Eqqumiitsuliortoq kusanartuliortorlu Barse Svendsen eqqissivoq

Barse Svendsen asasaavoq ataqqisaallunilu, ilisimaneqarporlu ukiut 30-t tungaanut  eqqumiitsuliorlunilu kusanartuliortuusimanini pillugu, pingaartumik ilisimaneqaatigivaa kulturerput tunngavigalugu ileqqutoqqanik kalaallit atortorisartagaannik eqqumiitsuliorlunilu kusanartuliortuunini. 

Suliai kusanartuliat nunatsinni piumaneqarluartuupput, aammali nunarsuarmi tamarmi, tassanilu inuit amerlasuut, Kalaallit Nunaannut tikeraarsimasut, kusanartuliaanik pisiariumannilluartarmata.

Ulluinnarni Barse eqqumiitsuliortut sannavianniissalluni nuannarisaqartuuvoq, siullermik Sisimiuni kingornalu Nuummi. Atortussani pisiarisarpai nunatsinni piniartunit, tassami pingaartitarigamiuk atortussani piniartunit nunatsinneersunit aallaaveqassasut. 

Assersuutigalugu tuttut nassui, aarrit kigutai tuugaavilu, nannup niaqui, puisit nannullu kukii nunatsinni piniartunit pisarisarpai aammalu  savat Kujataaniit nassui atortuilu ilanngullugit pisarpai kusanartuliaralugillu, soorlu assiliaatissat mikisunnguit, pinnersaatissat saviillu sanasarpai kusanarluinnartunngorlugit.

Maanna akornatsinniigunnaarpoq, decembarip 14-ani 2025 sivisuumik napparsimareerluni toqukkut qimagukkami. Inunngorpoq siusinnerusukkut Qullissani 1952-imi, tassani najugaqarsimavoq illoqarfiup 1972-imi matuneqarnissaata tungaanut. 

Barse Svendsen nuannaarnermik kissalaamillu sumiikkaluaraangami pilersitsisarpoq, kisianni tusagassiuutitigut saqqumilaartuuniartuusimanngilaq, taamaattorli Sermitsiaq iluatsitsisimavoq oqaloqatigalugu.

Apersorneqarnera atuarsinnaavat Sermitsiap juullimut saqqummiuttagaani 2018-meersumi,  kalaallisut qupperneq 8-mi danskisullu qupperneq 10-mi, tassanilu suleqatitta Oline Inuusuttoq Olsenip  arts and crafts workshop-imi Sisimiuniittumi sanaluttoq pulaarlugu oqaloqatigivaa.

Barse Svendsen Nuummi marlunngornermi ilisaavoq. Qimappai nuliani, qitornatik, ernuttani qatanngutini ilaquttanilu.