Svend C-p avataani saarullinniarnissani siunniukkaa

Kilisaataatillit Kitaani Tunumilu aappaagu avataasiorliuni saarulliniarnissamut Namminersorlutik Oqartussanut ukioq manna qinnuteqartut ilagaat, ilaqutariit suliffeqarfiutaat Sikuaq Trawl A/S, ilaqutariinnit Christensenikkunnit pigineqartoq.

Kilisaammi Svend C-mi nutaamik saarullinnut tunisassiorfiliornissamut amerlasuunik aningaasaliinissamut piumassuseqarpugut. Taamaaliorniarpugut upperigatsigu saarulliit siunissaqarluartut, saarullinniarnissamullu tamatumunnga tulluartumik kilisaataateqaratta, pisortaq piginneqataasorlu Carl Christensen Sermitsiamut oqarpoq.

Ingerlatseqatigiiffik Tunumi Kitaanilu avataasiorluni saarullinniarnissamut pisassiissutissanik qinnuteqarsimavoq, neriuutigalugulu pisassinneqarsinnaassalluni.

Ukiup annersaani saarullinniarniartut

Kilisaat Svend C, 2016-imeersoq, kilisaataavoq raajarniarlunilu avaleraasartoorniartartoq, kisiannili raajartassiissutit avaleraasartoortassiissutillu ikiliartorput.

Svend C raajarniarnissamut avaleraasartoorniarnissamullu taamaallaat pisassiissutaateqarami, ukiup ilarujussuani aalisarsinnaassanngilaq, taamaattumillu allanik periarfissarsiortariaqarsimalluni.

Sikuaq Trawlip kilisaataatiminut marloqiusamik aalisartartumut, saarullinniarneq ingerlatseqatigiiffimmut allaanerusumik periarfissatsialaanerarpaa.

Svend C, Barentip Imartaani saarullinniarsinnaanermut qaleralinniarsinnaanermullu pisassiissutaateqanngimmat, Sikuaq Trawl-imit erseqqissarneqarpoq.

Svend C-p taamaalilluni ukiup ingerlanerani Kitaani Tunumilu saarullinniarnissani piffissaqarfigilluarsinnaassavaa.

Ingerlatseqatigiiffik isumaqarpoq, saarullinniarneq allanit soqutiginnittunit aappaagu aallartinneqanngippat, ukioq manna pisut uteqqiinnarneqassasut, tassa pisassiissutit aalisarneqanngikkunik annaaneqassallutik. Tamatuma kinguneranik Namminersorlutik Oqartussat karsiat, Nunatta Karsia, saarullinnut akitsuutinit isertitaqanngitsuussalluni.

Kitaani avataasiorluni saarullinniarneq ukiuni arlalinni misileraanerusimavoq.

Kitaani avataasiortunut 2025-mi siullermeerluni saarullittassiissutit agguaanneqarput. Tamatumunnga atatillugu Sikuaq Trawl isumaqarpoq, aalisartut tamarmik nutaatut isigineqassasut, kikkullu tamarmik assigiimmik aallaaveqassasut.

Pisortaq: - Pitsaasumik tunngavilersuutissaqarpugut

Saarullittassiissutit qanoq agguataarneqassanersut, politikikkut aalajangiisussanit, tassa Naalakkersuisunit, aalajangerneqartussaammata Carl Christensenip nassuerutigaa.

Suliassap politikikkut suliarineqartussaanera ataqqilluinnarparput, isumaqarpugulli ingerlatseqatigiiffik tunngavilersuutissaqarluartoq, saarullinniarnermilu pisassiissutit 2026-mi tamakkerneqassappata, taamaalillunilu inuiaqatigiit saarullinnit akitsuutit isertitassatik tamaasa pissarsiarisinnaassappatigik, ullumikkumut naleqqiullugu aalisarsinnaanissamut periarfissarissaarnerusariaqarpugut, tamannalu piareersimaffigaarput, Sikuaq Trawlimeersoq Carl Christensen oqarpoq.

Kilisaataatileqatigiit siorna kaaviiaartitaat 282 millionit koruuniupput, akileraarutillu akilereerneranni 40 millionit koruuningajannik sinneqartooruteqarlutik.

Kilisaataatillit aappaagu pisassinneqarnissaminnik kissaateqartut, assersuutigalugu saarullittassinneqarusuttut pisassiissutinik Aalisarnermut, Piniarnermut Nunalerinermullu Naalakkersuisoqarfimmut qinnuteqartariaqarput.

Aalisarnermut, Piniarnermut Nunalerinermullu naalakkersuisoq Peter Borg qinnuteqartut atorfilittaminit suliarineqareerpata, Naalakkersuisunullu innersuussuteqareerpat pisassiissutinik agguaasoqassaaq.