Qaartitseqqaarneq: Nuummi talittarfiup ilassutissaa kiisami sanaartorneqarluni aallartissinnaalerpoq

Nuummi talittarfiup ilassutissaa 350 meterisut takitigisoq novembarimi 2028-mi piareertussaq kiisami aallartisarneqalerpoq. Kilisaatit, illersornissaqarfiup allallu talittarfissaat sanaartussallugu marlunngornermi ualikkut qaartitserngaartoqarmat najuuppugut.

Attaveqaasersuutinut naalakkersuisoq Iddimanngiiu Jensen Bianco KJ Greenlandimi qaartiterinermut pisortamit ikiorneqarluni talittarfiup allissutissaanik qaartitserngaarpoq.

Assiliisoq: Arnaq Nielsen

Arnaq Nielsen Arnaq Nielsen tusagassiortoq

Saqqummersinneqarpoq 8. Juuli 2026 - 09:30

Nuummi talittarfittaap ilassutissaanut suliariumannittussarsiorneq piffissami sivisuumi pivoq. Siullermeerluni 2024-mi suliariumannittussarsiuussisoqarmat neqeroortut akisuallaartumik neqeroornerat peqqutigalugu suliariumannittussarsiuussineq unitsinneqarallarpoq.

Suliariumannittussallu KJ Greenlandikkut ukioq apriilimi saqqummiunneqareersullu ullumi marlunngornermi qaartitserngaartoqarpoq. Talittarfissap ilassutissaa qaarteqqaarneqarmat Nuuk silaginnerusinnaanngilaq.

Ussassaarut

Talittarfittaap ilassutissaa Qeqertaq Avallermiittup sanaartorneqarnissaanut qaartitserngaartoqalinnginnerani Sikuki Nuuk Harbourimi pisortaq John Rasmussen oqalugiarpoq.

Mianersortunnguamik qaartitseqqaartoqarpoq. Qaartitserngaarnermi imaq annikitsuinnarmik serpartoq assip qeqqata nalaani takuneqarsinnaavoq. Talittarfiup ilassutissaa qanoq isikkoqarnersoq allaaserisap naqqani takusinnaavat.

- Sanaartugaq novembarimi 2028-mi piareerpat Nuuk illoqarfimmut naleqquttumik umiarsualiveqalissaaq, John Rasmussen taama ilaatigut oqalugiummini oqaaseqarpoq.

Talittarfiullu ilaneqarnissaa pisariaqartinneqaqaaq. Ilassutissaa katillugu 350 meteriuvoq. 200 meterit kilisaatit talittarfigissavaat, 150 meterillu allanit atorneqarsinnaassapput, illersornissaqarfiulli umiarsui talinnissaminnut siullertut pisinnaatitaaffeqassallutik.

Qaartitserngaarnermi najuuttut ilagaat Polar Seafoodimi piginneqataallunilu pisortaaneq Bent Salling.

Sikuki Harbourimi pisortaq John Rasmussen qaartitseqqaartoqarnerani nuannaarpaseqaluni tikilluaqqusivoq.

- Nunatsinni ineriartortitsinermut isumaqartorujussuuvoq. Naalakkersuisut iliuuseqarnerat taanna nunatsinnut tamanut qujarunnarpoq. Aamma neriunnarpoq nunap sinneranut iluaqutaalluarumaartoq, Bent Salling oqarpoq.

Talittarfiup ilassutissaata ilarujussua kilisaatinut atugassiaammat iluarisimaarpaa. Nuummimi talittarfitoqaq takornariartaatinut kilisaatinullu talittarfiusoq ilaanni pagganneqalertarami tattoqisaaffiulertarpoq.

KJ Greenlandimi siulersuisuni siulittaasoq Karl Jensen Polar Seafoodimilu piginneqataallunilu pisortaanerusoq Bent Salling qaartitserngaarnerup kingorna eqqartugassaaleqinngillat.

- Uagut pisariaqartittaratsigu aalisarneq naapertorlugu ulikkaarnermi tulakkiartorsinnaanissaq. Siumut pilersaarusiorujussuanngikkaluarluni, kisianni aalisarneq naapertorlugu tulakkiartupallassinnaanissaq. Sukkasuumillu niuseriarluni aallaqqipallassinnaanissaq, Bent Salling oqarpoq.

Attaveqaasersuutinut naalakkersuisoq Iddimanngiiu Jensen Bianco talittarfiup ilassutissaa isumalluarfigalugu oqalugiummini ilaatigut taavaa.

Kommuneqarfik Sermersuumi borgmesteri Avaaraq Olsen oqalugiartumut malinnaalluarpoq.

- Maanna qaammatit ukiullu ingerlanerani pilersaarusiornerit pappiaqqani titarnerinnaajunnaarput, aammalu ataatsimiittarfinni takorluugaannaajunnaarlutik, ullumikkut pilersaarutit piviusunngortussanngorput, Iddimanngiiu Jensen Bianco taama ilaatigut oqalugiarpoq.

Talittarfiup ilassutissaanik sanaartortussat KJ Greenlandimeersut piareerluinnartut suliffeqarfiup siulersuisuini siulittaasoq Karl Jensen oqaluttuarpoq. Qaartiterinermimi nunagissaanermilu sulisussat siulliit qulit piareeqqapput.

- Sulisussat maskiinallu piareeqqapput. Tassa aallartippugut, Karl Jensen oqarpoq.