PNNP pillugu paasissutissiineq annertusineqartoq

Namminersorlutik Oqartussani Aalisarnermut, Piniarnermut Nunalerinermullu Naalakkersuisoqarfiup paasissutissaatai naapertorlugit umiatsiaararsortut 2016-imi 1.836-usut 2024-mi 1.983-iupput. Taakkualu ilarpassui ukioq manna aalisarnermut inatsit nutaaq atuutilermat Pisassaatit Niuerutigineqarsinnaasunut Nammineq Pigisat, PNNP, atorlugu aalisartalerput.

Tamatumunnga atatillugu aalisartorpassuit malittarisassat nutaat, ilaatigut PNNP-mut tunngasut, atulerpaat, pissutsillu nutaat aalisartunit paatsuungassutigineqartarsimasut KNAPK-miit oqaatigineqarpoq. Naalakkersuisoqarfiup pineqartup paasissutissiinera naapertorlugu PNNP pillugu paasisitsiniaanerit ukiarmili ingerlanneqartut nangillugit piffissami aggersumi paasititsiniaanerit annertunerusumik ingerlanneqassapput.

Nalunaarusiat saqqummiunneqartut

Umiatsiaararsorluni aalisarnermi ineriartorneq pillugu nalunaarusiaq 2016 – 2024 qanittumi Naalakkersuisunit saqqummiunneqarpoq, tassanilu politikkikkut aalajangiisartunut paasissutissanik tunniussaqartarnissaq siunertaavoq, kiisalu sinerissap qanittuani umiatsiaararsorluni aalisarnerup ukiuni kingullerni annertuumik ineriartorfiusimasup siunissami nalilersuiffigineqarnissaanut nalunaarusiap atorneqarnissaa kissaatigineqarpoq.

Nalunaarusiaq ukiut tallimat qaangiukkaangata nutarterneqartassasoq Aalisarnermut, Piniarnermut Nunalerinermullu Naalakkersuisoq Peter Borg, Demokraatit, ilisimatitsivoq. Tassanilu ilaatigut umiatsiaararsorlutik sinerissap qanittuani aalisartut sinerissami tunitsivinnut assigiinngitsunut tunisassiorsimasut ilaatigut sammineqartassapput.

Aalisarnermut inatsisip nutaap atuutilernerata kingorna Aalisarnermi ukiumut nalunaarusiaq 2024 Naalakkersuisut qanittukkut aamma saqqummiuppaat.

Aalisarnermik aqutsinermi ineriartorneq, ilaatigut aqutsinermut pilersaarutinik inatsisinillu suliaqarneq, aningaasaqarnerup ineriartornera, nunat tamalaat akornanni aalisarneq pillugu suleqatigiinneq isumaqatigiinniarnerillu kiisalu aalisarnermik nakkutilliineq nalunaarusiami sammineqarput.

Nunap inuussutissarsiutaanik pingaarnerpaamik ingerlatsinerup Inatsisartuni oqallisiginissaa pingaartinneqarmat, Naalakkersuisut ukiumoortumik nalunaarusiap Inatsisartuni suliarineqartarnissaa kissaatigigaat, ukiumoortumik nalunaarusiami ilaatigut allassimavoq.

Nunatsinni inuussutissarsiutip annersaata qanoq aqunneqarnera ineriartorneralu pillugit ersisitsinissaq nalunaarusiami siunertaavoq, taannalu Inatsisartuni eqqartorneqarnissaa aamma siunertaalluni.

Aalisarnermi ineriartorneq sukkasuumik ingerlasoq pissutigalugu Naalakkersuisut PNNP pillugu paasissutissiineq maanna ingerlanneqartoq naleqqussaanertalimmik ingerlatiinnarniarpaat, taamaalilluni aalisartut PNNP naapertorlugu aalisarneq pillugu pitsaasumik paasissutissinneqarnissaat qulakkeerniarneqarluni.

