10,3 millionit koruunit Kalaallit Nunaanni piviusulersaarusiornermut iluaqutaassapput

Kalaallit Nunaanni Filminstittutip nunaqavissut filmiliortartut atugarissaarnerunissaat, piginnaasallit nukittunerulernissaat aamma kalaallit oqaluttuaat amerlanerusut nunatsinni nunanilu allani isiginnaarneqarsinnaalernissaat anguniarlugu 10,3 million koruuninik piviusulersaarusiornermut aningaasaliissuteqarpoq.

Aammattaaq Kalaallit Nunaanni filmiliornermik ineriartortitsinermi nukittunerusumik piujuartitsinerusumillu alloriarneruvoq pingaarutilik, aamma filmiliornermi siunissaq ungasinnerusoq eqqarsaatigalugu annertunerusumik aningaasaliisoqartalerneranut tamanna aallarniutaavoq.

- Periarfissaq tamanna qujamasuutigaarput, neriuppugullu tamanna kalaallit filmiliortarnerannik annertunerusumik siunissamullu ungasissumut aningaasaliinissamut, tamanna aallarniutaassasoq. Aamma annertuumik kissaatigaarput aningaasanik siunissami nassaartoqarsinnaanissaa, kalaallisut filmilianik ineriartortitsinermut tunisassiornermullu tapersersuinissamut, taamaalilluta filmiliortartut nukittorsarnissaannut aqqutissiutissavagut, Malik Kleist oqarpoq.

Kalaallit Nunaanni Filminstittuttip aningaasanik agguaanerani kalaallit filmiliortut piviusulersaarusianik arlalinnik, Kalaallit Nunaanni inuiaqatigiit, kulturiata siunissaatalu sammineqarnerannik, ineriartortitsinissamut piviusunngortitsinissamullu periarfissaqalerput.

- Kalaallit piviusulersaarusiortartut nukittorsarnissaannut filmiliortartunillu amerlanerusunik inuiaqatigiinnut, kulturitsinnut siunissatsinnullu pingaarutilinnik oqaluttuanik namminneq kalaallisut oqaluttuarsinnaalernissaannut tamanna periarfissatsialaavoq. Oqaluttuat Kalaallit Nunaannit pisut amerlanerusut kivinnissaannut ersersinnissaannullu maanna periarfissaqalernerput pingaaruteqarpoq, Kalaallit Nunaanni Filminstituttimi siulittaasoq Malik Kleist oqarpoq.

Aningaasat nutaat atorlugit kalaallit piviusulersaarusiortartut filmiliortartullu filminik ineriartortitsinissamut filmiliornermullu periarfissaqarnerulerput.

Kalaallit Nunaanni filminstitutimi immikkoortoq nutaaq

Aningaasat 10 millionit koruunit Danmarkimi aningaasanut inatsimmiit nuunneqarsimasut aamma aaqqissuussap sinaakkutissaanik pilersitsinermut, ilaatigut malittarisassanik suliaqarnermut institutillu nittartagaata naammassinissaanut atorneqarumaarput.

- Suliassaq annertooq tassaavoq Danmarkimit aningaasaliissutit tigunissat, malittarisassaat suliarinissaat, nittartagaq naammassissallugu minnerunngitsumillu qinnuteqaatinik nassiussivik sukkanerpaamik ineriartortinnissaa anguniarneqarpoq. Kalaallit piviusulersaarusiortartut amerlasuut aningaasanut taakkununnga qinnuteqarsinnaalernissaq utaqqisimavaat. Maanna kiisami qinnuteqartitsisinnaalerpugut, Filminstituttimi pisortaq Inunnguaq Petrussen oqarpoq.

Aningaasaliinissamut qinnuteqarsinnaavutit aggustip 24-anniit septembarip 24-annut 2026