ANINGAASANUT INATSISISSATUT SIUNNERSUUT
Partiit aningaasaqarneq pillugu kissaaterpassuaqartut
Aningaasanut aappaagumut inatsisissaq Inatsisartunut ilaasortat marlunngornermi suliaralugu aallartippaat. Partiit oqaaseqartuisa kissaataat amerlaqaat. Tamakkua tamarmik piviusunngorumaarnersut isumaqatigiinniarnerni nalunarunnaassaaq.
Naalakkersuisut aningaasanut aappaagumut inatsisissatut siunnersuutaat, Inatsisartunut ilaasortat marlunngornermi oqaasertalersuiffigaat.
Assi: Oscar Scott Carl
Aningaasanut aappaagumut inatsisissatut Naalakkersuisut siunnersuutaat, Inatsisartunut ilaasortat siullermeerlugu marlunngornermi oqallisigaat. Aningaasaqarnermut Naalakkersuisoq, Aqqaluaq B. Egede (IA) saqqummiussereermat, pisarneq malillugu partiit oqaaseqartui siunnersuummut oqaasertaliillutik sassarterput.
Partiit tamarmik oqaasissaaleqinngeqaat. Oqaaseqaatit quppernerpaalussuarnik takissusillit oqaluttarfimmit anninneqarput. Taakkua ilaat Sermitsiap tigulaariffigai.
Naleraq: Aningaasat atorluarneqarunik amigaataanngikkaluarput
Naalakkersuisut nunap karsia aappaagu 89 millionit koruuninik amigartoortussatut missingersuusiorfigaat. Naleqqap oqaaseqartua, partiimi siulittaasoq, Pele Broberg, ilaatigut oqarpoq aningaasat pisariaqartinneqartut eqqarsarluarluni atorneqarsinnaagaluartut.
- Nunatsinni aningaasat amigaataanerat ajornartorsiutituaanngilaq. Aningaasat qanoq atorneqartarnerat aamma apeqqutaavoq, taanna oqarpoq.
Taassuma isumaa naapertorlugu ingerlatsinermi allaffissorneruleriartorfiusumi sipaaraanni, siunnersortinillu atuineq annikillisikkaanni aningaasaqarneq oqimaaqatiginnerusinnaavoq.
- Naalakkersuisut allannguinissamut piareersimappata, Naleraq aningaasaqarnikkut akisussaassuseqartumik isumaqatigiissuteqarnissamut piareersimavoq. Pele Broberg oqarpoq.
Taassuma siunnersuutitik aningaasaqarnermut naalakkersuisoq isumaqatigiinniarfigilerunikku saqqummiutissallugit ilimasaarutigaa.
Atassut: Akileraartarnermut aqutsisoqarfimmut aningaasaliingaatsiarneq innuttaasut qanoq malugissavasat?
Naalakkersuisup aningaasanut inatsisissatut siunnersuut, tusagassiorfinnut katersortitsilluni aggustsip 20-ani saqqummiukkamiuk Akileraartarnermut Aqutsisoqarfiup qarasaasiatigut atortulersuutai 105 millionit koruunit atorlugit nutarternissaat aningaasaliiffigineqassasoq siunnersuutigaa. Tamanna innuttaasut ataasiakkaat qanoq malugissaneraat, Atassutip siulittaasuata, Aqqalu C. Jerimiassenip paaserusuppaa.
- Akileraartarneq qanoq siunissamut naalakkersuinikkut nalimmassarneqaqqissanersoq assut tusarusunnarsileqqavoq, ullumikkutut inissisimatilluta, takusinnaasatsinnilu atortorissaarutit nutarterneqarnissaannut millionerpaalunnik immikkoortitaqareernermi innuttaasut sullinneqarnerat akileraartarnermut aqutsisoqarfimmit qanoq malunniuteqassanersoq paaserusunnassalluni, partiip siulittaasua oqaluttarfimmit oqarpoq.
Taassuma Naalakkersuisut kommuninut ilageeqarnermullu aningaasaliinikillerusunnerat isumaqatiginngilluinnarlugu aamma erseqqissarpaa.
- Aningaasanut inatsisissatut siunnersuummi kommunit ajoraluartumik annertuumik eqqornerlunneqassapput, tassami nalingiissaarinermut tunngatillugu ataasinnguamilluunniit nalimmassarneqarnissaanut ersittoqanngimmat aningaasatigut.
- “Innuttaasut qanillugit inuiaqatigiinni patajaassuseq” qulequtarissagaanni taanna namminermini ajoraluartumik uniuutereerpoq, taannalu Atassummiit erseqqissumik uparuarumavarput, Aqqalu C. Jerimiassen oqarpoq.
Siumut allannguutissanik 35 millionit koruuninik akilinnik siunnersuuteqartoq
Siumup Naalakkersuisut suliniutissatut siunniussaat arlallit pitsaasutut isigaat. Soorlu Ilulissani Tasiilamilu ilinniarfiit nutaat, meeqqanut inuusuttunullu suliutit nikittorsarneqarusuttut, nukissiuutit peqqinnissaqarfimmilu pitsanngorsaatit.
Taamaakkaluartoq partii allannguutissanik namminneq naatsorsuinerik malillugu 35 millionit koruuninik nalilinnik siunnersuuteqarpoq. Taakkua ineqarnermut tapiissutit amerlineqarnissaanut, aalisarnerup ineriartortinneqarnerata aningaasalernissaanut, timersornermut pitsaaliuinermullu aningaasaliissutit amerlineqarnissaanut, akiitsoqalersimasunut siunnersuisarnerup nukittorsarnissaanut, eqqagassaleriniinnaq pillugu aningaasaateqarfiliornissamut talittarfiillu pillugit aningaasaliinerunissamut tunngassuteqarput.
