Royal Greenland pisassinneqarnerpaasoq

Naalakkersuisut qaleralittassiissuterpassuarnik agguaaqqammerput. Taakkuupput ukiumut pisassiissutit ukiup sinnerani aalisarneqarsinnaasut.

Naalakkersuisut Namminersorlutik Oqartussat ingerlatseqatigiiffiannut annerpaamut Royal Greenlandimut ukiumut 1.950 tonsinik qaleralittassiipput.

Taamaalilluni suliffeqarfissuaq 2025-mi pisassinneqarnermi saniatigut allanik pisassaqalerpoq.

Royal Greenlandip 25 procentinik piginneqataaffigisaa Qaleralik, Royal Greenlandimut pisassiissutit assipajaannik, 1.650 tonsinik pisassinneqarpoq.

Taamaalilluni Royal Greenland aamma Qaleralik 2026-mi 5.250 tonsinik 4.950 tonsinillu pisassinneqarput.

Naalakkersuisut ingerlatseqatigiiffinnut sisamanut Polar Seafoodimut, Qaleralimmut, Royal Greenlandimut Siggummullu ukiumoortumik pisassiissutit pillugit allakkatigut paasissutissiissutaanni atuarneqarsinnaavoq.

Nalunaarut sisamanngornermi novembarip arferngani ullulerneqarpoq.

Pakatsisut

Polar Seafood Greenland Polarillu piginneqataaffigisaa Sigguk ukiumut pisassiissutinik tunineqanngillat, taamaattumillu pakatsisinneqarlutik.

Ingerlatseqatigiiffiit namminersortut marluk, Polar Seafoodip aamma Sigguup, Kitaani ukioq manna 1.570 tonsit aamma 2.035 tonsinik qaleralittassaraat. Taamaalillunilu Royal Greenlandimut pisassiissutigineqartut Polar Seafoodimut pisassiissutigineqartunit pingasoriaammit amerlanerupput.

Naalakkersuisut oktobarip 26-ani pisassiissutit agguaanneqarnissaannut aalajangertut allakkami atuarneqarsinnaavoq. Taaneqareersutullu Royal Greenland aamma Qaleralik pisassinneqartuullutik.

Pisassiissutaasussat sipporneqartut

Ukiumut pisassiissutit inuttalerneqanngitsut Naalakkersuisut aalisarnermut inatsit aallaavigalugu agguaassinnaagaat Naalakkersuisut paasissutissiipput. Polar Seafoodili Siggullu pisassiissutigineqartut sipporlugit pisaqarnikuummata ukiumut pisassiissutinik tunineqarsinnaanngillat.

Naalakkersuisuit Royal Greenlandip, Qalerallip, Polar Seafoodip Siggullu avataani qaleralittassaasa pingajorarterutaat ukioq manna januaarip aallaqqaataaniit arsaarinnissutigaat. Tamanna Polar Seafoodip aamma Sigguup akerleralugu Naalakkersuisut sakkortuumik isornartorsiorpaat.

Aalisarnermimmi inuussutissarsiortut nutaat?

Naalakkersuisut Kitaani qaleralittassiissutinik, nataarnartassiissutinik saarullittassiissutinillu 4.600 tonsiusunik februaarip aallaqqaataani aalisartussarsiorpoq. Qaleralittassiissutit aalisarnermik inuussutissarsiortunut nutaanut pisassiissutissatut illikartinneqarput.

Naalakkersuisut namminersortumut ataatsimut arlalinnulluunniit aalisagartassiinissamik suliaqarnerat ukimut pisassiissutit aalajangerneqarnerannut sunniuteqanngitsoq allakkami atuarneqarsinnaavoq.

Ingerlatseqatigiiffinnut sisamaasunut allakkat naapertorlugu, kimit aalisarneqassanersut ukioq mannalu pisassiisutit sinneruttut aalisarneqarnerat apeqqutaatinneqarani, inuiaqatigiit tungaaniit aalisarnermullu inatsimmi isumaqatigiissutigineqartut aallaavigalugit ukiumut pisassiissutit atorluarnissaat aalajangiisuussapput.

