Trumpip niuerneq aallarteqqikkaa

Aatsaat siullermeerluni tamanna pinngilaq. Donald Trumpip ilaqutaasalu Kalaallit Nunaat nunarsuarmi siornali ilisimaneqalersimmassuk, Nuummi Hotel Hans Egedep tusagassiortut nunanit tamalaaneersut amerlasuut tikerarnerat misigaa. Maannalu oqaluttuaq uteqqippoq.

Ukiup aallartinnerani – takornariartitsinerup unikaallaffigisartagaraluani – Hotel Hans Egedemi iseqqaartarfik nalinginnaanngitsumik ulapiffiuvoq.

Assiliissutit, mikrofonit tusagassiortullu nunanit tamaneersut ataatsimoorfinni takussaapput, hotelimilu pisortaaneq malillugu ineriartorneq Trumpip Kalaallit Nunaat pillugu sukakkaluttuinnarneranik ataqatigiiffeqarpoq. - Ingammik Trumpip oqaaseqaqqittalernerata kingorna sapaatit-akunnerisa marlussuit ingerlaneranni ininik pisariaqartitsinerup misinnartumik annertuseriarneranik maluginninnerput qularnanngilaq, Pisortaaneq Jørgen S. Bay-Kastrup oqarpoq. 

– Pingaarnertut tusagassiortut, aviisiliortut, TV-qarfinneersullu maanna tikeraartigaagut. Niuerneq ingerlalluaqqilerpoq.

Isaariaq sullivittut

Hotel Hans Egedep isaariaani tusagassiortut ingillutik computerimik teknikikkullu atortorissaarutimik saanni ulappupput. Assiliissutit natermi nerrivinnilu inissisimapput, tusagassiortullu kaffisorniartarfiup nerriviini ulappupput, isaariaalu tusagassiornermi qitiusoqarfittut atuukkallarpoq.

– Maani katersuuttarput. Manna ini ataatsimoorfiuvoq suliffiusinnaasoq, qasuersaarfiusinnaasoq qaqugulu anilluni illoqarfimmi angalaarnissamik allussiffiusoq, pisortaaneq nassuiaavoq. Hotelimi iseqqaartarfittut nalinginnaasumik pisoqarfiuvoq, maannakkorpiarli maani tusagassiortorpassuaqarpoq.

Tusagassiortut iseqqaarfik ineriartornermik malinnaajutigalutik sullivimmisut atorpaat, tassanngalu illoqarfimmut qanoq pisoqarneranik takunnissinnaapput, aammali politikikkut allartitaqarnikkullu pisunik malinnaasoqartarpoq – Kalaallit Nunaallu pillugu nunat tamat akornanni qanoq tullianik pisoqarnissaa utaqqineqartarpoq.

Siorna pisunik uteqqiineq

Bay-Kastrup malillugu pisut siorna januaarimi, Donald Trumpip ernerata Kalaallit Nunaannut tikeraarneranut assingupput.

– Siorna taamatoqqinnaaq misigisaqarpugut. Pisut aviisinit, allaaserinnittarfinnit kiisalu tusagassiortunik nunarsuarmit tamangajalluinnarmeersunik tikeraartoqarneranik nassataqarput, taanna oqarpoq.

– Kingornalu upernaaq tamakkerlugu nalinginnaanngilluinnartumik politikerinit, inatsisartunit aallartitaqarfinnillu tikeraartorpassuaqarpugut. Tamakku uteqqikkiartortutut maanna isikkoqarput.

Manna samminninnerup suli sakkortunerorpasinnera assigiinngissutaavoq.

– Kalaallit Nunaat suli maanna sammineqarneruvoq. Trumpip oqaaseqartarnera Kalaallit Nunaannillu oqallisiginninnera nunarsuup sinneranit allaanerulluinnartumik malinnaatitsivoq, tamannalu inniminniisutsinni toqqaannaq takusinnaavarput.

Illoqarfik tusagassiortunik ulikkaartoq

Hotel Hans Egede kisimi taama misigisaqanngilaq. Jørgen S. Bay-Kastrup naapertorlugu illoqarfimmi tamarmi hotelit ineriartorneq assingusoq malugisinnaavaat.

– Hotelini allani peqateqarpunga, ilaatigut Hotel Aurorami, taakkulu aamma tusagassiortunik taama amerlatigisunik inisimasoqarput, Jørgen S. Bay-Kastrup, Tuukkamut 8. januar ilaasoq oqarpoq.

