Filmiliortartut peqatigiiffianni Film.gl-imi Mads Madsen siulittaasunngorpoq. Isiginnaartitsisartoq ilitsersuisorlu ilinniarsimasoq, filmiliornermik ingerlatsivimmik Arctic Creativemik pilersitsisuusoq, ataatsimeersuarnermi maajip 30-ani 2026-mi siulittaasutut qinerneqarpoq. Tamatumunnga atatillugu peqatigiiffiup ilaasortaanut ima oqalugiarpoq:
- Film.GL piffissamut nutaamut inissippoq. Filminstitut ullumikkut piviusunngorpoq, tamassuma piviusunngorneranut Klausi (Georg Hansenip, aaqq.) annerusumik tamatumunnga pissutaavoq. Ukiuni arfineq-marlunni siulittaasuuneq, politikkikkut naammagittarluni ukiuni arfineq-marlunni suliniuteqarneq, tamatigut takuneqarsinnaanngitsoq, inuussutissarsiutip nikisinneqarfia aqqusaarsimanngisarput. Tunngaviup tamatuma tunngavilerneqarneranut qujassutissaqarfigaarput. Tamanna maanna ineriartorteqqissinnaanngorpara, Mads Madsen ilaatigut oqarpoq.
Filmiliortartut peqatigiiffianni Film.gl-imi Mads Madsen siulittaasunngorpoq. Isiginnaartitsisartoq ilitsersuisorlu ilinniarsimasoq, filmiliornermik ingerlatsivimmik Arctic Creativemik pilersitsisuusoq, ataatsimeersuarnermi maajip 30-ani 2026-mi siulittaasutut qinerneqarpoq. Tamatumunnga atatillugu peqatigiiffiup ilaasortaanut ima oqalugiarpoq:
- Film.GL piffissamut nutaamut inissippoq. Filminstitut ullumikkut piviusunngorpoq, tamassuma piviusunngorneranut Klausi (Georg Hansenip, aaqq.) annerusumik tamatumunnga pissutaavoq. Ukiuni arfineq-marlunni siulittaasuuneq, politikkikkut naammagittarluni ukiuni arfineq-marlunni suliniuteqarneq, tamatigut takuneqarsinnaanngitsoq, inuussutissarsiutip nikisinneqarfia aqqusaarsimanngisarput. Tunngaviup tamatuma tunngavilerneqarneranut qujassutissaqarfigaarput. Tamanna maanna ineriartorteqqissinnaanngorpara, Mads Madsen ilaatigut oqarpoq.
Maannakkut kalaallit filmii immikkut inissisimasut, arlalitsigut oqaatigineqarpoq.
Tamanna qanoq paasisariaqarnersoq qanorlu pisimanersoq pillugu AG-p Anders Grønlund sianerfigaa. Taassuma Kalaallit Nunaannit aamma Kalaallit Nunaat pillugu filmiliarineqartartut misissorsimavai, erseqqissarpaalu qanoq pilersinneqartartut. Kalaallit filmiliaasa ineriartornerat pingasunut avinneqarsinnaasoq – kingullerlu maannakkut inissisimaffigineqartoq, taanna oqarpoq.
Filmit pillugit ilisimatusartup Anders Grønlundip 2023-mi ph.d.-nngorniarluni allaaserisamini ‘Greenlandic Frames’-imi Kalaallit Nunaanni filmiliortarneq, Kalaallit Nunaannullu filmit tunngassuteqartut, misissuinermini sammivai.
Assi: Johan Persson
Pisoqaqqajaasoq
Kalaallit Nunaanni filmiliortarneq aallaqqaammut pilersinneqarpoq.
- Kalaallit Nunaanni namminerisamik filmiortoqarsinnaanera tunngavissinneqarpoq. Naammattunik inuttaqarluni kalaallinut tunngasunik, kalaallisut oqaaseqarlutik kalaallinullu tunaartaqarluni filmiliortoqarsinnaalerpoq.
1980-ikkunnili tamanna aallartittoq, Anders Grønlund oqarpoq.
