Qassusersorluni aalisarneq pillugu ileqqoreqqusaq aalisarnermut killiliisoq

Avannaata Kommuniani qassusersorluni aalisarneq pillugu ileqqoreqqusaq naapertorlugu, aqutsiveqarfik Upernavimmi, januar, marts, april, maj, november aamma december, qassutit atorlugit qaleralinniartoqarsinnaavoq. 

Silaannaap allanngoriartornerata kingunerisaanik, siornatigumut naleqqiullugu avannaani kingusinnerusukkut sikusalerpoq. Tamannalu peqqutigalugu ukiuugaluartoq angallatitit atorlugit sivisunerusumik aalisartoqarsinnaalerpoq. Taamaattumik Upernavimmi angallatersorlutik aalisartut peqatigiiffiata UAPAP-p siunnersuutigaa, aqutsiveqarfik Upernavimmi qassutit atorlugit qaleralinniarnermi maji matullugu, februari ammarneqassasoq. 

Kommunimi ileqqoreqqusat suliarineqarnissaannut kommunalbestyrelsi akisussaasuuvoq. Taamaattumik Qeqertarsuup Tunuani qassusersorluni qaleralinniarneq saarullinniarnerlu pillugit ileqqoreqqusaq nutaaq 26. februar akuersissutigineqarpoq, taannalu 26. marts aallarnerfigalugu atuutilissaaq. UAPAP-lli allannguinissamik kissaataa ileqqoreqqusami nutaami suli atuutilersinneqanngitsoq, Avannaata Kommunia paasissutissiivoq. 

Tusarniaasoqassasoq

Aqutsiveqarfik Upernavimmi inuutissarsiutigalugu qassusersorluni aalisarneq pillugu Avannaata Kommuniani ileqqoreqqusaq naapertorlugu, sikut saatsersut akornutaappata, qassutinik annaasaqarnissaq pinngitsoortinniarlugu, atuisunik tusarniaareerluni qassusersorluni aalisarneq kommunip matusinnaavaa. 

Ileqqoreqqusamilli allannguisoqassappat tusarniaaneq malittassat malillugit ingerlanersoq kommunalbestyrelsip qulakkeertussaavaa. 

Suliaq ingerlasoq

Upernavimmi angallatersorlutik aalisartut peqatigiiffiata UAPAP-p qassusersorluni qaleralinniarnermi maaji matullugu februarip ammarneqarnissaanik kissaataa aallaavigalugu, Avannaata Kommuniani kommunalbestyrelsimut ilaasortaq Arnaq N. Eskildsen, Naleraq, kommunalbestyrelsimut oqaluuserisassanngortitsivoq. 

Ileqqoreqqusalli allanngortinneqarnissaa pillugu suliaq siornali aallartinneqareersimasoq, taassuma erseqqissaatigaa.

- Qassusersorluni qaleralinniarnermi ileqqoreqqusaq aalisartut qanoq allanngortikkusunneraat paasisaqarfigiumallugu, kommunalbestyrelsimi Aalisarnermut Piniarnermullu ataatsimiititaliaq siorna Upernavimmi nunaqarfiinilu angalavoq.

- Qassuserluni aalisarnermi killeqarfiit, kiisalu qaammatit aalisarfissatut akuerisaasut allanngortinneqarnissaat, aalisartut kissaatigaat.

- Ileqqoreqqusap atuuttup nutarterneqarnissaa pisariaqarpoq, tamatumalu piviusunngortinneqarnissaa siunertaralugu sulineq maanna ingerlavoq, taanna oqarpoq.

Upernaviup eqqaani ukiuunerani sivisunerusumik qassuserluni qaleralinniartoqarsinnaalerpat, tamanna kommuni akileraarutitigut isertitaqarnerulernerannik kinguneqassasoq, Avannaata Kommunianit naatsorsuutigineqarpoq.

Ilulissanukartariaqartut

Angallataatilik Lauritz Immanuelsen Christiansen, Upernavimmi angallatersorlutik aalisartut peqatigiiffiani UAPAP-mi siulittaasuuvoq.

Ukiuunerani Upernaviup eqqaani angallatersorluni aalisartoqarsinnaagaluartoq, taamaattoq qassusersorluni aalisarneq pillugu ileqqoreqqusaq naapertorlugu februari matoqqatinneqarmat, Ilulissat eqqaanut aalisariartariaqarsimalluni, taassuma oqaatigaa.

- Sikuusarnerata allanngorneranik peqquteqartumik, ukiuunera tamaat Upernaviup eqqaani qassusersorluni aalisartoqarsinnaalernikuuvoq. Ileqqoreqqusarli naapertorlugu februari matoqqatinneqarmat, aalisarneq unitsinneqartariaqartarpoq, taanna oqarpoq.

Lauritz Immanuelsen Christiansenip angallataa Olava pingasunik inuttaqartoq Ilulissat eqqaanut aalisariartariaqarsimavoq.

- Ileqqoreqqusap allanngortinneqarnissaa siornatigut qinnuteqaatigereernikuugaluarparput, tamannali suli pinngilaq. Upernavimmi ilaqutaratta, soorunami taavani aalisaannarnissarput kissaatigigaluarparput.

- Allatulli ajornartumik Ilulissanut aalisariartariaqarnikuuvugut, tamannalu soorunami uggornarpoq, taanna oqarpoq.

Qassusersorluni aalisarneq pillugu ileqqoreqqusamik allannguineq, aalisartunut taamaallaat pinnani aammali aalisakkanik sulissuarnut, taakkunanilu sulisunut annertuumik iluaqutaassagaluartoq Lauritz Immanuelsen Christiansen isumaqarpoq.