Taamaattumik aappaagu ukiup nikinneranit PNNP-mut akuersissutit tunniunneqarnerannut atatillugu paasissutissat tassunga tunngassutillit tunniunneqartarnissaat aamma siunertaavoq.

Paasititsiniaanermut atatillugu umiatsiaararsortunut attuumassuteqartut pingaarnerit Naalakkersuisut sammissavaat.

Akuersissutinik tunniussineq

Aalisartoq PNNP-mut ikaarsaarsimasoq aalisagaqatigiinnut aalajangersimasunut PNNP-qarfigisaminut akuersissutinik ukiut tamaasa qinnuteqartarunnaassaaq.

Naalakkersuisut ukiup tullianut pisassiissutinik aalajangersaareeraangata, pisassiissutinit pigisat tunngavigalugit pisassat naatsorsorneqartassapput. Kingorna ukiumut pisassiissutinit pigisanut pisassannullu ukiup tullianut akuersissummik nutaamik ingerlaannartumik nassiussisoqartassaaq. Ukioq naatinnagu 2026-mut akuersissummik pissarsinissaq naatsorsuutigineqassasoq naalakkersuisoqarfik paasissutissiivoq.

Pisassiissutinik nuussineq

Aalisartoq 2025-mi pisassanit pisarinngitsuugaqarsimaguni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup 2025-mut pisassanit pisarineqartut januaarip ingerlanerani tamakkiisumik takusinnaalerpagit, pisassanit pisarinngitsuukkat 25 procentii 2026-mut nuussavai.

Taassumap kingorna akuersissut pisassanik 2025-miit nuunneqartunik nutartersimasoq nassiunneqassaaq. 31. decembar 2026-p tungaanut pisassat taakku pisarinissaanut aalisartoq periarfissaqarpoq. Ukiumut pisassat annerpaamik 25 procentii ukiup tullianut nuunneqarsinnaapput. Pisassanit pisarinngitsuukkat 25 procentimiit amerlaneruppata, pisassat sinneruttut 25 procentiinit amerlanerusut ukiumut nutaamut nuunneqartunut ilaatinneqassanngillat.

- Taamaattumik 31. decembar nallertinnagu pisassat 75 procentii aalisarsimassanagit takusinnaagaanni, pisassat ilaasa tuniniarnissaat isumassarsiatsialaasinnaavoq.

- Tamanna aalisartunut 2025-mi PNNP-qarsimasunut taamaallaat atuuppoq. Aalisartoq PNNP-t aallaavigalugit 2026-mi januaarip aallaqqaataani aatsaat aalisalertoq pisassiissutinik nuussisinnaanngilaq. Tamanna aatsaat 2027-mi januarimi pisinnaavoq, naalakkersuisoqarfik paasissutissiivoq.

Pisassanik pisineq pisassanillu pigisanik tuniniaaneq

Aalisartoq ukiumi pisassarukkuni, pisassat amerlinissaannut marlunnik periarfissaqarpoq. Pisassanik (ukiumut pisassiissutinik) amerlanerusunik, ukiumi pisassiisuutaasunik pisisoqarsinnaavoq – tamanna pisassiissutinit pigisannut allannguissanngilaq. Aappaattut aalisartup allap pisassai pisiarineqarsinnaapput. Pisassiissutinit pigisanut taakkununnga ukiumut pisassiissutit ilaassapput, taakkulu siunissami aalisarneqarsinnaapput. Pisassiissutit pigisat aalisartup pisiffigineqartup ukiumut pisassani aalisareersimanerai apeqqutaapput, naalakkersuisoqarfik paasissutissiivoq.

- Paarlattuanik soorlu assersuutigalugu aalisartoq napparsimasimappat, umiiarsimappat allatulluunniit pisassat tamakkerlugit aalisarneqarsinnaasimanngippata, ukiut tamaasa ukiumut pisassat 10 procentii tuniniarneqarsinnaapput.

