14.000 kilometerit sinnerlugit ungasitsigigaluarluta Daniel Mamadousip qimmiata Melbournemi allaffimmini qannguerpaluttarnera Teamsikkut attaveqaatigiinnermi tusaaneqarsinnaavoq, apersorneqarneralu tamaat taamaalluni.
Sermitsiap Energy Transition Mineralsimi pisortaq apeqqutinik arlalinnik apeqqarissaarfigaa, ilaatigut Namminersorlutik Oqartussanik eqqartuussivimmut suliassanngortitsineq, taarsiissuteqarnissamik piumasaqaat Kuannersuarnilu suliniut pillugu.
14.000 kilometerit sinnerlugit ungasitsigigaluarluta Daniel Mamadousip qimmiata Melbournemi allaffimmini qannguerpaluttarnera Teamsikkut attaveqaatigiinnermi tusaaneqarsinnaavoq, apersorneqarneralu tamaat taamaalluni.
Sermitsiap Energy Transition Mineralsimi pisortaq apeqqutinik arlalinnik apeqqarissaarfigaa, ilaatigut Namminersorlutik Oqartussanik eqqartuussivimmut suliassanngortitsineq, taarsiissuteqarnissamik piumasaqaat Kuannersuarnilu suliniut pillugu.
Suliffeqarfiulli piiaanissamut akuersissummik pissarsiniarnerminni suliamik ingerlatitseqqiinissaq pisussaaffigisimallugu aalajangiusimavaa, aammali pilersaarutip allanngortinnissaanut piareersimallutik. Najukkami ernumassutigineqartunut, soorlu Narsami umiarsualivikkut tikinneqarsinnaanermut imaluunniit aatsitassarsiorfiup eqqagaanit mingutsitsinermut, tunngatillugu.
NAALAKKERSUISUP QISUARIAATAA
Sermitsiap pisortap Daniel Mamadoup apersorneqarnera aatsitassanut naalakkersuisumut Naaja H. Nathanielsenimut nassiuppaa, arlalinnillu apeqquteqarfigalugu:
Ingerlatseqatigiiffiup aaqqiissutissarsioqatiginiarlugu oqaloqatigerusuppiuk?
- Eqqartuussivimmut suliassanngortitsigaanni ajugaasinnaassuseqarnermik tunngaveqartussaavoq. Eqqartuussivimmi ajugaanissaq pingaarnertut angunianngikkaani suliaq piaartumik unitsinneqartariaqarpoq.
– Suliami matumani oqaloqatigiittoqarssappat uranimut inatsimmi killilersuinerit atorunnaarsinneqartariaqarput. Greenland Mineralsimut uranimut inatsit allanngortinneqarsinnaanngitsoq, inatsisillu atuutilerneraniit allaanerusumik aaqqiissutissaqanngitsoq ukiorpassuarni paasitinniarsaraarput. Kuannersuarni aatsitassat katitigaanerat allanngortissinnaanngilarput, taamaattumik piiaanissaq uranimut inatsimmik unioqqutitsinerussaaq. Uranimut inatsisip allanngortinnissaa atorunnaarsinneqarnissaaluunniit periarfissatuaavoq, tamannalu politikkikkut pilersaarutigineqanngilaq.
Uranimut inatsit politikkikkut pissuteqarnerarlugu isornartorsiorneqarnera qanoq isumaqarfigaajuk?
- Urani pillugu inatsit suliffeqarfimmut ataasiinnarmut tunngatinneqarnerarneqarnera akerlerilluinnarpara, ETM-imi pisinnaatitaaffillit allat aamma eqqugaasut ilisimavaa.
- ETM-ip pisortaata oqaatigisimanngisannik oqalutsinniaanera unitseqquara. Aalajangiineq Inatsisartunit, tassa inuiaqatigiit qinigaannik politikkikkut aaqqissuusaasunit, suliffeqarfimmut arlaleriarlunga nassuiaatiginiartareerpara. Tamat oqartussaaqataanerisa aqqani nunap inatsisiliortuini aalajangikkat malittarpagut.
Ingerlatseqatigiiffiup 76 milliardit koruuninik taarsiivigineqarnissamik piumasaqannginnerarpoq. Taanna qanoq isumaqarfigaasiuk?
– Taamaappat ukiuni kingullerni pingasungajanni kikkut tamarmik paatsoorsimavaat, taakkuami piiaanissamut akuersissummik tunineqarsinnaallutik taamaattoqarsinnaanngippallu aningaasarpassuarnik taarsiiffigineqartariaqarlutik oqaatigisaqattaarpaat.
- Taarsiivigineqarnissamut eqqartuussivimmut suliakkiissumi paasinartorujummik allaqqavoq. Ersilersitsiniaanerannut isummissananga oqaatigiuaannarnikuuara. Eqqartuussivimmi aalajangiisitsisinnaapput, suliallu aallartinnissaa qilanaaraara.
