Nittartakkatigut sulisussarsiortarfik kukkuluttortoqareersoq uterpoq - kingunipiloqarnissaa pisortap ernumassutigaa

Suli.gl pisortat ingerlataat nutaanngorlugu pilerseqqinneqarpoq, Naalakkersuisut taama ilisimatitsipput.

Nittartagaq nutaamik pilersitsiniarneq unittoormat siorna matuneqarpoq, tamannalu pissutigalugu taamanikkut naalakkersuisuusoq Bentiaraq Ottosen Naalakkersuisuni ilaasortaajunnaarpoq.

Tamanna nittartagaq nutaaq Inatsisartut Aningaasaqarnermut Akileraartarnermullu Ataatsimiititaliaanit akuerineqaqqaarani aallartinneqarmat pivoq.

Sulisussarsiorneq pillugu nittartagaq nutaaq, sulisussarsiorluni ussassaaruteqarneq tusagassiivimmut suliffeqarfinnullu allanut pingaarutilittut isertitaqarfiummat inuussutissarsiortunit, ilaatigut Sermitsiami pisortamit Masaana Egedemit, isornartorsiorneqarpoq.

Pisortaq: Tamat naalakkersueqataanerat sanngiillisinneqassaaq

Pisortat sulisussarsiorfiat nutaaq niuerfimmi namminersortunut toqqaannartumik unammillissasoq ernummatigineqarpoq, Suli.gl-illu pilerseqqinneqarnera Masaana Egedep iluarinngilaa.

- Naalakkersuisut tamat naalakkersueqataanerannik namminersorlutillu inuussutissarsiortunik sanngiillisitsipput.

– Ernumagisimasagut mianersoqqussutigisimasavgllu piviusunngortippaat, Masaana Egede, suliffissarluni ussassaarinermit isertitat annaaneqarpata Sermitsiami soraarsitsisoqarsinnaasoq siornatigut mianersoqqussuteqartarsimasoq, oqarpoq.

Nittartagaq taanna ilinniartunut suliffeqarfinnik ilinniartuuteqarsinnaasunik ujaasinissamut ajornannginnerulersitsissasoq Naalakkersuisut tungaannit pingaartinneqartoq Masaana Egedep maluginiarpaa.

Sullitat annersaat unammillertiunerpaanngortoq

Sulisussarsiortarfik nutaaq sulisussarsiornermi ussassaarutinik nalinginnaasunik akeqanngitsumik ikkussisinnaanermut periarfissaqaaluppoq, Masaana Egedelu naapertorlugu maanna sullitat annersaat maanna suliaqarfimmi unammillertiunerpaanngorput.

– Sulisussarsiorneq suliffissarsiorfiillu suliffeqarfiit namminersortut arlallit inuussutigaat - aamma Sermitsiap, taanna oqarpoq nangillunilu:

- Neriuppunga politikerit partiinit tamaneersut tamanna eqqumaffigigaat. Taamaaliornermikkulli suut annaanerlugit sianiginngikkaat isumaqarpunga.

Sulisussarsiortarfiutilik: Sullitassaarutissaanga?

Suliffissat.gl-imik piginnittup Johannes Qvist-Markussenip pisortat sulisussarsiortarfiata ammarneqarnera aamma pakatsissutigeqaa:

- Akileraartartut aningaasaataannik unammillerneqarneq eqqunngitsuliorneruvoq.

- Sullitatta qanoq qisuariarnissaat ernummatigaara. Tassami sulisussarsiorfimmut akeqanngitsumut nuussagaluarpata aningaasarsiuutiginerpaasarput annaassavarput, Johannes Qvist-Markussen oqarpoq.

Ilinniartuuffinnik ujartuiffigineqarsinnaassasoq

Suli.gl-ip atuutilerseqqinneqarneranut atatillugu ilinniartuuffissanut suliffimmillu misiliiffissanut paasissutissanik nalunaarsuineq taanna aqqutigalugu ingerlanneqartartoq Naalakkersuisut erseqqissaapput.

Naalakkersuisut naapertorlugit suliffeqarfiit ilinniartunik suliffimmillu misiliisunik atorfinitsitsisimanertik nalunaarsuisinnaavaat, suliffinnillu ilinniarfiit suliffeqarfik ataaseq qanoq amerlatigisunik ilinniartoqarnissaminut akuerisaasimanersoq nalunaarsorsinnaavaat.

Ineriartornermik malinnaaffiusinnaavoq, taakku allapput:

„Inuusuttut amerlanerpaat sulilernissaat ilinniagaqalernissaallu Naalakkersuisut pingaartippaat. Taamaammat nittartagaq, inuusuttut ilinniarfinnik suliffinnillu misiliiffissanik inuttassarsiuussinissamut periarfissaqartitsisinnaasoq pilerseqqinneqarmat nuannaarutigeqaarput,“ Suliffeqarnermut Naalakkersuisoq Maritha Broberg oqarpoq.

Masaana Egedep isornartorsiuinera pillugu Sermitsiap Naalakkersuisut oqaaseqartinniarlugit sulissuteqarpoq.