Assersuutigalugu 1985-imi filmi "Takorluukkat Sisamat“ KNR-ikkut takuteqqaarneqarpoq. Taanna kalaallinik ilitsersuisoqarpoq, allanneqarluni aningaasalersorneqarlunilu. Filmi akunnermik ataatsimik affarmillu sivisussusilik pisuusaartitaavoq, ilutigalugulu aalakoornartumut paasititsiniutaalluni.
Angut inuusuttoq Ujarammik atilik, imingasamik atuipilunneq pissutigalugu inuunera ajorsiartuinnartoq pillugu oqaluttuaavoq.
- Aammattaaq KNR-ip juullimut ammartagaliaa kalaallisut saqqummersinneqartartut arajutsineqartut ilagaat, Anders Grønlund oqarpoq.
Naak immikkoortut naatsunnguugaluartut aningaasallu amerlanngitsut atorlugit suliarineqarsimagaluartut, annertuumik suliaqarnermik piumasaqaateqartarsimapput. Anders Grønlundip isumaa naapertorlugu, kingusinnerusukkut Kalaallit Nunaanni filminik suliaqarnermi inuit pingaaruteqalersut amerlasuut tassani aallartissimapput.
- Taamanerniit ingerlaartoqalereerpoq.
Nunarsuaq tamakkerlugu maluginiarneqarneq
2009-mi allanngortoqarpoq.
FILM.GL-IMI SIULERSUISUT NUTAAT
Film.gl-imi siulersuisut nutaat:
Mads Madsen, siulittaasoq
Peter Jensen, siulittaasup tullia
Inuk Jørgensen, aningaaserisoq
Ane Lena Fussing Rosbach, ilaasortaq
Siulersuisunut sinniisussatut ilaasortat tassaapput Alberte Parnuuna, Dennis Møller aamma Varna Marianne Nielsen.
- Ineriartornermi alloriarnerup aappaata ukiuata aallartiffia oqaatigissallugu ajornanngitsunnguuvoq, tassami ´Nuummioq´ takuteqqaarneqarnerani tamanna pimmat, Anders Grønlund oqarpoq.
Angutip kræfteqalernermi paasinninnerata kingunerisaanik, sivikitsuinnarmik inuusussanngornera pillugu filmiliaq.
Anders Grønlundip allaaserisaqarnerminut atatillugu Kalaallit Nunaanni filmiliortartut tusaamasat arlallit apersorpai, ilaatigut ilitsersuisoq Otto Rosing.
- Kalaallit Nunaata allaanerulluinnartup takutinnissaa pingaartinneqarpoq, danskit nunallu allat isiginnaagassiaanni saqqumilaarpallaarsimasunit allaanerulluinnartumik. Otto Rosing apersorakku, taassuma oqaatigaa ´Nuummioq´aqqutigalugu Kalaallit Nunaat qanoq ittuunersoq takutikkusussimagaa.
Filmi kalaallinnit filmiliarineqarsimasutut siullersaattut nunanit tamalaanit isiginnaarneqartussatut nittarsaanneqarpoq.
- Isumaqarpunga ’Nuummioq’ kalaallinit filmiliarineqarsimasuni siullersaanngitsoq. Taamaattorli nunani tamalaani kalaallinit filmiliarineqarsimasuni tusaamasaanerulersoq isumaqarpunga.
Filmi "Nuummioq" kalaallit filmiliaat nunani tamalaani maluginiarneqartoq.
Assi: Greenland Eyes
Taamanerniilli assigiinngitsorpassuarnik pisoqarpoq, Kalaallit Nunaanni filmiliortarnermik inisseeqataasunik. Namminerisamik, aammali nunat tamalaat akornanni filmiliortarfinnik suleqateqarsinnaanermik naqissusiisumik, Anders Grønlund oqarpoq.
Film.gl 2012-imi pilersinneqarpoq.
- Peqatigiiffik pingaaruteqarluinnarpoq, kalaallit filmiliortartut nukiinik katugutsitsisoq nunanut allanut sinniisuuvoq, assersuutigalugu Berlinalenimi (Berlinimi nunat tamalaat akornanni filmfestival aaqq.), Anders Grønlund oqarpoq.
