Kukkorujussuarneq alla: Greenland Airportsip aningaasanut naatsorsuutimini ingerlatsinermit isertitat 364 millioninik qaffasinnerusutut naatsorsorsimagai

Greenland Airportsip 2025-mut ukiumoortumik nalunaarusiami millioninik pingasunik kisitsisitalinnik kukkussuteqarsimalluni nassuerutigaa.

Ajornartorsiut naatsumik oqaatigalugu ingerlatseqatigiiffiip suliffeqarfissuup ingerlatsinera qanoq iluanaarutaasimanersoq naatsorsuinemri 364 millionit koruuniusut ilanngaatigineqartussaapput. Millionilikkaalli amigartoorutaasut kukkussummik allamut ilanngunneqarput.

Tamanna ilanngunneqanngippat ukiumoortumik nalunaarusiami aningaasat ingerlaarnerinik naatsorsuinermi mittarfiliornerit suliffeqarfissuup karsianut isertitaanit 145 millionit koruuninik amerlanerusunik isertitsisimasut takuneqarsinnaavoq.

Kukkorujussuartoqarsimasoq pisortaaneq Jens Lauridsen nassuerpoq:

- Kukkusumik immikkoortitsisoqarnera ajortupilussuusinnaavoq, tamannali isumaqatigiissutigipallassinnaavarput. Kukkussut nassuerutigalugulu akisussaaffimmik tigusivugut, taanna oqarpoq.

Aningaasaqarnermut pisortap Per Stjærnholm Trærupip kukkunerit taakku marluk "Excelimi kukkunertut“, tassa naatsorsuuserinermi atortorissaarummi kukkunertut, taavai, soorunamilu taamatut kukkusoqartartussaanngitsoq erseqqissarpaa, maannalu siunissami qanoq pinngitsoortinneqarsinnaanerat misissorpaa.

Kukkuneq Sermitsiap saaffiginninnerata kingorna aatsaat ilisimaneqalersoq Aningaasaqarnermut pisortaq oqarpoq.

Taamaammat aningaasat taama annertutigisut

Kukkuneq Sermitsiap allaaserisap matuma siuliani eqqartugaata assigalugu Ilulissani mittarfiup sanaartorneranut naalagaaffiup tapiissutaanut tunngassuteqarpoq.

Suliffeqarfiup 400 million koruunit naalagaaffimmit pissarsiarai. Sermitsiap allaaserisami siuliani aningaasat tiguneqarnerat naatsorsuusiornermi kukkusumik inissinneqarsimasoq oqaluttuaraa.

Suliffeqarfiup naatsorsueriaasia naapertorlugu mittarfiup nalinga ukiut ingerlaneranni appariartortillugu tapiissutit isertitatut allassimasariaqaraluarput.

Ilulissat Mittarfiata nalinga 2025-mili naatsorsuutini appartinneqangaatsiarpoq. Taamaammat tapiissutigineqartussat 364 millionit koruunit ukiumi tassani isertitatut naatsorsorneqarput. Tamanna immernermini aamma eqqortuuvoq.

Kukkuneq 2025-mi aningaasat ingerlatseqatigiiffimmut isertut aningaaserivimmiillu anisut nalunaarusiarineqarmata pivoq. Tassani 364 millionit koruunit nutaatut akilerneqartuunatik isertitaareersutut allassimasussaasut eqqarsaatigineqartariaqarsimavoq. Tamanna Greenland Airportsimit aaqqinneqanngitsoorsimavoq.

Aningaasat ingerlaarnerat ukiumut naatsorsuutit inernerinngikkaat

Aningaasat ingerlaarneranni qanoq amerlatigisut isertinneqartut akilerneqartullu, ingerlatsinermut, kiisalu aningaasaliinernut aningaasalersuinermullu immikkoortinneqarsimasut aningaasat ingerlaarneri pillugit nalunaarusiami takuneqarsinnaavoq.

Aningaasat 364 millionit koruunit ingerlatsinermi amigartoorutit aningaasaliinerit immikkoortuannut kukkusumik ilanngunneqarsimapput.

Kukkuneq pineqartoq immikkoortiterinermi kukkuneruvoq ingerlatseqatigiiffiup angusanut naatsorsuutaanut, naatsorsuutinut namminerluunniit aningaasaatinut sunniuteqanngitsoq, Greenland Airports aamma ingerlatseqatigiiffiup kukkunersiuisua Grønlands Revision erseqqissaapput.

Kukkunermi suliffeqarfissuup 2025-mi ullumikkulluunniit aningaasaateqarnera allanngortinneqanngilaq, sulili aningaasarsiutaasutut isikkoqalersitsivoq, naak aningaasanik ilanngaatitaqaraluartoq.

Aningaasat ingerlatitseqqinnermut atorneqartartut paasissutissatut pingaaruteqarluinnartutut eqqortumik saqqummiunneqartariaqartut aningaasaqarnermut tunngasunik professorip Per Nikolaj Bukhip allaaserisami uppernarsarpaa:

– Aningaasat ingerlaarnerat suliffeqarfiup qanoq akiliisinnaassuseqartigineranik, taamaalillunilu siunissami akiligassaminik akilersinnaasinnaaneranik, paasissutissiimmat tamanna pingaaruteqarpoq, Per Nikolaj Bukh apersorneqarnermini oqarpoq.

Kukkusumik kisitsisitaliinerup iluaqutaasimasinnaanera itigartikkaa

Greenland Airportsip kukkusumik paasissutissiineq iluaqutigisimanngikkaa Greenland Airportsip pisortaanera oqarpoq.

– Tamanna uagut iluanaarutigisimannginnatsigu erseqqissassallugu pingaaruteqarpoq. Assersuutigalugu kisitsisit taakku tunngavigalugit taarsigassarsiniarnikuunatalu immikkut aningaasaliissuteqarnissamut qinnuteqarnikuunngilagut, Jens Lauridsen oqarpoq nangillunilu:

- Kialluunniit kisitsisit kukkunerat iluaqutiginagulu arlaatigut iluanaarfiginngilaa.

2025-mut ukiumoortumik nalunaarusiamik nutartikkamik naqqiisimasumillu saqqummiussisoqassanngitsoq Greenland Airports ilisimatitsivoq. Taamatut naqqiineq akuerineqassappat immikkut ittumik ataatsimeersuartoqartariaqarpoq.

Kukkussutit aningaasarpassuarnut tunngagaluartut kisitsisinut pingaaruteqarnerusunut, soorlu ukiup angusanut nammineq aningaasaatinut sunniuteqanngillat. Taamaammat nutaamik ukiumoortumik nalunaarusiornissaq piisariaqanngitsoq nalilerneqarpoq:

– Nutaamik naatsorsuuteqartariaqarnissatsinnik tamanna ilungersunartiginngitsoq Isumaqarpugut. Kisitsisilli aappaagumut ukiumoortumik nalunaarusiami naqqissavagut, aningaasaqarnermut pisortaq Per Stjærnholm Trærup kukkunersiuisut isumasioreeramigit oqarpoq.