/TJJ
Energy Transition Mineralsip pilersaarutini allanngortinniarlugu piareersimavoq, assersuutigalugu Tasip eqqaani aatsitassarsiorfiup eqqagassaanik mingutsitsineq pillugu nunaqavissut isumakuluutaat eqqarsaatigalugit.
Assi: Oscar Scott Carl
Suliniutip allanngortinnissaanut piareersimasut Suliniut misissueqqaarnermiit piiaanissamut piareersimalluinnarpoq, kisianni suliniut 2021-mi uranisiornermut inatsit pissutigalugu pissutissaqanngitsumik unitsinneqarpoq, Daniel Mamadou oqarpoq, taassumalu suliniut allanngortinneqarsinnaanersoq najukkami ernumassutigineqartunut naapertuunnerusinnaanngorlugu oqartussat suliffeqarfimmik oqaloqateqarusunngimmata uggoraa. Assersuutigalugu eqqaaviup sumiinnissaa pillugu, taanna Tasermut inissinneqarnissaa pilersaarutigineqartup allamut nuunneqarsinnaanera eqqarsaatigalugu.
Attaveqaqatigiinnermut tunngatillugu aamma taamaappoq, tassami Narsami umiarsualiviup aqqutigineqartariaqanngilaq.
Soormi issiaqatigiilluta periarfissat allat oqaloqatigiissutigigutsigit? Misigisimavugut matu matoqqasoq suullu tamaasa eqqartortariaqanngitsut.
Daniel Mamadou, Energy Transition Mineralsimi pisortaq
Aamma pisortap aningaasaqarneq suliniummi pingaarnerpaanngitsoq, suliffeqarfiullu avatangiisinut inuiaqatigiinnullu tunngasut aaqqinneqarsinnaappata aningaasartuutit qaffasinnerusut akueriumaarai uppernarsarpaa.
- Umiarsualiviit atornissaat allilernissaallu pilersaarutaagaluarpoq, tamannali tulluarnerussappat nutaarluinnarmik sananissaq periarfissaavoq, Daniel Mamadou oqarpoq, taassuma ingerlatseqatigiiffiup oqartussanik aaqqiissutissanik nassaarniarluni oqaloqateqarsinnaannginnertik pakatsissutigaa.
- Soormi issiaqatigiilluta periarfissat allat oqaloqatigiissutigigutsigit? Misigisimavugut matu matoqqasoq suullu tamaasa eqqartortariaqanngitsut.
Ingerlatseqatigiiffik naapertorlugu suliniut misissoqqissaarneqareerpoq, aatsitassanillu qaqutigoortunik piiaaffimmi minnerpaamik ukiuni 35-ni piiaasoqarsinnaavoq.
Assi: Oscar Scott Carl
Aarlerinartut tamarmik isumagineqarsinnaapput Aatsitassarsiorfiup saffiugassanik qaqutigoortunik, ilaatigut uranimik, ineriartortitsineq suliarinninnerlu inunnut avatangiisinullu ulorianaateqaratik ingerlanneqarsinnaanerat uppernarsarsinnaagaa Daniel Mamadou oqarpoq.
- Suliniut pitsaanerpaamik ineriartortinneqartoq iluarsaanneqartorlu qulakkeersinnaavarput, isumaqarpugullu suliniut isumannaatsumik atorneqarsinnaasoq navianaatillu tamaasa aqussinnaallugit.
Suliniut misissoqqissaarneqareertoq, aatsitassanillu qaqutigoortunik piiaaffimmi minnerpaamik ukiuni 35-ni piiaasoqarsinnaasoq suliffeqarfimmiit oqaatigineqarpoq.
– Suliniuteqarnerup iluatsilluarnissaa pingaarnerpaatipparput, isumaqarpugullu tamanna Kalaallit Nunaannut iluaqutaangaarsinnaasoq, Daniel Mamadou oqarpoq. Taanna Singaporemi aningaasaqarnermik suliaqartuuvoq, ilaatigut aatsitassarsiornermut aningaasaliinernik suliaqartarsimalluni.
USA-mik suleqateqarneq Energy Transition Mineralsip Kinaminngarnit USA-mik suleqateqarnissaq pingaarnerutillugu nalunaaruutigeqqammerpaa, aamma Kinamiut aningaasaliisuata Shenghe Resourcesip piginneqataassutai ikileriarujussuarsimasut.
