Pisiffiup imigassat aalakoornartortallit aviisini neqeroorutiniitsissaarniarai 

Pisiffiup aviisit neqeroorutai ukiortaamiit qupperarukkit imigassat aalakoornartortallit takussaajunnaarsimassapput. 

Pisiffik imigassamik tuniniaanermini 2021-mili assigiinngitsunik suliniuteqarpoq, ilaatigut imigassat aalakoornartortallit immikkoortinneqarnikuupput, imigassanillu annertuumik pisinermi immikkut neqerooruteqartoqassaarnikuulluni. Taamaaliortoqarpoq imigassanik tuniniaaqqittartunut pinaveersaartitsiniarluni. 

AAMMA ATUARUK 

Brugsenip aamma Pisiffiup imigassanik aalakoortartortalinnik tuniniaasarnerminni allannguinertik iluatsilluaraat

Imigassattaaq nunatsinni pisiniarfissuit allat peqatigalugit arfininngornikkut ulloqeqqanut aatsaat tuniniartalernikuuaat. Maannalu imigassat ukiortaamiit aviisini neqeroorutiniitsissaarniarlugit misiliisussanngorput. 

– Imigassamik atuinermi nuannisarnerup inissaqartinneqarnissaa, atornerluinerup annikinnerulernissaa kiisalu inunnut ataasiakkaanut, ilaqutariinnut inuiaqatigiinnullu kingunerisartagaasa ikinnerulernissaat kissaatigaarput. Taamaattumik imigassanik aalakoornartortalinnik tuniniaanitsinni ussassaarinitsinnilu nammineq suut allanngortissinnaanerivut ingerlaavartumik nalilersortarpavut, Pisiffimmi pisortaaneq, Per Steen Larsen oqarpoq.

Imigassat tunineqartut appariarujussuartut 

Pisiffiup Brugsenillu imigassanik aalakoornartortalinnik 2021-miit 2025-mut tunisaat ataatsimut liiterinngorlugit 37 procentimik appariarput. Ukioq manna 12–14 procentit missaannik suli appariaateqarneranik nalunaarsuisoqarpoq.

Nunatsinni imigassartoriaatsip peqqinnarnerulernissaanut Pisiffiup suliniuteqarnera tamaanga killissanngilaq. 

– Imigassat aalakoornartortallit neqeroorutinut aviisinit peerneqarnerisa kingorna tuniniaanerup qanoq ineriartornera malinnaaffigissavarput. Suliniutinik amerlanerusunik piareersaqarpugut, misileraanermillu misilittakkavut suleriaqqinnissatsinni atussavavut, Pisiffimmi nittarsaassinermut, attaveqaqatigiinnermut CSR-imullu pisortaq, Tina Alibina Hansen oqarpoq.