Inunnik apersuineq: Asasat peqatigalugit ulloq nalliussineqassamaartoq

Naasuerniarfiup "IQ Naasut"-p februaarip 14-iani Valentiinap Ulluata nalliussineqarnissaanut naasuerniarutissatik piareersaatigalugit ulluni makkunani ulapputigissagaat qularnanngilaq. 

Inuillu Valentiinap Ullua qanoq paasineraat, qanorlu pitsaanerpaamik atussagaluarunikku qanoq atorusussagaluarneraat kiisalu ullormut tassunga qanoq pilersaaruteqarnersut AG-ip paasiniarpaa.

Uiloq Kaspersen, 32-nik ukiulik.

Valentiinap Ullua ilinnut qanoq isumaqarpa?

- Asanninnerup ulluanik isumaqartippara.

Valentiinap Ullua pitsaanerpaamik atorusussagaluarukku qanoq atorusussagaluarpiuk?

- Ulloq asanninnermut atorusuttarpara, paniga arlaannik soqatigalugu immaqa aamma unnukkut neriartoqatigalugu illoqarfimmut.

Valentiinap Ullua  nalliuttorsiutiginissaanut qanoq pilersaaruteqarpit?

- Eqqarsarnikuuvunga paniga neriartoqatigissallugu, ulloq malunnartilaarlugu.

Angutinnguaq Heilmann, 50-inik ukiulik.

Valentiinap Ullua ilinnut qanoq isumaqarpa?

- Inuusunnerulluta maani tamakkua tusarsaavallaarnikuunngillat, taava kisianni ukiuni kingullerni arlalinngortuni tusarsaasalernikuuvoq, aamma nunatta avataaninngaanniit eqqussat ilagivaat. Soorunami periuseq taanna immaqa asannilerlaanut inuusuttunnguanut atussallugu aamma soqutiginartorujussuuvoq. Aamma inuppassuarnut iluaqutaasoq nuannaarutigisarpara.

Valentiinap Ullua pitsaanerpaamik atorusussagaluarukku qanoq atorusussagaluarpiuk?

- Neriniartarfiit arlaannut neriartoqatigissagaluarpara, soorlu assersuutigalugu nuliaralu, taava arlaannik tunilaarlugu arlaannilluunniit sunnguamik takutitassaqartilaarlugu.

Valentiinap Ullua nalliuttorsiutiginissaanut qanoq pilersaaruteqarpit?

- Annerusumik suli pilersaaruteqanngilanga tassunga tunngatillugu, piffissallu takutikkumaarpaa tassunga tungaanut qanoq pisoqarumaarnersoq. Massakkut pisorpassuit eqqarsaatigalugu susoqariaannaagamiluunniit, takujumaarparput.

Robert Coner, filipiinerineersoq, 37-nik ukiulik.

Valentiinap Ullua ilinnut qanoq isumaqarpa?

- Asasanut tunngatippara.

Valentiinap Ullua pitsaanerpaamik atorusussagaluarukku qanoq atorusussagaluarpiuk?

- Tunissuteqarneq, asasannut tupaallannartumik tunissuteqarneq, sumilluunniit perusutaanik tunniussaqarneq.

Valentiinap Ullua nalliuttorsiutiginissaanut qanoq pilersaaruteqarpit?

- Pilersaaruteqarpunga arlaannut neriartornissamik, tupaallannartumillu tunissuteqalaarnissamik.

Katja Bjørn, 28-nik ukiulik.

Valentiinap Ullua ilinnut qanoq isumaqarpa?

- Asanninnerup ullua, asanninnerup ulluatut isumaqartippara. Assigiinngitsunik isumaqarsinnaagami, aappariinnut asanninneq imaluunniit kammalaatinut ilaquttanulluunniit asanninnerup ullua, taamatut atortarpara.

Valentiinap Ullua pitsaanerpaamik atorusussagaluarukku qanoq atorusussagaluarpiuk?

- Asasakka imaluunniit asasama arlaat ilagalugu arlaannik sammisaqaqatigalugu, immaqa neriartorluta imaluunniit isiginnaariarluta.

Valentiinap Ullua nalliuttorsiutiginissaanut qanoq pilersaaruteqarpit?

- Uanga nammineq pilersaaruteqanngilanga, kisianni maani pisiniarfimmi (Inuit Quality Clothes of Greenland, aaqq.) pilersaarusiussaagut una sapaatip akunnera malunnartillugu arlaannik asanninnerup ulluanut atatillugu sammisaqarluta.

Piitannguaq Alaufesen, 52-inik ukiulik.

Valentiinap Ullua ilinnut qanoq isumaqarpa?

- Nuliaralu isumaqatigeereernikuuvugut soorlu asanninnerup ullui, uagutsinnut ullut tamaasa atuuttut. Taava imaanngilaq ulloq taannarpiaq tuninngikkukku imaluunniit tunisinngikkuma uagutsinnut, sooruna ulloq apeqquserneqassasoq, taamatut immitsinnut isumaqatigiinnikuuvugut. Ullut tamaasa taamaasiorsinnaavugut, taannatuaanngilaq periarfissaq. Kisianni una tulluarneruvoq immaqa aappaqanngikkaanni daterniakujulluni sakkussatsialaasimassooq.

Valentiinap Ullua pitsaanerpaamik atorusussagaluarukku qanoq atorusussagaluarpiuk?

- Valentiinap ullua taamatut atussagaluarukku, immaqa pitsaanerpaarpaamik romaqqaassagaluarpunga. Angalaarujoorluta immami maani, sukkasuuliaanngitsumik, kisianni initalimmik pujortuleeraasannguamik takornariaqqaalaariarluta, tikikkaanni neriartu, taava taassuma kingorna asarujuu, tassa iluarsimassooq.

Valentiinap Ullua nalliuttorsiutiginissaanut qanoq pilersaaruteqarpit?

- Imatut pilersaaruteqanngilanga, tassa taanna oqaatigereernertuut uagut taakku eqqoqqissaarlugit taamaaliortanngilagut imaluunniit qanoq imatut pingaartitsiginngilara tassa pinngitsoornanga qanoq iliuseqartariaqarlunga. Kisianni qamuuna nalunngittuaannarparput ullut tamaasa periarfissaralugu taanna. Soorlu oqareernertut immaqa nukappiaaguma imaluunniit nuliassarisimagaluarukku suli piumaasarnerullunga immaqa katinnissamut arlaannulluunniit atorumasimassagaluarpara, soorlu qanoq daterluta immaqa assigiinngitsunik misigisassarsiorluta.