Atuagaateqarfimmi ulapaarneq

Elisa Petersenip, Nunatta Atuagaateqarfiani pisortap, ulapaarnissaq qilanaarisinnaavaa, tassami nalliuttorsiortoqarlunilu atuakkiornerup oqaluttuarisaaneranni ateq pingaarutilik ukkatarineqassaaq.

Taalliortoq palasilu Otto Rosing (1896-1965), atuakkiortuunerminit qanga Kalaallit Nunaanni inuunermik oqaluttuartarsimasoq, oktobarip arfineq-aappaanni eqqaaniarneqassaaq. Tuparnaaq Rosing Olsen atuakkiortuunera pillugu saqqummiussissaaq, Minik Hansenilu, Sauwestaritut ilisimaneqartoq, Otto Rosingip atuakkiaasa ilaannit atuffassissaaq. Aamma erinarsoqatigiit N.I.P.E. Otto Rosingip erinarsuusiaanik tussiusiaanillu erinarsussapput.

Tamannali sioqqullugu allaanerulluinnartumik nalliuttorsiortoqassaaq. Nuummi atuagaateqarfiup illutaa immikkuullarissoq 1976-imi naammassineqarpoq, tamatumalu kingunerisaanik Nunatta Atuagaateqarfia ukioq manna ukiunik 50-inngortorsiorluni nalliuttorsiussaaq. Tamanna malunnartinniarlugu atuagaateqarfimmi atuisut kaffillerfigineqassallutillu soqutiginartunik sammisaqartitsisoqassaaq. Ulloq ilaatigut assinik takutitsilluni, inuuissiortoorluni erinarsorluni nuannisaqatigiillunilu malunnartinneqassaaq, Nunatta Atuagaateqarfia nittartakkamini allappoq.