Royal Arctic Linep 2026-mut naatsorsuutinut, isumalluarnini annertusivaa

Assartukkat ukiup affaani siullermi amerliartorneri, Royal Arctic Linep akileraarutit suli ilanngaatiginagit ukiumut angusat qaffasinnerunissaat naatsorsuutigaa.

Assartuinerup annertusiartornera pissutigalugu RAL ukioq manna angusarissaarnissani naatsorsuutigaa.

Assi Sermitsiap toqqorsivianit

KASSAALUK KRISTENSEN KASSAALUK KRISTENSEN Digitalimik aaqqissuisoq

Saqqummersinneqarpoq 18. Aggusti 2026 - 09:02

Ussassaarut

Royal Arctic Linemi assartukkat 2026-mi ukiup affaani siullermi amerlisimapput. Ukiup siulianut sanilliullugu 2,7 procentimik amerlanerupput, tamatumalu saniatigut ingerlatseqatigiiffiup ukioq manna angusaqarnissaminut naatsorsuutigisai qaffasinnerupput.

Royal Arctic Linep maanna naatsorsuutigaa, akileraarutit suli ilanngaatiginagit 25 aamma 35 million koruunit akornanni angusaqassalluni. 15 aamma 25 million koruunit akornanni annertutigisumik angusaqarnissaq siornatigut naatsorsuutaasimagaluarpoq.

Assartukkat 2025-mi annertuumik appariareertullu, ingerlalluaqqilernissamik ingerlatseqatigiiffik maanna naliliivoq.

- Ukiup affaani siullermi ineriartorneq naammagisimaarpara. Assartukkat annikitsumik annertusipput, naatsorsuutigisarpullu missigiunneqartuniit pitsaanerusumik angusaqarnissarput. Kingoraartissanik ingerlatseqatigiiffiup angallataata nutarternissaanut aningaasaliinissamut pisariaqartut pilersinneqaqqissinnaanerannik tamanna isumaqarpoq, aningaasaqarnermut pisortaq Jørgen Aqe Møller oqarpoq.

Arctic Umiaq Linemi ilaasut amerliartorput

Ussassaarut

Arctic Umiaq Line aamma siuariartorpoq, ilaasut siorna ukiup affaanut siullermut sanilliullugu, 29 procentinik amerlisimapput.

Royal Arctic Linep aamma ilisimatitsissutigaa digitalimik aaqqiissutissanut nutaanik aningaasaliinikkut umiarsuaatimilu nutarternerisigut suliffeqarfiup nutaaliornissaa sulissutiginiarlugu.