- Pisassiissutit ingerlatseqatigiiffiit nutaat (ilaatigut qalerallit 4.600 tonsit, aaqq.) ukiup naannginnerani tamakkerlugit aalisarsinnaanngikkaat nalilerneqarpoq. Taamaattumillu aalisarnermut ingerlatseqatigiiffiit pioreersut avataani qaleralittassiissutit sinneruttut aalisarsinnaanerannut pisinnaallutik, Naalakkersuisut allapput.

Naalakkersuisut siumut pisasseereerlutillu salliussisut

Naalakkersuisut ingerlatseqatigiiffiit namminersortut Sigguk aamma Polar Seafood akigalugit Royal Greenlandimut Qaleralimmullu salliussillutillu siumoortumik pisassiisut, Siggummi pisortaq piginneqataasorlu Frans Heilmann isumaqarpoq.

- Aalisarnermik inuussutissarsiutilik kinaluunniit toqqaannartumik toqqaannanngitsumilluunniit avataani qaleralittassanik raajartassanillu 20 procentiiniit amerlanerusunik tunineqarsinnaanngimmata, Sigguup aalisartullu namminersortut arlallit ukiumut pisassiissutinik pisassinneqarnerisigut aalisarneqarsinnaasut amerlanerpaaffissaannut naapertuutinngitsumik aalajangiisoqassammat Naalakkersuisoqarfimmiit tunngavilersuutigineqarpoq. Polar Seafood Greenland Siggummik piginneqataasoq raajanut pisassiissuteqarmat, Sigguk raajartassaqanngikkaluartorluunniit ukiumut pisassanik tunineqarsinnaanngitsoq naalakkersuisoqarfimmit nassuiaatigineqarpoq. Tamanna immini tupinnartorujussuuvoq, Frans Heilmann oqarpoq.

Kitaani qaleralinniarnermi kalaallit aalisartut pisassaasa pingajorarterutaat aalisartunut nutaanut agguaanneqassasut Naalakkersuisut 17. december 2024-mi aalajangermata Sigguk A/S pisassami ilaanik arsaarneqarpoq. Avataasiortut tamarmik eqqugaapput, ilaatigut Royal Greenland tamakkiisumik pisortanit pigineqartoq Royal Greenlandimik piginneqataaffigineqartoq Qaleralik.

- Naalakkersuisut maanna iliuuserisaat malillugu Royal Greenland aamma Qaleralik pisassaminnik annaasaqaatigisimasaat utertinneqaannaratik, Polar Seafood Sigguullu pisassassat annaasaat taakkununnga pisassiissutigineqarput.

- Tamatumunnga atatillugu Royal Greenlandimut pisassiissutit namminersortunut pisassiissutinit marloriaammik amerlanerunerat maluginiarnarpoq, maannalu aalajangerneq Royal Greenlandimut pisassiissutaasinnaasut amerlanerpaaffissaat qaangerneqarani.

- Taamaattumik namminersortut akigalugit pisortat suliffeqarfiutaannut pisasseereertarneq ingerlaannarpoq, aamma Demokraatit naalakkersuisooqatigiinni partiini annerpaanngoraluartoq politikkikkut ingerlariaaseq attatiinnarneqarpoq.

- Namminersortutut aningaasarsiortuulluni Kalaallit Nunaanni aningaasaliiniarnani aalajangertoqarsinnaanerpa? Pisortat ”inississaqqaarpaatsit”. Tunniutiinnarnianngilagulli – Naalakkersuisunut eqqartuussivimmut suliassanngortereerpavut. Kukkusumik aalajangiineq sukataarusunnerulersitsiinnarpoq. Taamali ajornanngitsigisumik tunniutiinnarnavianngilagut, Frans Heilmann oqarpoq.

Aalajangiineq allanngortinneqarluni Sigguk piginneqataaffigisani suliffeqarfiit pisortanit pigineqartut assigalugit pineqassasoq taanna isumaqarpoq — taamaattoqarsinnaanerali ilimaginngilaa, taamaattoqassappammi inuiaqatigiit ataatsimut pissaannik naleqartussaammat.