Filmfestivali siulleq 2017-imi ingerlanneqarpoq, filmiliortarfillu 2018-mi pilersinneqarluni. Tamatuma saniatigut kalaallit filmiliaat arlallit suliarineqarsimapput, taakkualu ilaat nunat tamalaat akornanni filminik nersornaasiunneqartartunut innersuunneqartarput.
Filmeeraq ´Ivalu´, Anders Walterimit Pipaluk Kreutzmann Jørgensenimiillu ilitsersorneqartoq 2022-mi Oscarimut innersuunneqarpoq. Malik Kleistillu filmiliaa ´Alanngut Killinganni´ 2023-mi Nordisk Rådip filminut nersornaasiuttagaanut innersuunneqarluni.
Filmeeraliaq “Ivalu” 2023-mi Oscarimut innersuunneqarpoq.
Assi filmimit tigusaq: 'Ivalu'
Kalaallit filmiliaannut ukiut taakkua pissanganarluinnarput. Sakkortusimallutillu.
Filmiliortarneq nukittorsarneqartoq
Filmip naanerani peqataasut allattorsimaffianni ima allassimasoqarpoq:
“Qanortoq kalaallit filmiliortartut tapersersorsigik, una filmi aningaasat amerlanngitsut atorlugit suliaavoq.”
Filmiliornermi ukiut ingerlaneranni unamminiagassat, annerpaat ilaat tassaavoq suliap aningaasalersorneqarnissaa. Filmiliorneq eqqumiitsulioriaasiuvoq akisoorsuaq, aningaasassarsiorsinnaanerlu unamminartupilussuusarpoq.
- Inuussutissarsiut taanna aningaasaqarnikkut tunngavissaqarpianngitsutut oqaatigineqartarpoq, Anders Grønlund oqarpoq.
KALAALLIT NUNAANNI FILMINSTITUT NUTAAQ
Inunnguaq Petrussen Kalaallit Nunaanni Filminstituttip pisortaatut 2025-mi decembarip aallaqqaataani atorfinippoq.
Kalaallit Nunaanni Filminstituttip siunertaa:
• Filmiliortarnerup, filmertarfeqarnerup festivalertitsisarnerillu nunarput tamakkerlugu siuarsarneqarnissaa
• Filmiliortartut TVkkullu aallakaatitassiortartut nunanit allaneersut nunatsinnukarsinnaanissaanut kajumilersitsiniarnissaq
• Kalaallit filmiliaasa nunatsinni nunanilu allani ilisimaneqarnerulernissaat
• Piukkunnaatilinnik aammalu filmiliortarnerup eqqumiitsuliatut ingerlanneqarnissaanut ineriartortitsineq
• Nuna tamakkerlugu filmkommisionitut akisussaaffimmik isumaginninneq
Najoqqutaq: Naalakkersuisut
Inuussutissarsiummi tassani ukiuni tallimani - qulillu akornanni, allanngoriartortoqarpoq. Assersuutigalugu NORDDOK aamma Arctic Indigenous Film Fund filmiliortartunut aningaasaliissutinik nutaanik periarfissiinerisigut.
- Taamaattorli oqarusuppunga 2009-mi aallartittoq suli ingerlaarusaartuarpoq, Anders Grønlund oqarpoq.
Taamaakkaluartoq Kalaallit Nunaanni Filminstitutti nutaamik aallartitsinertut ippoq.
- Politikkikkut suliniuteqarneq, aningaasatigut tapersersuineq ilisimasanillu katersinerit aqqutigalugit inuussutissarsiutip nukittorsarnissaa maannakkut anguniarneqalerpoq.
Film.gl-ip ineriartorneq annertooq maannamut ingerlassimavaa, tamannalu kajumissutsimik sulinermik aallaaveqartoq, Anders Grønlundip tikkuarpaa.
Aammattaaq nunat tamalaat akornanni Kalaallit Nunaanniit filmiarineqartartut ukiuni kingullerni maluginiarneqaleraluttuinnarput.
- Nunarsuaq tamakkerlugu ukkatarineqarneq ukiuni qulikkuutaani ilungersorluni sulisarsimaneq, nunanilu allani misilittagaqarluarneq filminstituttimik pilersitsinikkut Kalaallit Nunaanni filmiliortarnermik allanngortitserataannaavoq.
