Peter Borg qaleralittassiissutit pillugu: Aasianni suliffissat qulakkeerneqarnissaat aalisarnerullu siaruarnissaa pingaaruteqarpoq

Kalaallit Nunaata kitaani avataani qaleralittassiissutit pingajorarterutaannik immikkoortitsinikkut kiisalu Kitaani Tunumilu pisassiissutinik marlunnik neqeroortitsinermi, avataasiorluni aalisartut siammarterneqarnissaat, Aasiannilu suliffissanik qulakkeerinninnissaq, Naalakkersuisunit siunertarineqarpoq.

Aalisarnermut, piniarnermut, nunalerinermut imminut pilersornermullu naalakkersuisup peter borgip sermitsiamut allakkatigut akissutimini erseqqissarpaa.

Aalisartorsuup umiarsuaatileqatigiiffiullu Qaleraliup siulittaasuata Carl Christiansenip Naalakkersuisut pisassiissutinut neqeroortitsinerat pillugit isornartorsiuinera aalisarnermut naalakkersuisumut akissutisiniarlugu Sermitsiamit attaveqarfigaarput.

- Naalakkersuisut eqqarsarluariarlutik neqeroortitsinissamik tamarmiusumik atorunnaarsitsinissaat aaqqiissutissatsialaassaaq. Taarsiullugu neqeroortitsinerni marlunni qaleralittassat katillutik 4.937 tonsit ingerlatsisooreersunut Qaleralimmut, Royal Greenlandimut Polar Seafoodimut Siggummullu, pisassamik pingajorarterutaannik annaasaqartunut tunniunneqartariaqarput. Tamanna ukiumut pisassatut minnerpaamik 25 procentit Aasianni tunisassiorfimmut tulaatassarititaasutut ingerlanneqartariaqarlutik, Carl Christensen juulip qiteqqunnerani Sermitsiamut oqarpoq.

Suli aalajangiisoqanngilaq

Aalisarnermik inuussutissarsiortunik nutaanik (Naalakkersuisuniit), pisassiissutillu amerlanerusunut siammarterneqarnissaannut kissaateqartoqartillugu inuussutissarsiortunut pioreersunut avataani qaleralittassiissutit pingajorarterutaat pisassiissutigissallugit naapertuutinngitsoq Peter Borgip ilaatigut akissutigaa.

– Aamma erseqqissaatigissavarput pisassiissutinut neqeroortitsinermi siumoortumik aalajangertoqarnikuunnginnera. Pisassiissutinut neqeroortitsinermi 1-imi aamma 2-mi qinnuteqarnermi piumasaqaatinik naammassinnittoqarnersoq aallaavigineqassaaq.

– Pisassiissutinut neqeroorut 2-mi piginnittut amerlassusaat aamma Aasianni tunisassiornermut pilersaarutit, tassunga ilanngullugu ukiumut suliffissat qassiuneri, nalilersorneqassapput. Tassa imaappoq, avataasiorluni aalisarnermi qaleralittaassiissutit 25 procentiisa tulaanneqartarnissaat tunngavigalugu ukiumut suliffissat qassiussanersut kisiisa aallaaviginagit, tunisassiornissamik pilersaarutit aamma tunisinissamik naatsorsuutit,Aasiannilu siunissaq ungasinnerusoq eqqarsaatigalugu ukiumut suliffissat qassiunissaat naatsorsuutigineqarnersoq aalajangiinermut tunngaviliisuussaaq.

– Naalakkersuisut Aasianni suliffissat amerlanerpaat qulakkeerneqarnissaat kissaatigaat. Qanoq pitsaanerpaamik tamanna anguneqarsinnaanersoq qinnuteqartut namminneq aalajangertussaavaat. Neqerooritini tamarmik allassimappiut, qinnuteqaatillu nalilersorneqarnerannilu Naalakkersuisunit isiginiarneqassallutik, naalakkersuisoq Peter Borg allappoq.

Aasiaat Trawl, Royal Greenlandimit pigaarnertut piginneqataaffigineqartoq, qaleralittassinneqassappat Aasianni tunisassiorfimmut 25 procentit tulaanneqartussaatitaanerat Polarimiit pineqassanersut suli nalunarpoq.

- Polar Raajat Aasiaat Trawl-imut Royal Greenlandimulluunniit Aasiannut tunisisarnissaq pillugu isumaqatigiissuteqanngilaq. Aamma isumaqatigiissut taamaattoq oqaloqatigiissuteqarnikuunngilaq, Polar Seafood Greenlandimi tusagassiutilerinermut pisortaq Laila Friis-Salling oqarpoq.