– Nammineerlunga Tuukkamik Nuummukarama, ilaasunit assiliissutit amerlanerugunarpulluunniit. Tamanna qanoq maannakkorpiaq tatineqartiginitsinnik ersersitsivoq. Maannangaaq piffissami aggersumi tusagassiortukkaat suli amerlanerit tikinnissaminnik nalunaareerput.

Mittarfik Trumpilu attuumassuteqaqatigiipput

– 2025 tamaat ataatsimut qiviaraanni, mittarfiup sunniuteqartorujussuusimanera ersarilluinnarpoq. Kalaallit Nunaat tikikkuminarnerulerpoq, nunamillu ilisimaarinninneq annertuumik siuariarpoq, taanna oqarpoq.

Visit Greenlandip ukiorpassuarni sulinera toqqammavissiisoq, Trumpilli oqariartuutai ilimaginngisamik sakkortusaasut, taassuma tikkuarpaa.

– Tunuliaqutaa oqaloqatigiissutigineqartuarsinnaavoq, alianartuuvorlu. Trumpilli Kalaallit Nunaata nittarsaannera sakkortoorujussuanngortippaa. Tamanna nittarsaassinikkut aatsaat taama angusaqarnitsinnik kinguneqarpoq. Tassanngaannaq kikkut tamarmik Kalaallit Nunaata sumiinnera ilisimaleriasaarpaat –maanngarumatsappullu.

Billetit akikinnerit, timmisartuussinerit amerlanerusut timmisartullu toqqaannartut – ilaatigut USA-meersut – peqatigalugit tamanna ingammik Nuummi ingerlatanik misinnartumik amerleriartitsivoq. 

Rekoortit suliffiillu amerlanerusut

Sunniullumi aamma aningaasaatigut tigussaasunik kinguneqarpoq.

– Siorna juulimi ukiut ingerlatsivigisavut tamaasa sanillersuullugit Hotel Hans egedemi ingerlatsineq annertunerpaat ilagaat, Bay-Kastrup oqarpoq.

– Tamatuma mittarfiup nutaap ilersinnerata sunniutissaatut neriuutigineqartoq ullormit siullermit pilernera takutippaa. Taakkulu saniatigut Trumpi pillugu oqaluttuaq takkuppoq, pisunillu sukkatsisaalluni.

Taamaammat hotelip sulisuni ilavai.

– Sulisuvut 10 procentit missaannik amerlivagut, sulisullu 70-init 80-inut amerlillugit. Tamanna suliffiit amerlanerulernerannik akileraarutitigullu isertitat amerlanerulernerannik kinguneqarpoq – uatsinnuinnaanngitsoq, nunamulli tamarmut.

Aningaasatigut iluanaarut – inuit toqqissisimannginnerulernerat

Naak hoteli namminersorlutillu inuussutissarsiortut siuariarnermik misigigaluartut, tamanna aamma sakkortuumik illuatungeqartoq pisortaanerup qularutiginngilaa.

– Piffissaq sivikitsoq isigalugu inuiaqatigiit pisut aningaasatigut iluanaarutigaat. Tarnikkulli inuttullu tamanna akeqarpoq, taanna oqarpoq.

– Ingammik Trumpimit Kalaallit Nunaata eqqartorneqarnera toqqissisimannginnermik nalorninermillu pilersitsivoq. Iteraangatta ima eqqarsartarpugut: Ila aqagumita oqaluttuat suut tusassavagut? Tamanna nuanniippoq.

Tusagassiortut nunarsuarmit tamaneersut inissittut

Iseqqaarfimmi Nuummilu sumi tamani tusagassiortut ilaatigut BBC-meersut Al Jazeerameersullu naapitassaapput, taakkulu ukiup kingulliup ingerlanerani oqaluttuanik assigiinngitsunik tusagassiorniarlutik arlaleriarlutik Kalaallit Nunaaneereersimapput. 

– Qaqugu aallaqqissanerluta naluarput. Ineriartorneq tamatumani apeqqutaavoq – taamatullu aamma Marco Rubiop nunanullu allantu ministerit ataatsimiinnissaat aamma apeqqutaavoq, Olliver produceri Al Jazeerameersoq oqaluttuarpoq.

Manna tikillugu tusagassiortut maaanittuarsinnarput – Nuummilu hotelit nunarsuarmi pissanganartorsiornerit Trumpillu Kalaallit Nunaannut sakkortusaarnerata toqqaannartumik niuernermik aallartitsinera malugeqqippaat.