Polar Seafoodip neqinik tunisassiornera kaaviiaartitanut iluanaarutaasoq

Altas Food A/S Jyllandip avannaani Nørresundbymi allaffeqarfeqartoq, niuernermi suliffeqarfittut ilisarisimaneqanngitsutut aallartittoq, siuariartorpoq.

Ingerlatseqatigiiffik taanna ingerlatseqatigiiffissuarmit Polar Seafood Denmarkimit pigineqarpoq.

Altas Food nunat tamalaat akornanni neqinik pisisartut akunnattumik angissuseqartut ilaattut taaneqarsinnaavoq. Nunarsuaq tamakkerlugu inuussutissanik pisineq tuniniaanerlu — Europamiit Afrikamut Asiallu kangisissuanut nerisassanik niuerneq periarfissanik nutaanik ammaavoq.

Polar Seafood Denmarkip aalisakkanik qalerualinnillu tunisassiaqarnera, maannalu aamma suliffeqarfiutaa Altas Foodimiit neqinik tunisassiornera, suliffeqarfissuup milliardilikkaanik kaaviiaartitaqarneranut annertunerulersitsivoq.

Nersussuup puulukillu neqaannik qerisunik niuerneq siuariartorpoq. Ingerlatseqatigiiffik aamma naatitanik, kukkukuuaqqanik tunisassiarineqartunik, aalisakkanik immunnillu nioqqutissianik pisisarlunilu tuniniaasarpoq.

Kaaviiaartitat 800 millionit koruunit missaanniittut

- Nunani tamalaani niuerfissuartut ineriartorsimavoq, 800 millionit koruunit missaannik siorna kaaviiaartitaqarpoq, Atlas Foodimi siulersuisuni siulittaasoq aamma Polar Seafood Denmarkimi pisortaaneq Henrik Leth oqarpoq.

Polar Seafood Denmark Nørresundbyp eqqaani Vodskovimiittoq 4,7 milliardit koruuninik 2025-mi kaaviiaartitaqarpoq, 2024-mi 4,2 milliardit koruuninik kaaviiaartitaqarluni. Akileraarutit ilanngaatigereerlugit sinneqartoorutit siorna 172 millionit koruuniupput.

Henrik Lethip Polar Seafood Denmarkip aalisakkanik qalerualinnillu tunisassiornerup saniatigut allanik niuernikkut suliaqalersimanera nuannaarutigaa. Atlas Food suliniutinik allanik misiliinikkut aallartinneqartoq iluatsilluartutut oqaatigineqarsinnaavoq.

- Atlas Food ingerlatseqatigiiffinni pigisatta annersaraat, Polar Seafood Denmarkimilu kaaviiaartitanut tamarmiusunut sunniuteqarluartarpoq, oqarpoq.

Polar Seafood Greenlandip Kalaallit Nunaanni ukiualuit matuma siornatigut pisassiissutinik annaasaqarnerata kingorna, Polar Seafood Denmarkip Atlas Food ineriartortittariaqalersimagaa taanna nassuiaavoq.

- Alisakkanik raajanillu pisassiissutit ikiliartortillugit sunnertingaatsiarsinnaaneq pinaveersaartinniarlugu, aningaasanik isaasitsiviusinnaasunik allanik ujartuisariaqarsimavugut, Henrik Leth oqarpoq.

Isumassarsisut pingasut

Atlas Foodimi pisortap Jesper Hyldig Nielsenip, suleqatinilu Anders Grønnebæk Thomas Raskilu niuernermik ingerlatseqatigiiffik isumassarsiaraat.

Taakkua Polar Seafood Denmarkimik piginnittuusimasut marluk, Helge Nielsen aamma Bent Norman Petersen, suliffeqarfissuup immikkoortortaqarfianik nutaamik pilersitsinissamut suliniummi akuersitippaat. Atlas Food ukiumut naatsorsuutai siulliit 2020-meersuupput.

- Polar Seafood Denmarkimi aqutsisuunikunut isumassarsiarput anngupparput, akuersippullu, Jesper Hyldig Nielsen oqarpoq.

Nørresundbymi allaffimmi sulisut 2020-mi pingasuinnaasut maanna aqutsisut ilanngullugit 23-upput.

Thomas Rask tuniniaanermut pisortaavoq, Anders Grønnebækkilu allani aqutsisuuffeqarluni. Suliniummik aallartitsisut pingasut katillugit 49 procentinik piginneqataapput, Polar Seafood Denmarkillu 51 procenti piginneqataaffigalugu.

- Københavnimi allaffimmik 2025-mi ammaanitta kingorna, kaaviiaartitavut suliavullu amerliartorput, Jesper Hyldig Nielsen oqarpoq.

Ingerlatseqatigiiffik 2025-mi ingerlatsinermi sinneqartoorutai 21 millionit koruuniupput, sinneqartoorutit ukiup siuliani 13 millionit koruuniullutik.

Kina aamma Kangia Qiterleq pallitsaalineqarpoq

Puulukip nersussuullu neqaa Europami, USA-mi, Canadami, Brasiliami Argentinamilu Atlas Foodimit pisiarineqartarput.

- Europami Amerikamilu Kujallermi neqinik amerlasuunik pisisarpugut. Amerlanerilli Kangiani Avannarlermi Afrikamilu pisiarisarlugit. Filippinerini, Malaysiami, Vietnamimi, Singaporimi, Korea Kujallermi aamma Malaysiami pitsaasumik niueqateqarpugut.

- Aamma Afrikap Kitaani Kangianilu, ingammik Ghanami Senegalimilu, tunisaqarluarpugut. Kinamili Kangianilu Qiterlermi niuernissarput pakkersimaarparput, Jesper Hyldig Nielsen oqarpoq.

Polar Seafood Denmark kalaallinit tamakkiisumik pigilerneqarnissaa siusinnerusukkut eqqartorneqarpoq. Polar Seafood Greenland kalaallinit Miki Brønsimit, Bent aamma Laila Sallingimit pigineqartoq qaammammi matumani siusinnerusukkut oqaluttuarineqareersutut Islandimi aalisarnermik ingerlatsiviup Brim hf-ip danskit suliffeqarfiutaata 50 procentianik pisinissamut piumasaqaatinik isumaqatigiissuteqarput.

925 millionit koruuneerluni pisisoqarpoq. Polar Seafood Greenlandip Polar Seafood Denmarkip affaa piginneqataaffigaa.