Arnarulunnguaq nammineq oqaluttuatsinnut tunngavoq

Ukiuni 105-inngortorsiorneq nalliuttorsiutigineqarajunngilaq. Umiarsuulli »Søkongen«-ip Nuummiit Inuit nunaata sinneranut aallarneranit septembarimi ukiut 105-inngortorsiornera eqqaamasariaqarparput. Taamani 25-nik ukiulik Arnarulunnguaq umiarsuarmut ilaavoq, taannalu 1921-miit 1924-mut Thulemi ilisimasassarsiornerup tallimassaanni 18.000 kilometerit tamaasa ilaavoq. Kalaallit Nunaat Issittorlu pillugit ilisimatusarnermi kandidatitut (cand.mag., aaqq.) ilisimatusarsimasoq Ivalo Olsvig qimussimik angalarujussuarnermi arnaaqqamut inussiarnersumik eqqaamannittorpassuit ilagaat, taannalu Københavnimi Rigshospitalimi septembarip 22-ani Arnarulunnguaq pillugu oqalugiassaaq.
– Issittumi ilisimatusartoq Knud Rasmussen ukiuni hundredelinni tamani ataqqineqartuarsimasoq sooq Arnarulunnguaq taama sakkortutigisumik nalitsinni eqqaamaneqarpa?
– Arnarulunnguaq siornatigutut nalitsinnut naapertuunnerusooq isumaqanngilanga. Immaqa ullumikkut oqaluttuarisaanermut allatut apeqquteqartarpugut, Ivalo Olsvig Sermitsiamut oqarpoq.
– Ilisimasassarsiornerit annertuut ukiorpassuarni ilisimasassarsiornermini aqutsisumut ilisimasassarsiortorsuarmullu tunngatillugit oqaluttuarineqartarput. Thulemi ilisimasassarsiornerit tallimaanni Knud Rasmussen pineqarpoq. Ullumikkut ilisimasassarsiornerit iluatsinnissaannut kikkut peqataasimanersut, sunik piginnaasaqarsimanersut inuillu kikkut aqqutaani ikiuussimanersut aperinerulernitsinni inuit allat saqqummertalerput.

Kalaallit Nunaata oqaluttuarisaanera — Kalaallit Nunaannit oqaluttuarineqartoq

Ivalo Olsvig Arnarulunnguaq Qaavigarsuarlu kiisalu taakkua Thulemi ilisimasassarsiornerup tallimassaanni peqataanerat immikkut sammillugit Københavnip Universitetiani 2018-imi kandidatinngorpoq. Taamanimiilli Arnarulunnguaq oqalugiaatit allaaserisallu aqqutigalugit malinnaaffigisimavaa, aammalu tusarliussassanik suliniutini siunnersortitut, ilaatigut Arnarulunnguaq pillugu isiginnaagassiamik suliaqarsimalluni. Ullumikkut Københavnimi Nordatlantens Bryggemi attaveqatigiinnermi sulisuuvoq, saniatigullu nammineq siunnersuisarfimminik Ivalo Olsvig-imik (ivaloolsvig.com) ingerlatsilluni.
– Arnarulunnguaq oqaluttuarisaanermik allaaserinnittartut nalinginnaasumik ersersinngisaminnik arlalitsigut sammisaqarfigaat: Taanna arnaavoq, inuk/inughuaq, ilisimasassarsiornermi aqutsisuunngitsoq, kisianni suliai, ilisimasai ingerlaneranilu inissisimaffia angalanissamut tunngaviusimapput. Soqutiginninneq nutaaq taamaallaat arnamut puigorneqartumut erseqqissaatitut paasineqassanngitsoq isumaqarpunga. Tamanna kalaallit namminneq oqaluttuarisaanerminnut isiginnittaatsimik soqutiginninnerulernermut - kalaallillu ilisimasassarsiornermi aqutsisunut sulisuuginnarnatik oqaluttuarisaanermi peqataasutut isigineqarnerannut - attuumassuteqartoq isumaqarpunga, Ivalo Olsvig oqarpoq.
- Kalaallit Nunaata oqaluttuassartaa annertooq inunnit avataaneersunit allanneqarlunilu oqaluttuarineqarsimavoq, Kalaallit Nunaatali oqaluttuassartaa kalaallit isiginnittaasaannit ukiuni makkunani oqaluttuarineqarnerulerpoq. Arnarulunnguup massakkorpiaq maluginiarneqarnera Kalaallit Nunaat pillugu qanoq kikkullu oqaluttuartuunissaannik ukkassinerup allanngoriartorneratut aamma isigineqassaaq.
- Sermitsiap apeqqutaanut naatsumik akissaguma: Arnarulunnguaq ukiuni kingullerni pingaarnerulinngilaq. Qanorli pingaaruteqartuartigisimasoq paasilluarsinnaanerulerparput, Ivalo Olsvig oqarpoq.