Landry Kalaallit Nunaannukalerpoq - ataatsimeersuarnermi peqataassaaq

Inuussutissarsiornermik ataatsimmersuarneq Future Greenland tupaallannartumik tikeraartoqassaaq.

Donald Trumpip Kalaallit Nunaannut immikkut aallartitaa, Jeff Landry, tikissalluni nalunaarpoq.

Tusarfiit arlallit Sermitsiamut ilisimatitsipput, Landrylu qaaqqusat allattorsimaffianni tamanit takuneqarsinnaasumi aamma ersippoq.

Jeff Landry immikkut aallartitatut toqqarneqarami Kalaallit Nunaata USA-mut ilanngunnissaa sulissutiginiarlugu oqarnikuuvoq.

Sulisitsisut (GE) Future Greenlandimik aaqqissuussisuupput. Landry Sulisitsisunit qaaqquneqarsimanngitsoq, aamma pisortatigoortumik programmimut ilaanngitsoq, nalinginnaasumilli qaaqqusaasutut peqataasoq Sulisitsisuni pisortap Christian Keldsenip Sermitsiamut erseqqissarpaa.

Ataatsimeersuarneq Future Greenland maajip 19-iani 20-anilu Nuummi ingerlanneqassaaq. Sermitsiaq tikeraartussaq tupaallannartoq pillugu sukumiinerusumik oqaaseqartitsiniarluni sulissuteqarpoq.

"Naalagaaffimmit Louisianamit" peqataassasoq

Landry peqataasussat allattorsimaffiat sasqqummersinneqarsimasoq naapertorlugu "Naalagaaffimmit Louisianamit" peqataassaaq. Jeff Landry Kalaallit Nunaannut immikkut aallartitaanermi saniatigut Louisianami guvernøriuvoq.

Apeqqut: Taama akerleriissutaatigisumik tikeraartoqarnissarsi illit qanoq isumaqarfigaajuk?

- Future Greenland ataatsimeersuarneruvoq inuussutissarsiornerup siunissami ineriartortinnissaanut tunngasoq, taamaammallu nunanit tamalaanit soqutigineqartorujussuuvoq. Ataatsimeersuarneq tamanut ammajuaannarpoq kikkullu tamarmik peqataasunut bilitsinik pisisinnaapput. Landry taamaaliorniarluni aalajangersimavoq. Oqaatigineqareersutut: Pilersaarutitsinnut ilaanngilaq, Christian Keldsen oqarpoq nangillunilu:

- Nunani allani sinniisoqarfiit pitsaasumik suleqatigisarpagut. Nunanut Kalaallit Nunaata suleqatigerusutaanut attaveqarluartuaannarpugut. Ataatsimeersuarnitsinni, nunanit assigiinngitsunit 20-ngajannit inunnik 500-nik amerlanerusunik peqataasoqartussami inuit ataasiakkaat peqataanissaat unitsinniarsinnaanngilarput.

Ataatsimeersuarneq Future Greenland maajip 19-iani 20-anilu Nuummi ingerlanneqassaaq.

Trumpimit toqqarneqartoq

USA-p præsidentiata Donald Trumpip Jeff Landry Kalaallit Nunaannut immikkut aallartitatut 2025-mi decembarimi toqqarpaa.

Donald Trumpip toqqaaneq pillugu nittartakkamini Truth Social-imi ima allappoq:

- Jeffip Kalaallit Nunaat nunatta isumannaatsuuneranut qanoq pingaaruteqartigisoq ilisimavaa, nunattalu soqutigisaanik suleqatitsinnut — nunarsuarmilu nunat tamarmik — isumannaatsuunissaannik aniguinissaannillu siuarsaaniarpoq.

Jeff Landryp ilaatigut Kalaallit Nunaata USA-mut ilanngunnissaa sulissutiginiarlugu allalluni toqqarneqarnini uppernarsarpaa:

- Kalaallit Nunaata USA-mut ilanngunnissaanut kajumissutsimik suleqataasinnaanera ataqqinaataavoq.

Jeff Landryp toqqarneqarnera pissutigalugu ministeriuneq Mette Frederiksen naalakkersuisullu siulittaasuat Jens-Frederik Nielsen ataatsimut nalunaaruteqarput, tassani nunarsuarmi isumannaallisaanermut tunngatinneqaraluarpalluunniit nunanik allanik tiguaasoqarsinnaanngitsoq aamma erseqqissarpaat:

- Nunanik allanik tigusiinnartoqarsinnaanngilaq. Aamma nunarsuarmi isumannaallisaanermik tunngavilersuuteqaraluaraanniluunniit. Kalaallit Nunaat kalaallit pigaat, USA-llu Kalaallit Nunaat tiguassanngilaa. Naalagaaffeqatigiinnerup killeqarfiisa namminiussuseqarnerpullu ataqqineqassasut naatsorsuutigaarput, Mette Frederiksen Jens-Frederik Nielsenilu oqarput.

Qimussertartunut qaaqqusissut itigartinneqartoq

Jeff Landry ukioq manna siusinnerusukkut ataasiarluni Kalaallit Nunaannut aallartussatut nalunaarutigineqarpoq.

Kommunimi politikerimit takornarialerisumillu Kristian Jeremiassenimit qimussimik sukkaniunnissamut qaaqquneqarpoq.

Qimussertartut peqatigiiffiata KNQK-p qaaqqusissut akueriumanngilaa, taamaatinneqarporlu – taamaalilluni tikeraarnissaralua pinngitsoorpoq.