“Arnaq” Katuami oqaluttuarisaanermut ilannguppoq

“Oh, arnaraa.”

Erinaa ini tamakkerlugu tusaaneqarsinnaaoq. Malittut siammarpoq tusarnaariallu tiguariartuaarpai. Kissalaarneq nukillu scenemit malugineqarsinnaapput , sajuttarnerilu timimi malugineqarsinnaangajalluinnarput.

" Oh, arnaraa, qiimmaannarit“

Nipaa nuanningaarami.

Erinarsuut Gloria Gaynorip erinarsuutaanit ‘I Will Survive’-mit aallaaveqarpoq, unnuk mannali taallai kalaallisoorput.

Erinarsuut nukik ataatsimoornerlu pillugit erinarsuutaavoq. Kisimiinnginneq pillugu. Arnat ataatsimoorlutik ingerlavissaminnik ilisimanninnerannut tunngavoq. Taallai erinaalu tamarmik qiimmassaatitut, aqqut ajornaatsuinnaanngikkaluartoq ingerlasornissamut eqqaasitsissutitut misinnarput.

Nipilersukkat qamani ammagaqarput. Misigissutsit immaqa sivisuumik toqqorsimasat anillariasaarput. Sarsuapput, soorlu nipaatsumik qaartutut, kingornalu suna tamarmi oqilisutut misinnarpoq.

“Oh, arnaraa, qiimaannarit, kisimiinngivipputit.”

Aasit kaanngartoqartutut misinnarpoq. Oqaatsit tamarmik, nipit tamarmik, oqimaatsumik oqilisitsisarput. Suli piumanarpoq. Tusaqqikkusunnarpoq. Pissusissamisoortutut, soorlu anersaartornertutullusooq.

Nipilersuut tusarnaaginnarneqarunnaarpoq. Ilanngunneqarpugut.

Issiavinni inissilluarniarsaralunga erinarsuut siulleq aatsaat tusaallugu imminut eqqaasippunga. Taamatut nipeqalereerpat tusarnaartitsinerup sinnerani qanoq pisoqassava?

Tusarnaariat allat inersuarmiittut qimerloorpakka. Kiinnat nuannaarlutik qungujulapput. Silaannarmiittoqarpoq, nuannaaqatigiinneq kikkut tamarmik malugisinnaasaat.

Eqqarsaat taanna tamatta pigaarput: Suli perusuppugut.

Nukik alla

Arnarissoq Bech Vetterlain mikrofonimik tigummivoq. 19-inik ukiulik ilinniarnertuunngorniarfimmi ilinniartoq tusarnaarianut tusarnaartitsiartorluni Aasianniit tikissimavoq.

Arnat nipilersortartut, nipilerisut qullilerisullu kiisalu aaqqissuisut allat peqatigalugit tusarnaartitsineq “Arnaq” arnat ulluanni pisussami aaqqissueqataaffigaa.

Suliniut Nina Kreutzmann Jørgensenip aallartitaa maanna ukiut aappassaanni ingerlanneqarpoq.Taanna erinarsortartuullunilu taalliortartuuvoq kalaaleq, pop, soul aamma R&B-p akornanni ersarissumik erinaqartoq.

Tusarnaartitsinermut peqataaneq Arnarissup immikkut ittumik misigisaqarfigaa. Ingammik tusarnaartitsisut, scenemilu tunuanilu sulisut, tamarmik arnaammata.

- Toqqissisimanartorujussuuvoq. Nipilersoqatigisartakkakka angutit ajoriffissaqartinngilakka, nukiili allaaneruvoq, Arnarissoq Bech Vetterlain oqaluttuarpoq.

Silaannaq nipigissaanermili malugineqarsinnaalereerpoq. Arnarissoq Bech Vetterlain nipilersortartoqatigisani ilagalugit qungujulalluni scenemiippoq. Illarneq nipillu inimi akuleriiaattut nipilersuummut qitaasarpoq. Sungiusarnerinnaanngilaq, ataatsimoorneruvoq. Nuannaarnermi aamma tulluusimaartoqarpoq. Tusarnaartitsinermut arnaannarnit peqataaffigineqartumut peqataanermik tulluusimaarutiginninneq.

- Tamanna uannut isumaqaqaaq. Ingammik misilittagaqarnerusut uagutsinnut ingerlatitseqqiisinnaammata. Nipilersornerup silarsuaani tusarnaartitsinermi arnaannaat peqataasarnerat qaqutigoorluinnarpoq. Nuan!, Arnarissoq Bech Vetterlain oqarpoq.

Ataatsimoorluni scenemiinneq immikkut ittumik nakussatsinnartoq oqaluttuarpoq.

- Pissaaneqartutut misinnarpoq. Angutit isumalluutiginagit nammineq iliuuseqarsinnaallunga takutissinnaavarput, taanna oqarpoq.

Nipilersoriaatsit assigiinngitsut

Katuami Hans Lyngep Inersuani issiaviit tamarmik ulikkaarput. Isiginnaariat amerlasuut arnat tusarnaarnissaannut takkupput. Unnummi pisussat assigiinngitsorpassuupput, tuarnaariallu nipilersoriaatsinik assigiinngitsunik misigisaqartinneqarput, taallaqanngitsunit rap-imut growl-imullu (torlumit qatituumik erinarsorneq, aaqq.), rytminit qiimasunit sallaannerusumik rockerpaluttunut popimullu. Tusarnaartitsisut tamarmik immikkut immikkuullarilluinnartumik tusarnaartitsipput, unnullu killitsinnartumik, isumassarsinartumik nukissaqarluartumillu pilersitseqataaffigaat.

