Nunatta Eqqumiitsulianik Saqqummersitsivia pingaarutilimmik alloriaqqinnissaa qalliallattoq

Eqqumiitsuliortut, piorsarsimassutsikkut suliaqartut kiisalu Kalaallit Nunaanni politikerit Nuummi eqqumiitsulianik saqqummersitsivimmik pilersitsisoqarnissaa, ukiut qulikkaat marluk sinnerlugit takorluugaraat.

Naak sanaartornerup aallartinnissaanut 150 millionit koruunit missaat suli amigaatigineqaraluartut sulininiutip piviusunngortinneqarnissaa qaninnerulertoq, Nunatta Eqqumiitsulianik Saqqummersitsiviani siulittaasoq, eqqumiitsuliortoq Kristine Spore Kreutzmann, isumaqarpoq.

- Aappaagu arlaatigut pisoqarumaartoq neriuutigaarput, AG-mut oqarpoq.

Nunatta Eqqumiitsulianik Saqqummersitsiviup Nuummi illorsuup sumiiffissaa toqqarneqareerpoq, qallunaallu illussanik titartaasartuat tusaamasaq Bjarke Ingels suliniummut ilaavoq. Sanaartornerup piujuartitsinermik aamma najukkami atortussiat atorluarneqarnissaannik piumasaqaateqartoqarnera aallaavigalugu, suliniutip nutarterneqarnissaa siulersuisunit maanna sulissutigineqarpoq.

Assersuutigalugu sermip aanneranit sioqqanit qajuusaasanngornikut sanaartornermi atorneqarsinnaanerat eqqarsaatigineqarpoq.

– Sermip aanneranit sioqqanit qajuusaasanngornikut sanaartornermi arlaatigut qanoq atorneqarsinnaanerat misissussavarput. Natsisinut qammagassianullu sikassaatitut allatullu soqutiginartumik atorneqarsinnaavoq. Suliniut avatangiisinut mingutsitsinnginnerulersinniarlugu najukkami atortussianik atuinerunissarput kissaatigaarput, Kristine Spore Kreutzmann oqarpoq, taassumalu illussanik titartaasartoq tamanna pillugu siulersuisunit oqaloqatigineqareersimasoq ilisimatitsissutigaa.

100 millionit katersorneqareerput

Siulittaasoq naapertorlugu Nunami Eqqumiitsulianik Saqqummersitsivissamut aningaasatigut sinaakkusiunneqartut katillugit 250 millionit koruunit missaanniipput.

Maannamut 100 millionit koruunit missaat katersorneqareerput.

- Namminersorlutik Oqartussat 50 millionit koruuninik aningaasaliissuteqarput, sinnerilu 50 millionit koruunit kinaassutsiminik isertuussisumit tunissutigineqarlutik, oqarpoq.

Kinaassutsiminik isertuussilluni aningaasanik tunissuteqartoq USA-meersuunngitsoq qungujulalluni oqaatigaa.

Tamatuma saniatigut suliniut ukiumut 2 millionit koruuninik ingerlatsinermut tapiissutinik aningaasaliiffigineqartarpoq – 1 millionit koruunit Kommuneqarfik Sermersuuminngaanniit aamma 1 millionit koruunit Namminersorlutik Oqartussaniit. Aningaasat ilaatigut suliniutip attatiinnarneqarnissaanut kiisalu aningaasanut qinnuteqaatinik pilersaarusiornermillu ineriartortitseqqinnissamut atorneqartarput.

Suliniummi ukiorpassuarni unittooqqasoqareersoq, pitsaanerusumik maanna inissisimasoqartoq, Kristine Spore Kreutzmann isumaqarpoq.

– Ingerlatsinermut aningaasaliissutit, maannakkullu suliniummut pisortaqalernerput, siornatigut nalaassimanngilagut. Piumassuseq, kajumissutiminnillu sulisut siusinnerusukkut ingerlatsisuupput, maannakkulli sulinermut ilisimasaqartut pigilerpavut, taanna oqarpoq.

Nunanit tamalaanit Kalaallit Nunaannut soqutiginninneq annertusiartortoq pissutaasoq oqarpoq:

– Kalaallit Nunaat nunat tamalaat akornanni politikkikkut kulturikkullu pingaaruteqarnerulersimavoq. Tamatuma kingunerisaanik aningaasaateqarfiit amerlanerusut aamma suleqatigisat suliniummut alapernaannerulersut isumaqarpunga. Taamaattumillu malugisinnaavara maannakkut piffissami piviusorsiornerusumi inissisimalluta.

