkoortortaqarfimmi pisortat pingasut nutaat aamma atorfinitsinneqarput.

Rebekka Jensen Inuit-ni pisortanngorpoq aggustip aallaqqaataani 2026-mi atorfimminit soraarniuteqarluni. Rebekka Jensen inuiaqatigiilerinermi kandidatitut ilinniarsimasuuvoq, isumaginninnermilu bacheloritut aamma ilinniagaqarluni. Tamatuma saniatigut peqqinnissaqarfimmi ikiortitut ilinniagaqarpoq, peqqinnissaqarfimmilu puigortunngorsimasut immikkoortortaqarfianni sulinermik misilittagaqarluni.

Timi Tarni-mut immikkoortortaqarfik aamma nutaamik pisortartaarpoq, tassa Nivikka Rosing, atorfimmut aggustip 15-ianni taanna inissippoq.

- Nivikka Rosing bacheloritut ilinniartitsisutut ilinniagaqarpoq. Kommune Qeqertalimmi ukiuni kingullerni arfinilinni atorfeqarsimavoq, tassanilu atuarfinnut paaqqinnittarfinnullu qitiusumik ingerlatsivimmi ataqatigiissaarisutut siusinnerusukkut sulilluni, kommuni allappoq.

Aamma Elise Olsen Inoqarfimmi septembarip aallaqqaataaniit pisortanngussaaq. Elise ingeniøritut issittumi sanaartornermik immikkut ilinniagaqarpoq.

Kommunimit ilisimatitsissutigineqarpoq taanna siornatigut Sisimiuni Permagreenimi sanaartornermut pisortaasimasoq, KNI-mi illuliornermi ingeniøriusoq, Qeqqata Kommuniani sanaartornermut pisortaasoq kiisalu Pituffimmi sakkutooqarfimmi konstruktionsingeniøriusoq.