Takornarialerisut Sisorarfiit Park ineriartortinniarpaat

Takornariat amerligaluttuinnartillugit, akunnittarfinnik sammisassaqarfinnillu amerlanerusunik Nuuk amigaateqarpoq.

Nuummi mittarfiup eqqaani aamma Sisorarfiit qanittuani takornariarfissuarmik nutaamik sammisassaqartitsiffiusumillu ineriartortitsisoqassappat, ataatsimoorussamik pilersaarusiortoqartariaqartoq takornarialerinermik suliaqartut arlallit taama isumaqarput.

Majuartaatip eqqaani akunnittarfiliornissamut suliniut maanna tunngavissaqalersoq, nunaqavissunit Hotel Auroramik piginnittunik aningaasaliisartunillu Klaus aamma Anita Iversenikkunnik, sisorartarfimmik ingerlatsisoq Aningaasaateqarfik Siorarsiorfik, kiisalu illussanik titartaasarfimmit siunnersuisarfimmillu PILU A/S-imit aallartinneqarpoq.

Aningaasaliisinnaasut arlallit suleqatigaat, ilaatigut Nalik Ventures, Danmarks Eksport- og investeringsfond (EIFO) aamma PT Capital, Alaskami Anchoragemi aningaasaateqarfik. Eqqaaneqartoq kingulleq takornariaqarnermut suliniutinut, ingammik issittumi, ilaatigut Alaskami, Canadami Islandimilu akunnittarfinnut aningaasaliisartutut ilisimaneqarpoq.

Amerikamiu aningaasaliisartoq

Nalik Ventures siornatigut PT Capitalimik qanimut suleqateqarpoq, ilaatigut pisortanik namminersortunillu aallartitat Alaskami illoqarfinnut: Juneau, Hoonah, Anchorage, Seward aamma Whittierimut angalatillugaat. Alaskami aallartisartut, Alaska Native Corporationsimi aamma naalakkersuisut siuttut tassani naapippaat.

Aammattaaq PT Capitalimi sulisut Kalaallit Nunaannut tikeraarput soqutigisaqaqatigiillu naapippaat, Kalaallit Nunaanni aningaasaliinissamut periarfissat -ineriartortitsinissamut aningaasaliissutit piginnaanerillu pisariaqartinneqartut paasisassarsiorfigalugit.

PT Capitalimik suleqateqarnertik pingaartillugu, aamma "nunani inuiaqatigiinnilu arlalinni peqataaffigisamini naleqarnerulersitsisartutut suleqataasimasut“ nassuiaatigalugu, Ineqarnermut, attaveqarnermut, isorliunerusunut upalungaarsimanermullu Naalakkersuisoqarfimmut allakkani Nalik Venturesip pisortaa Peter Christiansen taama allappoq.

Sisorartarfimmut aningaasaliinerit

Kalaallit Nunaanni nuannarisatta ilarpassuinut, soorlu sisorartarfinnut majuartaatinik amerlanerusunik immaqalu soorlu majuartaatit gondoleqarfiit pilersinneqarneranut, Klaus Iversen Hotel Aurorameersoq naapertorlugu namminersortut aningaasaliinerat iluaqutaasinnaavoq.

– Namminersortut aningaasaliissutaat kikkunnut tamanut annertuumik iluaqutaasinnaapput. Tamanna angusinnaajumallugu avataanit aningaasaliisoqarnissaa isumalluarnartumik isigineqartariaqarpoq, Klaus Iversen oqarpoq, majuartaatit eqqaanni sisamanik ullorialinnik akunnittarfiliorfimmik katillugit 104-nik initalimmik pilersitsinissaminik taanna eqqarsaateqarpoq.

Suliniummi sanaartorfissaq Kommuneqarfik Sermersuumit akuerineqarpoq, politikkikkullu tapersersorneqaruni aallartissinnaanngussaaq.

Mittarfimmit Sisorarfimmut pisuttuartarfik

Sunngiffimmi ornittakkamik nutaami – Sisorarfiit Parkimik – pilersaarut suli isumassarsiaannaagallarpoq.

Sumiiffiup ukioq iluitsoq timersorfiunissaa, silamilu aliikkusersuiffiunera, pisussanillu aaqqissuussiffigineqarsinnaanissaa, pilersaarummut siunnersuusiortunit TNT Nuuk Arkitekterimit marsimi 2026-mi suliarineqartumi siunnersuutigineqarpoq.

Siunnersuutit pingaarnerit ilagaat, mittarfimmiit Sisorarfimmut nunallu iluanut pisuinnarnut pisuttuartarfiliortoqarnissaa, tassani sammisassat assigiinngitsut ataqatigiissarlugit ataatsimoorfigineqarsinnaasullu nutaat pilersinneqassapput.

Siunnersuut immikkoortunut sisamanut agguataarneqarpoq: Ukiuunerani sisorartarfik. Aaqqissuussanut parki, timersornermut ataatsimoorlunilu sammisaqaqatigiinnermut atorneqarsinnaasoq; illoqarfillu avataani tasersuup eqqaaniittoq; parkourertarfiliaralugu.

Qallortarfik qajaq pololu

Pilersaarutit naapertorlugit aasakkut tasersuami qaannamik polo-rtartoqarsinnaassaaq aammalu wakeboardertarsinnaassalluni. Tamatumunnga atatillugu skateparkimik sikkilertarfissamillu pumptrackimik pilersitsisoqassaaq, 20 meterisut portutigisumik majuartarfiliortoqassalluni pinnguartarfiliortoqassallunilu.

Aamma silami timigissartarfeqassaaq, silamilu filmertarfimmi filminik isiginnaarsinnaaneq tusarnaartitsinernullu aaqqissuussanullu ataatsimoorfiusinnaasut periarfissaqartinneqassapput.

Sisorarfinni snowboarderfiusunilu snowparkimilu sisorartoqarsinnaalersillugu, piffik allatut ukiuunerani atorneqartassaaq. Pisuttuartarfiliortoqassaaq meeqqanullu majuartaatiliortoqassalluni, sisorartarfillu tamarmi allilerneqassalluni. Taseq sukuutsertarfiliarineqasaaq, aamma ujakkaartarfinnik sumiiffimmi pilersitsisoqassalluni. Snescooterinik aaqqissuussinissamut allanillu ukiukkut pisussanik, isiginnaartitsisarfinnilu inissaqartitsisoqarnissaa. kiisalu taseq eqqarsaatigalugu saunartarfiliortoqarnissaa ikumatitsiviliortoqarnissaalu pilersaarutigineqarpoq.

Aammattaaq ullorissat arsarnerillu takuneqarsinnaaqqullugit qaamanermik mingutsitsineq killilersimaarneqassaaq.

Sumiiffiup qanoq isikkoqarnissaanut aningaasaliisullu qanoq annertutigisumik aningaasaliisinnaanerat eqqarsaatigalugu suliniut pilersaarutaaginnarallartoq, Klaus Iversenip erseqqissarpaa.

– Najukkami inuussutissarsiortut suliniummut aningaasaliissuteqarnissaat tikilluaqqusaasoq, Klaus Iversen oqarpoq nangillunilu suliniut illoqarfimmi innuttaasunut tunngatinneqartoq, takornariaqarnikkulli isertitat kikkut tamarmik atugarissaarnerulernissaannut iluaqutaasinnaasut periarfissaapput.