– Arlaleriarluta aningaasaliissutinik annertusaaneq Shenghe Resourcesip peqataaffiginngisaa ingerlapparput, taamaammallu piginneqataassutsit maanna 5,9 procentiupput. Kalaallit Nunaata Kinamiut suliffeqarfiutaat nunami ingerlatsisinnaassanngitsut nalunaarutigereernikuuaa, taamaattumik USA-p Kinaminngarnit isiginiarnerunera uagutsinnut silatusaarneruvoq, Daniel Mamadou oqarpoq nangillunilu:
- USA-mi aningaasaliinermiut niuertarfiit nunarsuaq tamakkerlugu marloriaammik annertunerupput. Ingerlanerput suli immikkuullarissunngunngilaq. Aatsitassarsioqatigiiffiilli misissuinerillu asserluinnaanik ingerlapput, USA-mi Europatulli politikkikkut kissaatigineqarpoq saffiugassanik pingaarutilinnik pilersuinerup pitsanngorsarneqarnissaa.
Pisortaq naapertorlugu Amerikami soqutigisaqaqatigiinnik Ballard Partnersimik suleqateqarnerup aamma aningaasaleeqataanissamut aningaaserivimmik Cohen & Capitol Marketimik isumaqatigiissuteqarnerup ingerlatseqatigiiffiup Amerikamiut niuerfiat ilisarisimalluarnerujumagaa takutippaa. USA-p Europamit aatsitassanik qaqutigoortunik piiaanermi siuarsimanera Californiami Mountain Passimi aatsitassarsiornermik suliniuteqarneratigut ilaatigut pissuteqarpoq, taannalu – Kuannersuarni suliniuteqarnertulli – aallaqqaammut Kinamiut piginneqataassutigisimasaannik annertuumik pigineqarpoq, ukiullu kingulliit ingerlaneranni aktianik tunisinermi annertusiartornerup kinguneranik piginneqataassutinik ikilisitsisoqarsimavoq.
- Aatsitassanik qaqutigoortunik akikinnerpaanik tunisassiorneq anguniarlugu piiaanissaq pineqanngilaq, Kinammi tamanna sapinngilaa. Pilersorneqarnikkullu attaveqaatit namminersortut patajaatsullu pilersinneqarnissaat anguniarneqarpoq, Daniel Mamadou oqarpoq.
Taarsiiffigineqarnissamik piumasaqarneq Energy Transition Mineralsip Kuannersuarni piiaanissamut akuersissummik pissarsisinnaanngippat 76 milliardit koruuninik taarsiiffigineqarnissaminik piumasaqarnera tusagassiuutitigut arlaleriarluni sammineqarnikuuvoq.
– Oqarsimanngisaannarpugut 76 milliardit koruuninik taarsiissuteqarnissamik qinnuteqarluta. Kisianni aatsitassanut oqartussaasut ataatsimeeqatigereerlugit paasitinneqaratta uranimut inatsit nutaaq akuerineqarsimasoq, pigisavullu poortoriarlugit qimagutiinnartariaqartugut, suliniuterput tunisassiornermi qanoq naleqartigissanersoq arlaannaannulluunniit attuumassuteqanngitsumik nalilersortipparput. Kisitsisit taakku suliniutip aningaasatigut periusissiornermullu tunngasutigut pingaaruteqarnera erseqqissarumallugu ilannguppavut. Politikkerilliuku tusagassiortullu kisitsisit taarsiissutissatut nalileraat — uaguunngitsoq.
- Ukkkatarisarput anneq tassaavoq suliniutip qanoq isilluni naammassineqarsinnaanissaa. Allangueriaannaavugut. Namminersortuugatta naleqqussarsinnaavugut, taamaattumik suliassat suliarinerisigut allannguisarpugut.
Uranimut tunngatillugu apeqqut Energy Transition Minerals Narsami suliniut eqqorniarlugu uranimut inatsit politikkikkut pissuteqartumik atuutilersinneqarsimasoq isumaqarpoq, piiaanermi 1 tonsimi annertunerpaamik urani 100pp-iusussanngorlugu.
Kuannersuarni savimineq 1 tonsi 200-400 ppm-imik uranitaqarsinnaavoq.
Daniel Mamadou uranimik akullit qanoq amerlatiginerat apeqqutaanngitsoq oqarpoq, piffissalli ingerlanerani ulorianarsinnaanera apeqqutaasoq. Aamma suliffeqarfiup avatangiisinik illersuiniarluni siunnersuutai Australiami Canadamilu najoqqutassianut, pisortap nunarsuarmi qaffasinnerpaat ilaattut isigisaanut, naapertuuttut.
- Apeqqut tamanna pillugu oqaaserpassuaqarpoq. Kikkut tamarmik uranip ulorianartuunera saviminermut qanoq akuuteqartiginera apeqqutaaginnanngitsoq nalunngilaat. Piffissap ingerlanerani qanoq annertutigisumik sunniuteqarnera aalajangiisuuvoq. Isumaqarpunga Naalakkersuisoq [Naaja H. Nathanielsen, aaqq.] nammineq siullersaalluni inatsit politikkikkut pissuteqartumik atuutilersinneqarsimasoq oqarsimasoq. Taamaattumik politikkikkut aaqqiissutissarsiorta, Daniel Mamadou oqarpoq.
