Tasiilami aalisarneq ingerlalluartoq

Tasiilami Royal Greenland A/S-ip aalisakkeriviani nutaami, 2025-mi aasaq naalersoq atulersumi, unammillernartoqarpoq – aalisarnerli aallartimmat innuttaasut iluaqutigaat, politikeri misilittagaqarluartoq Justus Hansen Demokraatineersoq, Inatsisartunut aamma Kommuneqarfik Sermersuumi kommunalbestyrelsimut ilaasortaq, oqarpoq.

Taanna nammineerluni Tasiilameersuuvoq, paragraf 37-lu naapertorlugu Tasiilami aalisakkerivik ingerlalluarnersoq Naalakkersuisunut apeqqutigaa. Tamatumunnga atatillugu aalisakkeriviup nillataartitsivianut qerititsivianullu CO2-mik atuisunut tunngatillugu aasakkut marloriarluni unittoortoqarsimasoq Royal Greenland A/S ilisimatitsivoq.

Suliffeqarfik naapertorlugu tamanna ilaatigut qerititsiviup atorneqarsinnaaneranut taamaalillunilu qerititsisinnaassusaanut sunniuteqarpoq.

- Qerititsivik pisariaqartitamik ingerlasinnaanngikkaangat aalisakkerivik aalisakkanik kissaatigisatut amerlatigisunik tigusisinnaaneranut qerititsisinnaaneranullu killeqartitsisarpoq.

- Taamaammat unittoornerit piffissani eqqugaasuni tunsisinnaanermut toqqaannartumik sunniuteqarsinnaapput, Royal Greenland ilisimatitsivoq, kiisalu ajoqutaasoqarnersoq misissortuarlugulu atortorissaarutit ingerlaannaq iluarsaanneqartartut ilanngullugulu erseqqissarpaa.

Qerititsivik maanna atuuttoq Tasiilami pissutsinut naleqqunnersoq Justus Hansenip aamma paaserusuppaa, tamatumunngalu tunngatillugu Aalisarnermut, Piniarnermut, Nunalerinermut Imminut Pilersornermullu Naalakkersuisup Peter Borgip Demokraatineersup Royal Greenlandip akissutaa innersuussutigaa, tassanilu CO2-mik atuineq qerititsiviup pilersinneqarnerani teknikkikkut nalilersuineq tamakkiisumik tunngavigalugu toqqarneqarsimasoq allassimavoq.

Royal Greenland naapertorlugu CO2-mik qerititseriaaseq ilaatigut nillusaangaatsiarsinnaallunilu assersuutigalugu ammoniakimik pilersitsinermut sanilliullugu suliarineqartariaqannginneruvoq. Royal Greenlandilu naapertorluugu CO2-mik atuineq ikuallattoqaratarsinnaaneranut aarlerineqartoqaranilu ammoniakitulli ulorianartoqanngilaq.

- CO2-mik atuinerup nillataartitsivik qerititsivillu ataaseq inissami killeqartumi aamma ataatsimoortissinnaalerpai, Royal Greenland ilisimatitsivoq.

Royal Greenland naapertorlugu qerititsivik Danmarkimit aqunneqanngilaq. Kisiannili ilaatigut ajoquteqannginneranik paasiniaanissaq teknikkikkullu ikiorsiineq siunertaralugu elektroniskiusumik Danmarkimiit attavigineqarsinnaavoq, taamaalillunilu immikkoortunik aalajangersimasunik kingoraartissanik pisariaqartitsisoqarnersoq paasineqariaannaavoq, Justus Hansenimut akissummi ilaatigut allassimavoq.

Taamatuttaaq atortorissaarutinut kingoraartissat nalinginnaasut Tasiilami aalisakkerivimmi pissarsiarineqarsinnaasut Royal Greenland ilisimatitsivoq, atortorissaarutilli tamarmik Tasiilami toqqorsivinniitinnissaat atoriaannaananilu aningaasatigut ajornakusoortoq erseqqissarpaa, taamaammallu atortussat immikkut ittut pisariaqartitsineq naapertorlugu pissarsiarineqartariaqarput.   