Siulersuisut aningaasaateqarfinnut aningaasaliisussarsiussapput

Suliniummut pisortaq Nivi Christensen piffissami kingullermi atorfimmini soraarsimanini, Facebookimi quppernermini nammineerluni nalunaarutigaa.

Tamanna pillugu siulittaasoq Kristine Spore Kreutzmann oqaaseqarumanngilaq.

- Inunnut ataasiakkaanut attuumassuteqarnera pissutigalungu tamanna oqaaseqarfigisinnaanngilara, naatsumik taama akissuteqarpoq, atorfinitsitsisoqavinnissaatalu tungaanut siulersuisut suliniummut pisortaagallartumik atorfinitsitsisimasut ilisimatitsissutigaa.

- Sanaartornissamut aningaasat amigaatigineqartut sinneruttut pissarsiarineqarnissaannut siulersuisut suliaqarnissaat maanna salliunneqarallarpoq, siulittaasoq Kristine Spore Kreutzmann oqarpoq.

Suliat amerlanerusut katersorneqarsimalereerput

Nunatta Eqqumiitsulianik Saqqummersitsivianiit eqqumiitsuliornermi suliat amerlasuut katersorneqarsimalereerput, naak illorsuup sanaartorneqarnera suli aallartinneqanngikkaluartoq.

Siulittaasoq Kristine Spore Kreutzmann inuit ataasiakkaat tukkornerisigut piffissap ingerlanerani eqqumiitsulianik saqqummersitsivissamut tunissuteqartalereersimapput, eqqumiitsuliallu hunnorujulikkaat katersorneqareersimasut oqarpoq.

Nunatta Eqqumiitsulianik Saqqummersitsiviani Kalaallit Nunaanni eqqumiitsuliornerup oqaluttuarisaaneranit, eqqumiitsuliortut oqaluttuarisaanermi tusaamasanit, eqqumiitsuliortullu kingulliarsuit eqqumiitsulioriaatsinik allanik misileraanerisigut pilersinneqartunik assigiinngitsorpassuarnik saqqummersitsisoqarnissaa anguniarneqarpoq.

– Kalaallit eqqumiitsuliortut suli inuusut suliaat katersussallugit maannakkut sulissutigaara, taakkualu suliaasa pisiarinissaannut aningaasanik qinnuteqarniarpugut. Inuiaat oqaluttuarisaaneranni eqqumiitsulianik nalitsinnilu eqqumiitsulianik katersuineq pingaaruteqarpoq, oqarpoq.

Eqqumiitsulianik katersat annerit ilaat eqqumiitsuliortup assigiinngitsorpassuarnik piginnaaneqartup Hans Lyngep suliaanik amerlasuunik katersaqalereerput.

Siammasinnerusumik inuiaqatigiit peqataatinneqarnissaannik kissaateqartut

Siulersuisunut pingaarutilik alla tassaavoq suliniummi qanoq isilluni siammasinnerusumik inuiaqatigiinnik peqataatitsisoqarsinnaanersoq siulersuisut anguniaraat Kristine Spore Kreutzmann oqarpoq.

Taamaattumik allaffeqarfimmik pilersitsinissaq sulissutigineqarpoq, taamaasilluni innuttaasut suliniut qanimut malinnaaffigisinnaanissaannik periarfissinneqassammata.

– Inuit nammineerlutik ornigullutik suliniummut paasissutissat pillugit oqaloqatiginnikkiartorsinnaanissaat kissaatigaara. Nuummi aammalumi sinerissami innuttaasut suliniummut akuutinneqartutut miginissaat anguniarusuppara, oqarpoq.

Ilutigisaanik Nunatta Eqqumiitsulianik Saqqummersitsivianut suleqataanikkut Kalaallit Nunaannit tamaneersut piumassuseqartut ataatsimoortinneqarsinnaaneri neriuutigaa.

- Aamma nuna tamakkerlugu – Nuummiinnaanngitsoq – nutaaliullaqqissunik katerserusuppunga, ataatsimoorluta isumassarsianik ilusilersuinermik atortunillu suliniummut tunngatillugu ineriartortitsilluta, Kristine Spore Kreutzmann oqarpoq.

Siulersuisut juunimi ataatsimiissapput, tassanilu periusissiaq, siunissami anguniagassat aningaasanillu katersuinerup ingerlateqqinnissaa pingaarnertut sammineqassapput.

Taamaattoqarneranili aningaasaateqarfiit Kalaallit Nunaata Eqqumiitsulianik Saqqummersitsivittaarnissaanut piareeqqaneranik qularunnaarsinniarlugit sulissutigineqarpoq.