- Tamatumalli saniatigut aamma Kommuunit akissarsiat akillu qaffakkiartornerat pillugu aaqqiiviginissaat Siumup kissaatigaa.
- Piumasaqaatit taakku amigartoorummik nutaamik pilersitsiniarnerunngillat. Aningaasalersuinissamullu periarfissaq siulleq tassaavoq Danmarkimi peqqinnissamut aaqqissuussinerup nutaap aningaasartuutit nunatsinni aningaasanut inatsimmi sillimmataareersut tiguppagit aningaasat “sinneqartoorutaasut” atorneqarsinnaaneri, Erik Jensen oqarpoq.
Taamali oqareerluni aningaasat taakkua namminneq siunnerfimminnut atorneqarsinnaassanersut qulakkeerlugu paaseqqaarusuppaa.
- Aappassaaneerinninnginnermili Naalakkersuisut tamanna ajornannginnersoq uppernarsaqqaalaartariaqarpaat.
Kommuninut ataatsimoortumik tapiissutit ukioq manna 1,9 milliardit koruunit sinneqalaartut aappaagumut 51 millionit koruuninik ikinnerulernissaat Naalakkersuisut siunnerfigaat. Tamanna Siumup isumaqatiginngeqalugu oqaasertaleqqippaa.
- Inatsisartuni ilaasortat maani issiasut arlalippassuit kommuunini assigiinngitsuni aamma qinikkatut atuuffeqarput, assersuutigalugu Kommune Kujallermi aammalumi Kommune Qeqertalimmi qinikkat maani siuttooqataasut arlaliupput. Siumumiillu tupigissaqaarput aningaasanut inatsit tamanna konto taamak isikkoqartillugu akueriniarneqassappat, tassami kommuunerisassinni Borgmesterit arlallit ilungersorlutik tusaaqqupput – taakkulu tusaaneqartariaqartut Siumumiit isumaqarpugut, Erik Jensen oqarpoq.
Demokraatit Naalakkersuisut siunnersuutaat nersualaarnerugaat
Demokraatit Naleqqap, Atassutip Siumullu allannguutissatut siunnersuutaannit, paaserusutaannit isorisaanniillu allaanerusumik isumaqarput. Tamanna partiip oqaaseqartuata, Margrethe Thårup Andersenip, oqaaseqarnerani erserpoq.
Aningaasanut inatsit amigartoortussatut siunnerfigineqaraluartoq Demokraatit partiinit allanit, qulaani taaneqareersunit, toqqissisimanerupput.
- Demokraatit isumaqanngillat, Nunatta karsiata aningaasaqarnera pisariaqanngitsumik toqqissisimannginnermik pilersitsissutigissallugu. Maannakkorpiaq aningaasatigut ajalusuulinngilagut. Aammali isigut matuinnassanngilagut ajalusooriataarsinnaanermut.
Taamaakkaluartoq 2029-imi 2030-milu sinneqartoornissamik siunnerfeqarneq suli mianernartuusoq taakkua isumaqarput.
- Missingersuutaasoq sinneqartoorut ukiuni arlalinni aggersuni pisussaq imaanngilaq karsimut aningaasaliinerusoq. Isertitat allaanermik naatsorsuutigisaniit ineriartorsinnaapput. Aningaasartuutit qaffassinnaapput. Nunani tamani pissutsit akinik, ernianik aningaasaliissutinillu allannguisinnaapput. Taamaattumik naatsorsuutigisat piviusorsiortuusariaqarput, mianersussaagullu isertitat atornissaannut, Margrethe Thårup Andersen oqarpoq.
Inuit Ataqatigiit: Ukioq ataaseq naammanngilaq
Kalaallit Nunaanni unammilligassarpassuaqartoq, taakkualu aningaasanut inatsisip ataatsip iluani tamaasa pitsaasunngortinneqarsinnaanngitsut, Inuit Ataqatigiit oqaaseqartuata oqaatigaa.
- Taamammat Inuit Ataqatigiit pingartippaat kissaatigalugulu qinigaaffiit akimorlugit partiit tamarmik ukiunut arlariinnut naalakkersuinikkut anguniagassanik isumaqatigiissusiortoqassasoq, Ane Hansen oqarpoq.
Taassuma anguniagassat ilaatigut makkuunissaat kissaatigaa: Meeqqanut tunngasut, ilinniartitaaneq, nuna tamakkerlugu ineqarneq atugarissaarnerlu kiisalu peqqinnissaqarfik.
Ane Hansenip politikkikkut ukiuni kingullerni oqallisaasoq, tassa ernisarfiit amerlassusaannut tunngasoq aamma eqqaavaa. Taassuma oqarnera naapertorlugu ernisarfiit amerlisariaqarput.
- Innuttaasut amerliartoqqilernissarput pisariaqartipparput taamammat Sinerissami ernisarfiit amerlisaqqinnissaat aamma qulakkertariaqarpoq, inuiaat kalaallit nunatsinni amerlanerunissarput anguniartuartariaqarparput, siunissami sullissinikkut kivitsisinnaasut qulakkeerumallugit, taanna oqarpoq.
Taassuma aamma kommuninut tapiissutit ilanngarneqannginnissaat erseqqissumik kissaatigaa.
- Kissaatigerusuppara kommuninut tapiissutit pisariaqartinneqaqisut ilangarterneqanginnissaat, kommunit sulisuminut atugarissartitsinissaq aamma pisariaqartivippaat innuttaasunik qanimut sullissinissaminnik pingaarutilinnik suliaqartuummata, Ane Hansen oqarpoq.
Aningaasanut aappaagumut inatsisissap aappassaaneernissaa oktobarip 26-ani pingajussaaneernissaalu novembarip aqqaneq-aappaanni pisussatut naatsorsuutigineqarput.
