Agga Dam Pedersen kulturikkut nersornaasigaasoq

Naalakkersuisut kulturikkut nersornaasiuttagaat, Agga Dam Pedersenimut ullumi tunniunneqarpoq. Tamanna Nuummi kulturikkut illorsuarmi, Katuami, persuarsiorpalaartumik ingerlanneqartumi pivoq.

Agga Dam Pedersen isiginnaartitsisartuuvoq erinarsortartorlu nuna tamakkerlugu ilisimaneqarluartoq. 

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D), nersornaammik tunniussivoq.

- Agga Dam Pedersen eqqumiitsuliortuuvoq ersarissoq, inuunini tamaat kalaallit kulturiannik sunniisimasoq. Raatiukkut meeqqanut aallakaatitassianik suliaqartarluni aallartippoq, kingusinnerusukkullu TV-mi Nissikkut aamma Atsa-Rosa aqqutigalugit inuiaqatigiinni nuannarineqarlualerluni.

- Tuukkaq Teaterimi patajaatsumik ilinniagaqarluni aamma isiginnaartitsisarnerup, filmiliaritittarnerup aamma nipilersortarnerup iluani kalaallit oqaluttuaannik tusarnaartartunut isiginnaartartunullu siammasissumik suleqataasimavoq.

- Suliniuteqartarnerisa kinguaariit arlallit sunnersimavai 2024-milu Nuuk International Film Festivalimi ataqqinaammik nersornaaserneqarluni. Taamaattumik Naalakkersuisut ukiumi kulturikkut nersornaammik tunissavaat, Naalakkersuisoq tusagassiorfinnut nalunaarummini oqarpoq.

Agga Dam Pedersen maajip arfineq-aappaanni 75-inik ukioqalerpoq.

Naalakkersuisut Kulturikkut Nersornaat 1982-mi pilersippaat. Nersornaat 50.000 koruuninik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarluarsimasunut tunniunneqartarpoq.

Anda Otto Schmidt kajumissaasigaasoq

Naalakkersuisunut ilaasortap kulturikkut nersornaat tunniutsinnagu kajumissaatitut ukioq manna nersornaat inuttassaanut tunniuppaa. 

Anda Otto Schmidt, Andachan-imik eqqumiitsuliortutut ilisimaneqartoq, kajumissaasigaavoq. Taanna nipilersortartuuvoq.

- Anda Otto Schmidt, Andachan-itut ilisarisimaneqartoq, kajumissaatitut nersornaatisissaaq eqqumiitsuliornermi ineriartorsimanini kiisalu kalaallit nipilersuutaannut immikkuullarissumik tunniussisarnini pissutigalugit.

- Kalaallit oqaasiisa aamma kulturiata ataatsimoortinnerini, ullutsinni qarasaasiaq atorlugu nipiliornerit nutaaliaanerusut atorlugit, nunat tamat akornanni nipilersornermi immikkuullarissumik ersarissumillu pilersitsivoq.

- Piginnaasai, aalajaatsuunera aamma nuannarineqarneruleriartornera, - nunatsinni aamma nunat tamat akornanni - Kalaallit Nunaanni nipilersortartuni kinguaariinni kingullerni nutaajusut akornanni isumassarsiorfissatut sinniisuulluartoq, Naalakkersuisoq oqarpoq.

Anda Otto Schmidt ukioq manna 31-nik ukioqalerpoq.

Kajumissaatitut nersornaat 10.000 koruuninik aningaasartaqarpoq. Naalakkersuisut kajumissaat 2016-imit tunniuttalerpaat.