Aalisarnermi atugassarititaasut pitsaanerusut

Naalakkersuisut Tasiilami ingerlatseqqinnerulernissaq tunitsiviliornerullu patajaallisinneqarnissaa qulakkeerniarlugu Royal Greenlandimik oqaloqateqarniarlutik pilersaaruteqarnersut Justus Hansenip aamma paaserusuppaa.

Tunitsiviilli patajaatsumik ingerlatsinissaq namminneq akisussaaffigaat, Peter Borg ilisimatitsivoq.

- Naalakkersuisut Tunumi sinerissap qanittuani aalisarnermi atugassarititaasut Tunumi Aalisarnermut Ineriartortitsinermut Pilersaarut 2024-miit 2030-mut atuuttoq naapertorlugu pitsaanerulersinnissaat sulissutigaat.

- Tunisat 2022-mit 82 procentimik amerleriarsimasut 2025-mut nalunaarusiami kingullermi takuneqarsinnaavoq, taamaalillunilu 2030-mut ineriartortitsinissamut pilersaarutip anguniagai qaangerneqareersimapput.

- Tasiilami aalisakkerivimmik ammaaneq aalisartut tunitsivigisinnaasaannik annertusaanikkut Ineriartortitsinissamut Pilersaarummi anguniakkat angunissaannut iluaqutaangaassaaq, Aalisarnermut Naalakkersuisoq oqarpoq.

Aalisakkeriviit qerititsivik sorleq pitsaanerpaanersoq namminneq aalajangertariaqaraat Peter Borg ilisimatitsivoq.   

Naammagisimaarinninneq tulluusimaarutiginninnerlu

Tasiilami aalisakkerivik unammilligassaqarsimagaluartoq aalisarnerup siunissaa Justus Hansenip isumalluarfigaa.

- Ukiuni kingullerni umiatsiaararsortut - aamma inuusunnerit - amerliartuinnartut takusinnaavagut. Tasiilami eqqaanilu piniartuuneq aalisartuunermut malunnartumik ikaarsaarsimasoq takuarput.

- Aningaasat amerlanerusut inuuniarnermi atugassarititaasunik pitsaanerusunik kinguneqartarput. Inuiaqatigiit aningaasaqarnerat siuarlunilu pisisinnaassuseq annertusiartorpoq. Taamaalilluni Tunumi aalisarneq kivineqarsinnaasoq aningaaserivinnut takutinneqassaaq, tamannalu aalisartut tulluusimaarutigaat.

- Suliffissaaleqisut amerlammata neriuutigaara inuusuttorpassuit aalisartunngussasut, taanna oqarpoq.

Tunumi aalisarnerup ineriartortinneqarnissaanut periarfissaqarluartoq Justus Hansen isumaqarpoq. Saarulliit kisiisa pinnagit, aammali aalisakkat allat soorlu suluppaakkat, qalerallit il.il. tunisassiarineqarsinnaapput. Aamma aalisakkerivimmi sulisut tunisassiorfimmut tunisisoqartuaannarmat suliaqarnertik naammagisimaarluarpaat.

Nuannaarutigigaa

Justus Hansenip, Kommuneqarfik Sermersuumi kommunalbestyrelsimut Inatsisartunullu qinigaasup Tunumi inuussutissarsiornerup ineriartortinneqarneranut peqataasup, ineriartorneq nuannaarutigaa.

- Tasiilami eqqaanilu maanna ineriartorneq takugaangakku qungujulasarpunga.

- Siunissamut neriuutissaqarpoq, Tasiilamilu aalisarnermik inuussutissarsiuteqaleqqaarnermi aalisakkeriviullu pilersinneqarnerani aalajangeeqataasimanera tulluusimaarutigeqaara, taanna oqarpoq.

Tasiilami aalisakkerivik inunnik arfineq-pingasut missaanniittunik sulisulik ullormut 10 tonsinik tunisassiorsinnaallunilu 500 tonsinik qerititsisinnaavoq.