Pilersaarut: Eqalussuit 1000-t nungutinneqassapput
Eqalussuit avannaani aalisarnermut ima ajoqutaatigilersimapput, politikerit – akiliilluni – eqalussuit amerlassusai aqunniarlugit iliuuseqartorqarnissaanik suliniuteqartariaqalersimasut, Sulili isumaqatigiissutigineqanngilaq aningaasat suminngaanniit aaneqassanersut.
Eqalussuaq Kalaallit Nunaanni tamarmi nalinginnaavoq. Pinngortitaleriffik naapertorlugu 400 aamma 700 meterit akornanni ititigisumi pisarineqartarluni. Eqalussuaq immap qaavaniit kilumiitterinik pingasunit itissusilimmi nassaassaasarpoq.
Assi toqqorsivimmiit: Henrik Carl/ Statens Naturhistor/Ritzau Scanpix
Ukiut 20-t matuma siorna aalisartut eqalussuit amerlassusaat aqunniarlugu, eqalussuarnik pisaqartillugit akilerneqartarput.
Aalisartut eqalussuup niaquanik uummammiunilluunniit uppernarsaatissaminnik kommunimut tunniussigaangamik 100 koruuninik akissarsisinneqartarput.
Eqalussuit ima amerlatigilersimapput aalisarnermut ajornartorsiutinngorsimallutik, siunnersuutigineqarporlu aningaasat immikkut ittut immap naqqanik eqqiaanermut atorneqartussat aalisarnermi atortut annaaneqartut nassaarinissaannut illuartinneqarsimasut eqalussuarniarnermut aningaasaliissutigineqassasut.
Eqalussuaq ataaseq 300 koruunilerlugu
2026-mi aalisariutit annaaneqartut katersorneqarnissaannut 850.000 koruunit immikkoortinneqarsimapput, aningaasallu taakku putusiorneqarput, pilersaarutigineqarpormi eqalussuarnik 1.000-inik pisaqartoqarnissaa, kommunalbestyrelsip ataatsimiinnissaa sioqqullugu suliamik saqqummiussinermi tamanna atuarneqarsinnaavoq.
Aningaasaqarnermut ataatsimiititaliami siunnersuutigineqarpoq eqalussuaq ataaseq 300 krouunilerlugu akilerneqartassasoq. Tassa aningaasartuutissat 300.000 koruuniusinnaapput.
Ikinnerussuteqartut, tassa IA-p, Atassutip Demokraatillu, immap naqqanik mingutsitsinnginnerunissaq ajornerulersitsinissarlu akerleraat.
Neqi toqunartoq
Suliaq kommunalbestyrelsimi tamarmiusumi februaarip 13-ianni oqaluuserineqassaaq, tassanilu Siumut Nalerarlu amerlanerussuteqarluarput.
Eqalussuaq 6-7 meterisut takissuseqarsinnaavoq 1,5 tonsillu missaanik oqimaassuseqarluni. Eqalussuup nerpia nutaaq toqunartoqarpoq urea-qarpallaarnera pissutigalugu. Nerpilli immikkut ittumik panertinneqaraangat toqunartortaa kaanngartinneqartarpoq.
