Gasolin nutaamik saqqummersitsilersoq

Rasmus Lyberth, Julie Berthelsen aamma Frederik Elsner erinarsortartut nipilersortartullu Gasolin-ip saqqummersitseqqaarneranit ukiut 55-it qaangiuttut nuussuarmi marliusaasumi nutaami peqataassapput.

Nuussuarmi GAS 1-imi novembarip 21-ani saqqummertussami Gasolinp nuussualiaanit siullermit erinarsuutit qulit nutarterneqarsimapput kiisalu ”Langebro” nunani avannarlerneersunit arfinileriarluni nutarsarneqarsimavoq. Nipilersortartut ilaatigut Kalaallit Nunaanneersut, Danmarkimeersut, Sverigemeersut, Norgemeersut, ISlandimeersut Savalimmiuneersullu saqqummersitsinermi peqataapput.

- ’Langebro’-mik nammineq isumaga malillugu immiussinera tulluusimaarutigeqaara, Rasmus Lyberth tusagassiutitigut nalunaarummi oqarpoq.

Gasolinikkut nipilersuusiaat Kalaallit Nunaanni aamma sunniuteqangaarsimapput, tassain aamma allassimavoq. Nipilersoqatigiit erinarsuutaat peroriartornermini pissusissamisoortumik tusarnaartarsimallugit kinguaariillu ingerlaneranni tusarnaarneqartarsimasut Frederik Elsner oqaluttuarpoq.

Gasolin Kalaallit Nunaannut appisimaariarsimanngillat, nipilersoqatigiilli allatigut nunamut attaveqarsimapput. Franz Beckerleep ilaatigut Sumé Københavnimi immiusseqatiginikuuai, kingusinnerusukkullu Kim Larsen kisimiilluni tikeraarpoq.

Gasolinikkut aamma erinarsuut “Kap Farvel til Ümanarssuaq” 1974-imi saqqummersippaat, taannalu qaamasumik amillit Kalaallit Nunaanni pissusilersornerannut akerliulluni erinarsuutitut Politikenimit oqaatigineqarpoq.

Nipilersukkat bilitsillu tunineqarnerannit isertitat tamarmik Kofoed Skolemi Amagerimiittumi nipilersortarfimmut tunniunneqassapput. Saqqummersitsineq novembarip 21-ani ilassinninnikkut novembarillu 24-ani Frederiksbergimi tusarnaartitsinikkut malunnartinneqassaaq.