Neriniartarfiutillit oqaloqatigiinnissamik ujartuisut: Inuussutissarsiummik taamatut matusineq attanneqarsinnaanngilaq

Kommune Kujallermi akuersissuteqartut tamarmik, soorlu neriniartarfiit, pisiniarfiit imerniartarfiillu, imigassartorfiunngitsunik tuniniaasinnaajunnaarlutillu sassaalliisinnaajunnaartut tallimanngornermi nalunaaqutaq 20.00 kalerrinneqarput.

– Matusinissamut piareersimasimanngilluinnarpunga. Nutaamik nalunaarusiortoqarsimasoq, sassaalliinissarlu unitsinneqartoq kommunimi sulisumit oqarfigineqarlunga sianerfigineqarpunga, Qaqortumi Arctic Cafemi pisortaq piginnittorlu Jim Riis oqarpoq, taassumalu kommunip inuussutissarsiortullu – inerteqquteqalernerup siorna kingornaluunniit - oqaloqatigiinnginnerat pakatsissutigaa.

Inerteqqut eqqunngitsumik sunniuteqartoq

Kommunip niuertarfik tamarmi matunagu inuit aalajangersimasut ajornartorsiutillu aalajangersimasut samminerusariaqarai, Jim Riis isumaqarpoq.

– Inuppassuit imigassamik aalakoornartulimmik ajornartorsiuteqartut illoqarfimmi neriniartarfinnut imerniartarfinnullu ornigunneq ajorput, taamaammat aalakoornartulimmik imigassartortarnerup inerteqqutaalernissaa iluaqutiginngilaat. Aamma aalajangerneq inuusuttunut aallarnisaasunut sakkortuumik eqquisoq isumaqarpunga. Ilaat aningaasaatitik tamaasa neriniartarfinnut takornariartitsinermullu atorsimagamikkit maanna isertitaqanngilluinnarlutik qaqugulu aallartissinnaassanerlutik nalornissutigilersimavaat, Jim Riis oqarpoq nangillunilu: – Illoqarfimmi imigassamut aalakoornartulimmut ajornartorsiutit toqqissisimannginnerullu iliuuseqarfigineqarnissaat pisariaqartoq tamatta isumaqatigaarput. Peqataatinneqarlutalu aaqqiissuteqaqataarusuppugut. Maanna inerteqquteqarnerup annertuallaamik eqqorpaatigut, taamaammat qanoq ingerlaqqissinnaanerput pillugu allanik siunnersuuteqarniarpugut, assersuutigalugu innuttaasut imigassamik aalakoornartulimmik ajornartorsiutillit iseqqusaannginnissaannik allattorsimaffimmik atuutitsinikkut, Jim Riis oqarpoq, taassumalu inerteqquteqarneq qaammammik ataatsimik sivisussuseqassappat kaaviiaartitani 500.000 koruunit missaanniittut annaasimassallugit naatsorsuutigaa. Taamaammat matussusiinissamut aaqqissuussisoqarsinnaanera pillugu kommunimik oqaloqateqarnissaq ujartorpaa.

Meeqqat toqqissisimasariaqartut

Borgmesterip Malene Vahl Rasmussenip inuussutissarsiortut pakatsisimanerat paasilluarsinnaavaa. Aalajangiusimaannarporli.

– Pakatsisimanera paasisinnaavara, kisianni pissutsini matumani iliuuseqartoqartariaqarsimavoq. Meeqqat ilaqutariillu kommunitsinni toqqissisimanissaat pingaaruteqarnerpaavoq. Angerlarsimaffiup avataanut inissinneqartut pingasut akilerneriniit inuussutissarsiortunut taarsiissuteqarusunneruvunga, taanna oqarpoq, imigassamillu aalakoornartulimmik inerteqquteqalernerup kingorna „sumiiffimmi tamarmi aatsaat taama eqqissineqartigalunilu eqqissisimatigisoq“ erseqqissarpaa.

- Meeqqat aatsaat taama amerlatigisut sapaatip-akunnerata naanerani arfininngornermi arsaaqatigiipput, taanna oqarpoq, imigassamillu aalakoornartulimmik inerteqquteqarnerup kingunerisaanik illoqarfimmiunit ajunngitsumik akissuteqarfigineqartarsimalluni nangilluni oqaatigaa.

- Akissutit nuanniitsut aningaasanik kaaviiaartitanillu annaasaqarsimasunit tusartarpakka.

Imigassaq aalakoornartulik pillugu politikki ataatsimoorussaq pisariaqartinneqartoq

Kujataani imigassamik inerteqqutiginnilluinnarnissaq piffissaq ungasinnerusoq eqqarsaatigalugu piviusorsiornerunngitsoq borgmesterip nalunngilaa, tamannali politikkikkut iliuuseqarnerunissamik oqaloqatigiinnermik kinguneqaqqissasoq neriuutigaa.

– Imigassaq aalakoornartulik pillugu politikki ataatsimut isigalugu oqaluuserilertigu. Kommunimi ataasiinnarmi atuutilersinnagu nuna tamakkerlugu atuutilersinniartigu, Malene Vahl Rasmussen oqarpoq, kommunillu suliniutinut aalajangersimasunut tunngatillugu misissuinerit pioreersut tunngavigalugit imigassamik tuniniaaneq ammaqqikkiartuaarniarlugu peqqissutsimut naalakkersuisoqarfik suleqatigilereeraa nangilluni oqaatigaa.

Juullilernerani nereqatigiittarneq qallisoq

Jim Riisip piffissaq qanoq sivisutigisoq isumaqatigiissutigineqarsinnaanersoq pillugu kommuni oqaloqatigisinnaallugu neriuppoq.

– Immaqa borgmesterip eqqunngitsuliorsimanngitsunik, nunamili kommunimilu malittarisassat malillugit ingerlatsisunik, akeqqersimaartuaannarnera unitsinneqarsinnaavoq. Aammalu nunatsinni imigassaq aalakoornartulik pillugu ajornartorsiutit nuna tamakkerlugu pimoorullugit suliniuteqarfigineqartariaqarnerat pillugu oqallinneq eqqaasitsissutigeqqikkusupparput.

- Juullilernerani nereqatigiittarneq qalliartorpoq. Ingammik nioqqutissat piffissamut tassunga inniminnersimasagut tikiuppata suli annaasaqarnerussalluta ilimagaarput, Jim Riis oqarpoq.