Upernavimmi qalerallit akiit qaffattut

2019-imi Polar Seafood A/S-ip Upernavimmi aalisakkanut suliffissualiorneranut atatillugu, Upernavimmi Royal Greenlandip aalisakkanut suliffissuaateqarnera ernumanartutut isiginngikkini, suliffeqarfissuup Kalaallit Nunaani namminersortunit pigineqartup annersaani piginneqataasoq pisortaanerusimasorlu, Jens Salling taamanikkut oqarpoq.

Polar Seafoodilli aalisakkanut suliffissuaataata atoqqaarfissiorneqarneraniit ukiut arfinillit missaat qaangiussimalertut, Kalaallit Nunaani aalisartoqarfiit annerpaartaasa ilaanni unammilleqatigiinneq sakkortunerulersimasoq maanna erserpoq, tamannalu qaleralinnik tunisinermi akit piffissami kingullermi qaffasinnerulernerisigut takuneqarsinnaavoq.

Akit qaffattut

Polar Seafoodip Upernavimmi aalisakkanut suliffissuarmik ammaanerata kingorna illoqarfimmi Royal Greenlandip aalisakkanut suliffissuaataanut qalerallit tunisat malunnaatilimmik ikileriarput, ukiulli ingerlanerini unammilleqatigiinneq sakkortunerulersimavoq, tamannalu peqqutaalluni qalerallit akii qaffasinnerulerput.

Ukioq manna ukiup naajartornerani aalisakkanik suliffissuarnut qalerallit tunisat amerlanerpaat qulakkeerniarlugit unammineq suli sakkortunerulerpoq, tamatumalu kingunerisaanik qaleralinnik tunisinermi kilomut akigitinneqartut maanna malunnaatilimmik qaffapput.

Upernavimmi Polar Seafoodimi qaleralinnik tunisinermi kilomut akigitinneqartoq 27 koruunimiit decemberi aallartilaartoq 32 koruunimut qaffanneqarpoq, taassumalu qaavatigut tapeq 2 koruunit aamma tunniunneqartarpoq.

Royal Greenland Upernavimmi nunaqarfiinilu aalisakkanut tunitsiveqarpoq, taassuma saniatigut suliffeqarfissuup piginneqataaffia Arctic Fish Greenland Kullorsuarmi Nuussuarmilu aamma aalisakkanut suliffissuaateqartoq, taakkunani qaleralllit kilomut 31 kroneqarput.

Aatsaat taamak qaffasitsigisut

Polar Seafoodip Upernavimmi aalisakkanut suliffissuaataani pisortap Knud Mathiassenip oqarnera naapertorlugu Upernavimmi unammilleqqatigiinneq sakkortuvoq, taamaakkaluartorli ukiup qaammataani kingullermi qaleralinnik tunisineq ingerlalluartoq, tamannalu qalerallit akiisa qaffasinnerunerannik ilaatigut peqquteqartoq, taassuma oqaatigaa.

- Aasaq ukiarlu qaleralinnik tunisineq pitsaanerusimasinnaagaluarpoq, aamma ukioq manna tunisat siornamut naleqqiullugit ikinnerungaatsiarput, taamaakkaluartoq maanna tunisineq ingerlalluarpoq, tamannalu tunisinermi akit qaffasinnerunerannik ilaatigut peqquteqarpoq.

- Tunisinermi akigitinneqartut aatsaat taamak qaffasitsigipput, tamannalu unammilleqatigiinnerup sakkortunerulersimaneranik peqquteqarpoq.

- Upernavimmi nunaqarfiinilu aalisakkanut suliffissuit unammillertigut katillugit arfineq pingasuupput, taamaattumik unallerneq sakkortuvoq, kisiannili akinik qaffaanerput tunisat amerlanerulernerannik kinguneqarpoq, taanna oqarpoq.

Polar Seafoodip Upernavimmi aalisakkanut suliffissuaataa ukioq tamaat ammasarpoq sulisullu maanna qulit missaanniipput.

Tunisat ikileriartut

Royal Greenlandip Upernavimmi nunaqarfinnilu aalisakkanut suliffissuaataanut qaleralinnik tunisinermi akigitinneqartoq 31 koruunimut qaffanneqarpoq.

Suliffeqarfissuup piginneqataaffigisaa Arctic Fish Greenland Nuussuarmi Kullorsuarmilu aalisakkanut suliffissuaateqarpoq, tassanilu tunisinermi kilomut akigitinneqartoq aamma 31 koruuniuvoq.

Arctic Fish Greenlandip pisortaata Frederik Olsenip oqarnera naapertorlugu, ukioq manna tunisineq siornamut naleqqiullugu annertuumik appariarfiuvoq, kisitsisinilli taasaqarsinnaanani taassuma erseqqissaatigaa.

Tunisat ikinnerulernerat sulisut ikinnerulernerannik aamma kinguneqartoq taassuma oqaatigaa. Tulaassallu ikinnerulernerannut peqqutaasinnaasut assigiinngitsut arlaqartut, Arctic Fish Greenlandimi siulersuisunut ilaasortaq Kullorsuarmeersoq aamma aalisartuullunilu piniartuusoq Timotheus Petersen oqarpoq.

- Aalisarfinni qassutaarsiutit, qilalukkat, eqalussuit sarfallu allanngornera tunisat ikileriarnerannut peqquteqarsorinarpoq. Taassuma saniatigut qalerallit angisuut siornatigut pisarineqarluartartut maanna ikinnerulersimapput, tamannalu sumik peqquteqarnersoq eqqoriaruminaappoq, taanna oqarpoq.

Arctic Fish Greenlandip aalisakkeriviinut qalerallit tunisat nalitsorsarnissaat siunertaralugu qalerallit niaquerlugillu paperuikkat aamma j-cutsinik taaneqartartut ukioru tunisassiarineqartalissasut, tulaassallu amerlanerulernissaat siunertaralugu qamuteralaat arlallit tunineqarsimasut, taassuma oqaatigaa.