Naalakkersuisunit inuussutissarsiornermullu ataatsimiititaliamit Torontomi aatsitassarsiorfissanik saqqummersitsinermi peqataasoqassasoq

Torontomi ukioq manna ataatsimeersuarnermi Prospectors & Development Association of Canada (PDAC – Canadami aatsitassarsiorniartut piorsaaniartut kattuffiat) pisussat inissivinngikkaluartut, inuussutissarsiornermut, nukissiornermut, inatsisinik atuutsitsinermut naligiissitaanermullu naalakkersuisoq Naaja H. Nathanielsen (IA) kiisalu pinngortitamut avatangiisinullu naalakkersuisoq Peter Borg (D) atorfilittanik immikkullu ilisimasalinnik ingiorteqarlutik peqataanissaat naatsorsuutigineqarpoq.

Tamatuma saniatigut Inatsisartuni inuussutissarsiornermut aatsitassanullu ataatsimiititaliami ilaasortat peqataassapput.

- Ataatsimeersuarnerni taamaattuni susoqartarnersoq sunillu oqaloqatigiittoqartarnersoq takussallugu qilanaaraara. Nunatsinnut tunngatillugu qanoq isumaqatigiissuteqartoqartarnersoq ilisimasaqarfiginerulissallugu naatsorsuutigaara, Namminersorlutik Oqartussallu Nunarput qanoq nittarsaanneraat. Malinnaavigissallugu soqutiginassaaq, ataatsimiititaliami siulittaasoq Mariane Paviasen Jensen peqataarngaartussaq oqarpoq.

Mariane Paviasen Jensenip saniatigut Bentiaraq Ottosen, Hans-Erik Enoksen, Juno Berthelsen aamma Lars Poulsen ukioq manna PDAC-mi peqataassasut aamma naatsorsuutigineqarpoq.

Aatsitassarsiortunik oqaloqateqarneq

Naalakkersuisunut ilaasortat ilaatigut ”Greenland Day” isumagissavaat, matumani ingerlatseqatigiiffiit Kalaallit Nunaanni sulinerminnit misilittakkatik oqaluttuarissallugit. Tamatuma saniatigut aatsitassarsiortut oqaloqatigineqassapput.

Aatsitassanut Naalakkersuisoqarfik naapertorlugu sulissutigineqarportaaq Canadami ministerinik susassaqartunik oqaloqateqarnissaq Kalaallit Nunaata Canadallu suleqatigiinnerunissaat pillugu.

Tamatuma saniatigut Namminersorlutik Oqartussat ”aatsitassarsiullammammik” nersorniaasarput, taannalu 2025-mi Amaroq Mineralsimut Nalunami kuultisornissamik akuersissuteqartumut tunniunneqarpoq. Siusinnerusukkut ilaatigut Greenland Resources, Bluejay Mining, Tanbreez, North American Nickel, London Mining aamma Ironbark Sinc akissarsitinneqarput.

Peqataasut aatsaat taama amerlatigisut

Ukioq manna peqataasussat aatsaat taama amerlatigissapput 100 missaanniillutik, Naalakkersuisunut ilaasortat, inuussutissarsiornermut ataatsimiititaliamiittut Dansk Industrimeersut, Sulisitsisut Canadamilu danskit aallartitaqarfianeersut saniatigut suliffeqarfiit arlaqartut peqataassallutik.

Suliffeqarfiit peqataasussat maannamut tassaapput 60North Greenland, Air Greenland, Arctic Import, Arctic Law Greenland, BDO, Blue Water Shipping, BMS, Cowi, EMJ Atcon Greenland, Greenland Escape, Greenland Travel, Greenland Copter, Grønlandsbanken, H.P. Entreprenørmaskiner, HK Transport, Illit Forsikring Agentur, KSMS, Lumina Sustainables Materials, Nalik Ventures, Nuna Advokater, Pangaea Logistic Solutions, Rambøll, Royal Arctic Line, Sermeq Helicopters, Sikuki Nuuk Harbour aamma Tusass.

Canadami periarfissat

Sulisitsisuni pisortaq Christian Keldsen naapertorlugu ukioq manna saqqummersitsinermi Kalaallit Nunaannit pingaartinneqartut ilagaat Canadamiunik suleqatissatigut periarfissat ilaatigullu aningaasaliinerit.

- Kalaallit Nunaannit attavigilluakkat sammineqassapput ersarissumillu oqaatigineqarluni aatsitassarsiorneq tapersersorneqartoq. Greenland Dayimi sammineqassapput Canadami EU-milu suleqateqarnissaq, Christian Keldsen oqarpoq.

Torontomi aatsitassarsiornikkut saqqummersitsineq nunarsuarmi annersaavoq, naatsorsuutigineqarporlu nunarsuarmit tamarmit peqataasut 27.000-30.000-iussasut. Saqqummersitsineq marsip 1-anit 4-anut ingerlanneqassaaq. Qulissaanik Naalakkersuisut Dansk Industri aamma Sulisitsisut suleqatigalugit Torontomi PDAC-mi inuussutissarsiorfissanik nittarsaassissapput.