Saattuanik pisassiissutigineqartartut ikiliartupiloorput

Ilisimatuussutsikkut siunnersuisoqatigiit assagiarsuit ikilerujussuarsimaneri nalilerpaat.

2026-mut assagiarsunnut pisassiissutit annikillisinneqarnerat, Naalakkersuisut nalunaarutaanni atuarneqarsinnaavoq,

Allassimasoq naapertorlugu 20 procentit piffiillu ilaanni 69,7 procentit akornanni pisassiissutit appariarput.

Naalakkersuisut nalunaarutigaat, 2026-imi pisassiissutit atuuttumik aqutsinermut pilersaarummut naapertorlugit aalajangersarneqarsimasut,  pisassiissutillu annikillillutik siunnersuisoqatigiit siunnersuinerat assigalugu.

Assersuutigalugu sinerissap imartaani Nuup Paamiutillu akornanni pisassiissutit tamarmiusut 1.332 tonsinit 551 tonsinut ikilisinneqarput, tassa 58 procentimik ikileriarput.

Allaaserisami pisassiissutit nutaat kisitsisit allattorsimaffianni ataani allassimasumi takuneqarsinnaapput:

Oktobarimi pisassiissutit 23 procentiinnaat pisarineqarput

Pinngortitaleriffik pisassiisarnermut siunnersuisuuvoq.

Ilisimatusarfik 2026-mut siunnersuummi nassuiaavoq saattuarniarneq annikilleriarujussuarsimasoq oktobarimilu pisassiissutit suli tamakkerneqanngitsut.

Pinngortitaleriffik Nuup Paamiutullu imartaat pillugu ima allappoq:

"Aalisarnermut nalunaarsuutit ersersippaat ukiuni kingullerni saattuaqassuseq aalaakkaasimasoq, 2023imiillii ikileriarfiusimasoq. Pullatit ataatsit amuneqartut imai ukiuni kingullerni 5-7 kg-nik imaqartarsimapput, 2025imili pullatip ataatsip qaqitai 3 kg missaanniissimallutik. 2022imi pisassiissutaasimasut 65%ii pisarineqarsimapput, 2023imi pisassiissutaasut 37%ii aalisarneqarsimapput, 2024imi pisassiissutaasut 53%ii qaqinneqarsimasut, 2025imut tunngatillugu Nuuk-Paamiut-ni sinerissap qanittuani pisassiissutaasut 23%ii pisarineqarsimapput."

Ilisimatusarfik nangilluni allappoq siunnersuut nalornissutigineqartoq, aalisarnermi paasissutissanik tunngaveqarmat, taamaattumillu nalunarallarpoq pisat ikiliartornerannut aalisakkalluunniit soqutigineqannginneranut takussutissaanersut.

Siunnersuutit pisassiissutigineqartullu pillugit naliliineq uani atuarneqarsinnaapput.