Aataa ernutaasa nalliuttorsiornissamut atisalersorpaat

Lars-Emil Johansen, “pingajoraq” kingulleq, sapaatip-akunnerani kingullermi 80-iliivoq.

Napparsimmavimmi sivisuumik uninngareerluni inuuissiornissani ullualunnik sioqqullugu angerlarpoq, peqqinnissaqarfiullu nipaallisaanik aalajangersimaqqissaartunik tunsimammani inuuimmini ernuttani ilagalugit ullaakkorsiornermik aallarnerlugu nalliussisinnaasimallunilu ualikkut Hotel Hans Egedemi malunnartitsinissamut piareersarsinnaasimavoq, tamannalu matumani AG-mut oqaluttuaraa.

- Piffissaq kingulleq atorlugu anmoraara ullomut atugassatut mersortitara allanngortittariaqarnikuuara, tassami Jens-Frederik Nielsenip takkukkami anoraavanut assinguallaarpoq. Annoraaminertaa taannarpiaavoq, politikkilerinermi misilittagaqarluartoq illarpoq, taassumalu tamannarpiaq Naalakkersuit siulittaasuat takkummat aamma quiasaarutigisimavaa.

Taamaammat Lars-Emil Johansenip ernuttani inersimasut ikiortigalugit annoraamik allamik, tungujortumik taarnerusumik, assuuterpalaartumik toqqaavoq. Taakkua aamma aatamik nersornaatini atissagai kissaatigaat. Nammineq oqarnermisut „nersornaaterpassuaqarpoq“. Toqqaaniarsarereeramillu naggataatigut kalaallit nersornaataat sakiaminiitillugu danskillu nersornaataat ujamiliullugu ativai. Naggataatigulli Nersornaat kuultiusoq naammattoq tamarmik isumaqatigiissutigaat, taamatullu pivoq.

Malunnartitsineq aallaqqaammut qaaqqusanut taamaallaat ammavoq, kisianni politikerip misilittagaqarluartup ullorsiornera amerlasuunit tusarneqarsimammat akunnittarfimmi ini tamanut ammasunngormat allaat ilaatigut erinarsoqatigiit, Glenn Møller, Malu, Juaaka, Kaaleeraq Møller Dalsgaard, Katsi Kleist appisimaarlutillu soorunami aamma inuuissiortoq appeqataallattaavoq.

- Ualeq nuannerluinnarpoq! Nuannaangaarama unitsissinnaanngingajappugut. Nalunaaqutaq arfinernut anisussaagaluarpugut, kisianni nalunaaqutaq 18.30 missaani taamaatikkiartulerpugut, inuuissiortoq nuannaarpasilluni oqarpoq, taannalu tunissuterpassuarnik kusanartunik angerlaassivoq. Ilaatigut Vivian Motzfeldtimit immikkut qaaqqusaasumit allaammik tunisippoq.

- Uanga taanna nuannarinerpaavara, taanna oqarpoq.

Tunissutit nuannernerpaat ilagaat Thue Christiansenip paniata angajulliup dna-mik misissortinnissaanut tunissutaa. Aamma Deres Automit tunissutisiani nuannaarutigaa, taannalu qaammammut ataatsimut biilimik attartornissamut, pisariaqartitaanut, akiliummik imaqarpoq. Namminerli isigiarsuppallaarami erngutaasa ilaat aquttuusassaaq.

Tunissutigineqartut ilaat oqaluttussartaqarpoq. Lars-Emil Johansen ukiuni qulikkuutaani imerajuttuusimasoq nalunnginneqarpoq, tamatumunngalu atatillugu AA aqqutigalugu immikkut ittumik paasisaqarsimalluni oqarpoq:

- Misilittakkanik avitseqatigiittarneq neriuuteqalersitsisarpoq, Lars-Emil Johansen oqarpoq.

Peqatigiiffimmi Uummatini ilaasortaanerminut atatillugu aamma taamaaliortarpoq, tassani nappaatini pillugu oqalugiartarluni angalasarlunilu sapaatit-akunneri tamaasa Dronning Ingridip Napparsimmavissuani uummatiluttunut pulaartarpoq.

- Ilikkagaqangaarama affaannai naammakkaluarput, taanna oqarpoq.

Ulloq aallartinnermisut eqqissisimasumik naggaserneqarpoq: aataami ernuttallu nereqatigiinneq.