Walls-imik ilitsersuisoq tuluit filmefestivalianni ajugaasoq

Filmimi piviusulersaarummi ‘WALLS – Akinni Inuk’, ilitsersuisut marluk, Sofie Rørdam Nina Paninnguaq Skydsbjergilu, tuluit Raindance Fim Festivalianni siullermeerlutik ilitsersuisuni pitsaanerpaatut akissarsipput.

'WALLS - Akinni Inuk' arnat marluk pisuni immikkuullarissuni naapinnerannik oqaluttuartuuvoq.

Assi: Anorak Film / Inuk Silis Høegh

Thomas Munk Veirum Thomas Munk Veirum Tusagassiortoq

Saqqummersinneqarpoq 28. Juuni 2026 - 13:00

Ilitsersuisut Sofie Rørdam Nina Paninnguaq Skydsbjergilu sapaatip akunnerani uani filmimik 'WALLS - Akinni Inuk' sulinerminnut nersorinnissummik akissarsisinneqarput.

Taakkumi marluk ‘siullermeerlutik ilitsersuisut pitsaanersaannik’ tuluit Raindance Film Festivalianni nersornaammik akissarsitinneqarput.

Nina Paninnguaq Skydsbjergip Facebookimut ivertitamini akissarsisinneqarnini nuannaarutigaa:

Ussassaarut

– Suli paasigunanngilara. Nersornaat manna qanoq kinguneqassanersoq suli paasilluanngilara – nuannersorujussuusorli nalunngilara. Filmimut, uatsinnut kalaallillu oqaluttuaannut, filmimik ilitsersuisoq ivertitamini allappoq, tassanilu filmiliornermi inuit pingaarutillit arlallit aamma qutsavigai.

'WALLS - Akinni Inuk'-mmi kalaallit arnat marluk Nuummi anstaltimi naapinnerannik imaqarpoq.

Arnaq siulleq Ruthimik ateqarpoq, taannalu piffissaligaanngitsumik parnaarussaavoq, aappaalu tassaavoq filmimi produceri Nina Nuumminngaanneersoq, taannalu Kalaallit Nunaanni parnaarussivinni piviusulersaarummik suliaqarnermini Ruthip inuuneranut akuulerpoq.

Filmi danskit filmfestivalianni CPH:DOX-imi nunarsuarmi takuteqqaarneqarpoq, tassanilu Nunani Avannarlerni Piviusulersaarutit Pitsaanersaattut akissarsitinneqarpoq.

2025-mi filmi aamma Kalaallit Nunaata Oscarimut komitéata Nunarsuarmi Filmini Pitsaanerpaatut Oscarimut innersuuppaa.