Erinarsuut ilisimaneqarluartoq “I Don’t Want to Talk About It” Crazy Horsemit saqqummersinneqaqqaartoq kingusinnerusukkullu Rod Stewartimit atorneqarluni nunarsuarmi tamarmi tusaamasanngortoq aamma kalaallisut taallalerlugu atorneqarpoq.

Malu Falck nipiminik immikkuullarissumik erinaqarluni tusarnaartitsivoq. Erinarsornerisa ilaanni nipilersuutit qitinnermik ilaneqarput, taamaalilluni tusarnaartitsineq suli qanilaarnerulerluni. Erinarsorneq, aalanneq taallallu kalaallisoortut erinarsuummut immikkut itisiliillunilu nukittunerulersitsipput.

Parnaq Hammond Iversen, rappertartut dronningiata issittormiut Pam Grieriata, imminut tatigeqaluni erinnamik immikkuullarissumik utoqqatserpalaanngivissunik taallalimmik tusarnaartitsigami tusarnaartut nipilersukkanik sakkortuunik nuannarineqartunillu, aliikkusersorpai.

Danskeq-Iranimiu Ihan Haydar tumerparpaartuuvoq, tumerparpaarnerilu tamarmik inimi nipimik siammarterisut tusarnaartut allaat timiminni malugisinnaavaat. Tumerparpaarnera nipilersuummut sakkortusaataallunilu tusarnaariartumut sakkortuumik qanilaartumillu misigisaqartitsivoq.

Tusarnaartitsinermi nipilersortartut, erinarsortartut nipilerisullu arnat 20-t missaanniittut peqataapput, ilaatigut Arnarissoq Bech Vetterlain, Malu Falck, Sacha Olsen aamma Hollie Kielsen, kiisalu arnat piginnaasaqarluartut allat tamarmik unnuk puigunaatsoq pilersippaat.

Ilikkagaqarnartoq

Misigisaq tamanna Arnarissumut ilikkagaqarnarpoq. 16-it missaannik ukioqarluni nipilersortoqarluni appittalerlunilu sinerissami angalasarpoq.

- Taamani nipilersortartut amerlanersaat angutaapput, taakkununngalu akuunanga erinarsuinnartussaallungalu misigisarpunga. Nipilersoqatikka ajorinngilluinnarpakka, illuatungerluinnaanik isigaakka, kisianni akuunngitsutut misigisarpunga, taanna oqarpoq.

“Arnaq”-mi tusarnaartitsinermi naqqinneqarneq anniaatigineqangaanngilaq.

- Toqqissisimanarneruinnarpoq. Naak aatsaat takoqqaaraluarluta immitsinnut paasilluarnerusinnaavugut. Misigissutsigut nipilersornermilu attaveqaqatigiinnerit immikkut ittut ilisimareerpagut, tamannalu ajornannginnerulersitsisarlunilu ingerlalluarnerulersitsisarpoq. Assersuutigalugu sungiusareernerup kingorna nukeqatigisannik oqaloqateqarniarlunga anaanaga sianerfigisariaqanngilara, Arnarissoq Bech Vetterlain oqaluttuarpoq.

Sungiusarnermi unnummilu tusarnaartitsiffiusumi ataatsimoorfigeqatigiittorujussuuvugut.

Arnat sulisut scenemiittullu saniatigut Pilu Lynge aamma Agga Dam Pedersen qamannga pisumik ilaatinneqarput.

Pilu Lynge, arnat taalliortartut nuimanerit ilaat, erinarsugassiaminik “Nuissat”-mik, arnanit scenemiittunit tusarnaarianillu nuannaarlutik erinarsoqataasunit atorneqartumik, nersorniarneqarpoq.

Naggasiinermi Agga Dam Pedersenip erinarsuusiaa “Arnaq Ai” nuannaarluni erinarsorneqarpoq. Aaqqissuiup Nina Kreutzmann Jørgensenip erinarsuut atorsinnaanerlugu qanoq Agga qinnuigisimanerlugu oqaluttuarpoq. Agga qullipillunni erinaq piinnarsinnaagaa akisimavoq. Tamanna unnummi ataatsimoorfiusumi tapersersuinermut nuannaarnermullu ersiutaavoq. Ah nuan!

Ataasiussuseqarneq nakussatsissutaasoq

Arnat ulluanni Katuami Hans Lyngep inersuani tusarnaartitsineq nipilersornerinnaanani arnat sapiissuseqarnerinik, ilaatinneqarnerinik ataatsimoornertigullu allannguisinnaanerannik persuarsiorneruvoq.

“Arnaraa, qiimmaannarit”, I Will Survive-p kalaallisuunngortinneraniit Pilu Lyngep aamma Agga Dam Pedersenip nersorneqarnerannut oqariartuut ersarippoq: Arnat ataatsimoorput, qunusuillutik nammineersinnaanertik takutippaat.

Unnummi tamatumani inuusuttut piginnaanillit soorlu Arnarissoq aamma misilittagartuut soorlu Nina Kreutzmann Jørgensen tusarnaartitsimmata nipilersorneq kikkunnut tamanut qiimmannarlunilu siunissami iliuuseqarnissamut isumassarsisitsisartoq eqqaasinneqarpugut.