Festivali atinik piareersimasuuteqalerpoq

Angajo Lennert-Sandgreen Akisuanerit Festivali Nuummi ukioq manna oktobarimi ingerlanneqarnerani saqqummiisuussaaq.

Taassuma inuttaaffia, Hinnarik, Hinnarik Kammanilu ukioq manna nalliuttorsiorput, taamaattumik festivalip Ilaqutariinnut Ullorititaani aamma tusarnaartitsissallutik. Sussat! tusarnaartitseqataassapput. Festivalimik aaqqissuisut AG-mut ilisimatitsipput.

Festivalertoqarnerani aaqqissuussaq pitsaasumik ingerlanneqassaaq, ilaatigut nipilersortortartut nuannarineqarnerpaat ilaat ukioq manna tusarnaartitsissapput. Nina ukiorpassuarni festivalimut peqataasimanani maanna appittussanngorpoq, taamaasillunilu erinarsortartutut ukiuni 40-nngortorsiornini malunnartissallugu.

Mariina nipilersoqatigisartakkanilu saqqummersitamini sisamaneersunik atuissaaq, Rockstonesikkullu erinarsuutit ilisimaneqarluartut EP-millu nutaamiit saqqummertussanik nutaanik tusarnaartitsissallutik.

Siissisoq 2023-mi naggammik tusarnaartitsisimariarlutik maanna tusarnaartitseqqittussanngorpoq, Nanookikkulu ukiuni arfineq-marlunni peqataanikuunatik siullermeerlutik festivalimi appisimaartussanngorlutik.

Karl Sivertsen Jam-ip Karl Sivertsenip ukiorpassuarni nipilersuutigisarsimasaat ataqqiniarlugit appisimaassavai.

Enok Poulsen Band nuannarineqarluartunik tusarnaartitsissapput, nipilersoqatigiit Qarsoq atukkatik nuannarineqarnerpaat tusarnaartitsissutigissavaat.