Narsarsuup siunissaa: Naalakkersuisut illersornissaqarfimmik isumaqatiginninniarput

Oqartussat Narsarsuarmi mittarfiup siunissaa pillugu oqaaseqarumanngillat, Naalakkersuisulli tamanna pillugu danskit illersornissaqarfiannik isumaqatiginninniartut maanna Sermitsiap paasititsiissutigisinnaalerpaa.

Qaqortumi mittarfik nutaaq apriilip 15-ani ukioq manna ammarneqarmat, Narsarsuarmi mittarfik qulimiguulinnut mittarfinngortinneqarpoq, akunnittarfillu Greenland Airportsimit ingerlanneqartoq matuneqarluni. Narsarsuarmi innuttaasut arlaqartut, illoqarfinnut suliffissaqartitsisunut tamatuma kingunerisaanik nuttarput.

Inoqarfik 40-t missaani amerlatigisuni maanna najugaqarfigineqartoq siunissamut qanoq pisoqarumaarneranik nalorninartorsiorpoq. Neriuuteqalersinnaanerannillu periarfissaq pileraluttuarpoq.

Timmisartunut suluusalinnut mittarfittut aggustip arfernani atuutilerseqqinneqarpoq, soorlu Sermitsiami juulip 30-ani allaaserineqartoq. Naviairimit ilisimatinneqarpugut, taakkualu Kalaallit Nunaat pillugu Aeronautical Information Publication (AIP) nutartersimavaat. AIP tassaavoq paasissutissanik nunami naleqquttunik silaannakkut angallannermut attuumassuteqartunik katersuiffik – ilaatigut timmisartortitseqatigiiffinnit timmisartortartunillu timmisartuussinissaminnik pilersaarusiornermi atorneqartartoq.

Mittarfiup qulimiguulinnut mittarfinngortinneqarnissaanik taamaatitsineq, silaannakkut angallannermut aqutsisoqarfimmiit aalajangerneqarsimasoq, atuagassiami naatsumik allassimavoq.

Aalajangiineq tamanut saqqummiunneqannginnera maluginiarnarpoq. Greenland Airports aamma Naalakkersuisut aalajangiinerit annertuut pillugit tusagassiuutitigut nalunaarutinik tamanut nassiussisarput – ingammik suliani, Kalaallit Nunaanni innuttaasut amerlanersaasa aalajangiinerni nuannaarutigisinnaasaanni taamaattuni.

Taamaattumik Sermitsiap Greenland Airports nassuiaammik pissarsiniarluni attaveqarfigaa. Pisorli oqaaseqarfigerusunngilaat, Ineqarnermullu, Attaveqaqatigiinnermut, Nunap Isorliunerusunut Upalungaarsimanermullu Naalakkersuisoqarfimmut ingerlateqqillugu, maannalu akissuteqarput.

Akissut annerusumik paasissutissanik nutaanik pissarsiffiunngilaq, naalakkersuisoqarfilli ilisimatitsivoq Nunanut Allanut Tunngasunut Naalakkersuisoqarfik mittarfiup siunissaa pillugu danskit illersornissaqarfiannut isumaqatiginninniartoq.

“Narsarsuarmi mittarfik qulimiguulinnut mittarfinngortinneqannginneranut apeqqut paasinarpoq.

Tamanna danskit illersornissaqarfiat Naalakkersuisullu akornanni isumaqatiginninniarnernut attuumassuteqarmat Nunanut Allanut Naalakkersuisoqarfik innersuussutigissavara, taakkuami isumaqatiginninniarnernut pineqartunut akisussaasuupput”, naalakkersuisoqarfik naalakkersuisoqarfik Sermitsiamut allappoq.

Sermitsiap Nunanut allanut Naalakkersuisoqarfik oqaaseqartinniarsaraa.