- Immikkulli ittumik pisuni, soorlu teknikikkut, aningaasaqarnikkut niuernikkulluunniit tunngasunik pissuteqarluni ukiumi pisassarisat 10 procentii sinnerlugit tuniniarnissaannut immikkut akuersissuteqartoqarsinnaavoq, naalakkersuisoqarfik paasissutissiivoq.

Soorlu assersuutigalugu aalisarsinnaasat sipporlugit aalisartoq pisaqarsimaguni taamaattumillu 75 procentinik atuisussaatitaanermik naammassinnissinnaanngikkuni, imaluunniit soraarninngorusukkuni, pisassiissutinit pigisat ilai tamakkerlugilluunniit tuniniarneqarsinnaapput.

- Taamaappat pisassiissutinit pigisavit ilai tamakkerlugilluunniit aamma tuniniarsinnaavatit. Pisassiissutinit pigisanik taamatut tunisaqarneq siunissami pisassannut sunniuteqassaaq, tassami tunisat uterteqqinneqarsinnaassanngillat, naalakkersuisoqarfik paasissutissiivoq.

75 procentimik atuisussaatitaaneq

Aalisartoq pisassiissutinik peqaruni atornissaannut aamma pisussaaffeqarpoq. Taamaattumik PNNP-mik aalisarnernut 75 procentinik atuisussaatitaaneq eqqunneqarnikuuvoq, tamatumalu kingunerisaanik ukiut tamaasa ukiumut pisassat minnerpaamik 75 procentii aalisartup pisarisussaavai. Pisassat 75 procentii ukiut pingajussaannik atorsinnaanagit ilimasuuteqaraanni pisassiissutinit pigisat naleqqussarneqassapput. Naleqqussaasoqanngippat Naalakkersuisut pisassiissutinit pigisat atorsinnaanngisat utertittussaassavaat allanullu atuisinnaasumut neqeroorutigalugit. Aalisarnikkut pisinnaasanut pisassiissutinit pigisanik naleqqussaanissaq malittarisassami uani siunertarineqarpoq, taamaalilluni pisassaqarpallaartut pisassaminnik amigaatilinnut tuniniaasartussaasut, taamaalillunilu pisassiissutit ukiut tamaasa sapinngisamik atorneqartarnissaat paasissutissiissutigineqarpoq.

- Ukiunili tulleriinni pingasuni 75 procentit aalisarneqarsimanngippata, tamanna aatsaat atuutilertarmat erseqqissassallugu pingaaruteqarpoq. Soorlu ukiuni tulleriinni marlunni 75 procentit atorneqarsinnaasimanngippata, ukiulli pingajuanni 75 procentit amerlanerusulluunniit atorsimagaanni pisassarisimasat utertinneqarsinnaassanngillat, naalakkersuisoqarfik paasissutissiivoq.

Kisiannili soorlu napparsimaneq, umiiarsimaneq sivisuumilluunniit amutsivimmiisitsisimaneq pissutigalugit ukiuni tulleriinni pingasuni 75 procentinik aalisarsinnaasimanngikkaanni inatsit pisassiissutinik annaasaqannginnissamik qulakkeerinnittumik naleqqussaasinnaanermut periarfissaqartitsivoq.

Iliuuseqartoqarnissaa pisariaqarsimasoq

Sinerissap qanittuani aalisartorpassuarnut atugassarititaasut nutaat pillugit paasissutissiisoqartarnissaa kattuffimmiit ujartornetarsimasoq, KNAPK-mi siulittaasunngorlaaq Pele Blytmann oqarpoq.

- Aalisarnermut inatsit atuutilersinneqarmat naammattumik paasissutissiisoqarsimanngilaq, tamannalu pissutigalugu aalisartorpassuit nalorninartorsiorput, taanna oqarpoq.

Taamaattumik naalakkersuisoqarfiup paasissutissanik pisariaqartinneqartunik, pingaartumik umiatsiaararsorlutik aalisartunut, siaruarteriniarluni suliniuteqarnera Pele Blytmannip nuannaarutigaa.