Unaaq tikilersoq

Air Greenland Airbus A320neop nutaap Unaamik taaguuteqalersussap tigunissaanut piareersalereerpoq.

Timmisartoq taanna Air Greenlandip timmisartuanut Airbus A330-800neo Tuukkamut Kalaallit Nunaannut nunatsinnullu timmisartuussisarnerpassuarnut, pingaartumik Ilulissat Københavnillu akornanni aqqutaasussamut, tapertaassaaq.

Air Greenland timmisartumik attartornissamut Carlyle Aviation Partnersimik isumaqatigiissuteqarpoq. Maannamut timmisartoq SAS-imut attartorneqarsimavoq, taakkualu 2016-imi decembarimi nutaajusoq tigusimavaat.

Timmisartoq manna tikillugu Norgemi LN-RGO ilisarnaatigalugu nalunaarsorneqarsimavoq, Air Greenlandilli timmisartumik tigusinera pissutigalugu danskit timmisartunik nalunaarsuiffianni OY-mik nalunaarsorneqalissaaq Nalunaarsuutissaa suli maanna saqqummiunneqanngilaq.

Takuniaaneq

Nuummiut timmisartoq nutaaq siorna takuniarsinnaasimavaat. LN-RGO ataasiarluni juulip 30-ani illoqarfiit pingaarnersaanniippoq, tassa siorna aasakkut SAS-ip Nuummut timmisartuussisarnerani timmisartuussinerani.

SAS-ip timmisartoq ukioq manna aggustip 26-ani atorunnaarsippaa, tamatumalu kingorna Air Greenlandimit atorneqartalernissaanut piareersarneqartussanngorlugu Estlandip illoqarfiisa pingaarnersaannut Tallinnimut timmisartuunneqarpoq.

Piareersaaneq suliffeqarfimmi Magnetic Groupimi, ullumikkut Kinamiut ingerlatseqatigiiffiannit Guangzhou Hangxin Aviation Technologymit pigineqartumi, ingerlanneqarpoq. Magnetic Group aallaqqaammut Estonian Airip aserfallatsaaliuinermik immikkoortortaqarfianit aallaaveqarpoq, piffissallu ilaani siullermik Maersk Airimit kingusinnerusukkullu SAS-imit pigineqarsimavoq. Ingerlatseqatigiiffik timmisartut assartuutit akunnattumik angisuusillit soorlu Boeing 737 Airbus A320-illu pillugit immikkut ilisimasaliuvoq.

Timmisartoq ukiunik qulinik pisoqaassusilik maanna Air Greenlandimi teknikerit marluk siunnersuisoqarfillu suleqatigalugit misissoqqissaarneqarpoq. Tamatuma kingorna isaterneqassaaq — mikisuaranngorlugu.

Nutaanik pisatsersorneqassasoq

Katiterneqareeruni soorunami Air Greenlandip qalipaataannik ilisarnaataasunik qalipanneqassaaq, timmisartullu ilua nutaarluinnarmik pisatsersorneqassaaq.

Airbus A320neo katillugit 168-inik issiaveqassaaq – akisunermi 18-it akikinnermilu 150-it.

Air Greenlandip timmisartua nutaaq

Timmisartup suussusaa: Airbus A320neo

Siullerpaamik timminera: 2016-imi decemberimi

Motorit suussusaat: 2 x CFMI LEAP-1A26

Issiaviit agguataarnerat: Akikitsumik angalasut immikkoortuani 150-it kiisalu akisunermilu 18-it.

Ingerlaarnermi sukkassuseq: Ataatsimut isigalugu 840 km/t

Qutsissuseq anguneqarsinnaasoq qullasinnerpaaq: 11.918 meterit (39.000 fod)

Timmisinnaassuseq: 6.300 km tikillugu

Suluisa sanimut takissusaat: 35,80 meterit

Takissusaa: 37,57 meterit

Issiaviit Tuukkami ilisimasatsituut isiginnaaruteqassanngillat. Taarsiulluguli oqarasuaat angallattagaq, aataveqaat attuinnarlugu aquttagaq qarasaasiarluunniit angallattagaq Air Greenlandip aliikkusersuinermut atortuanut filminik kalaallisullu nipilersuutinik isiginnaartitsisinnaasumut atassuserneqarsinnaassaaq.

Timmisartoq Unaamik ateqassasoq Air Greenlandip siusinnerusukkut nalunaarutiginikuuaa.

Aqqa unammisitsinerup kingorna toqqarneqarpoq, tassani kikkulluunniit siunnersuuteqarsinnaallutillu oqaluttuassartaanik oqaluttuarsinnaapput.

Unaaq tassaavoq tuukkap ipua — nukimmik ingerlatitseqqiisoq, igeriuttakkap nuuanut atassusiisoq.

Timmisartup iluani pisatsersuutit arsarnerit Qullermiullu pillugit oqaluttuamiit, qilammi anersaat, aarrup niaqua atorlugu ullorissat akornanni arsartartunit isumassarsiaavoq.

Timmisartup iigaani pinnersaatit Christian Fleischer Reximit, aamma Tuukkami Norsamilu maanna isaterneqarsimasumit pinnersaasiortumit, ilusilersorneqarsimapput.