UNNIA
Ivaana SPOT Festivalimi misigissutsinik qaffakaatitsisoq
Angalaartuulluni susassaaleqiffiusanngilaq. Københavnimi KNIFE-festivalimi tallimanngornermi maajip arfineq-pingajuanni tusarnaartitsissaaq, tamatumalu kingorna Iqalunni Alianait Arts Festivalimi tusarnaartitsissalluni.
Assi: Ole Holmgaard
Erinarsortartoq
Ivaana Kristiansen Olsen tusarnaartut qanoq qisuariarnissaat
ilisimaneq ajoramiuk, nipilersukkaminik nunatta avataani
tusarnaartitsinissaminut pissangajuaannarpoq.
Aarhusimili
SPOT Festivalertoqarnerani ilassilluarneqarnera ilimagisamit
pitsaaneruvoq.
Tusarnaariat nuannisarsimasut — inuit aalajangersimasumik
tusarnaarusullutik takkuttut, sanioqqullutik piaarinaatsoornerinnarmik alapernaalertut.
-
Tusarnaartitsinerup kingorna arnap qallunaap ornippaanga.
Killitsisimalluni oqaluttuuppaanga, oqaatsit paasinngikkaluarlugit
nipilersukkat tamaasa misigissutsimigut malugisinnaavai. Naliginnaasumik
nipilersortoqartillugu qianngisaannarluni oqarpoq, maannakkulli
tusarnaartitsinerup aallartinneraniilli qullini
noqissinnaasimanagit, Ivaana Kristiansen Olsen
oqaluttuarpoq.
Aarhusimi ukioq manna SPOT Festivalimi nipilersortartunut kalaallinut
arlalinnut qaaqqusaasunut ilaavoq.
Pitsaanerpaamik
tusarnaartitserusuttoq
Ivaana
SPOT Festivalimut kisimiilluni tusarnaartitsisussatut
qaaqquneqaraluarluni kisimiilluni appisimaanngilaq. Andachan Jaqqilu tusarnaartitsisussat ilagigaat paasigamiuk appisimaaqatiserai, taakkulu pingasuullutik ingerlaannaq suleqatigiillualerput.
-
Katillugit qulingiluat missaanniittut atorpagut.
Nipilersugassiakka nutaarluinnaat saqqummersinneqanngitsut aamma Jamaica EP-mit, Tunguusaq EP-mit
saqqummersitanillu allanit atuivunga. Tusarnaartitsineq
guitarerlunga kisimiillunga aallartippara, naggataatigullu Andachanilu
saqqummersinnikuusatsinnik erinarsuutinik tusarnaartitsilluta, Ivaana
Kristiansen Olsen oqaluttuarpoq.
Naak sungiusarnissaminnut piffissaalatsigaluarlutik, Ivaana, Andachan aamma Jaqqi SPOT Festivalimi tusarnaartitsinerat killitsinnarpoq.
Assi: Ole Holmgaard
Tusarnaartitsinissamut
piareersarneq oqimaaqatigiinnerusariaqartoq isertunngilaa.
Ulluinnarni suliffeqarpoq, nipilersornerlu saniatigooralugu,
taamaammallu piffissaqarpiarani. Pitsaasumilli tusarnaartitserusulluni sapinngisaminik anguniartuarpaa, naak Andachan Jaqqilu marluk pingasullu akornanni sungiusaqatigigaluarlugit.
-
Piareersarluarnerusinnaanera nassuerutigissuara. Nipilersorneq
saniatigooraara, ulluinnarnilu suliffiga ullaakkut
arfineq-pingasuniit sisamat tungaannut suliffiuvoq. Sapinngisara
tamaat pitsaasumik tusarnaartitsivunga, oqarpoq.
Festivalit
amerlanerusut
Ivaanap tusarnaartitsiartornera nukissamik tunisillunilu sapiissuseqarnerulersitsivoq.
SPOT-imi tusarnaartitsinini nuannersumillu qisuariarfigineqarnini ataqqinaatitut tiguai — ilaatigut nunanit
tamalaanit nersualaarneqarnerit — siuariarnerujussuartut isigalugit.
Ivaanap tusarnaariat pissusaat maluginiarpai: Nunani allani
inuit tusaamasaanngitsut tusarnaariarneqarluartarput,
neriuutigaalu Kalaallit Nunaanni nipilersortartut nutaat tapersersorumallugit aamma taamaattoqartalerumaartoq.
Ivaana
Kristiansen Olsen nipilersukkanik nutaanik saqqummersitsillunilu siunissami
tusarnaartitsisassaaq. Nutaamik immiussinissani ukiaru
pilersaarutigaa, aningaasanilli suliniummut atugassanik qinnuteqartoqaqqaassaaq.
-
Neriuppunga immiussinerit ukiaru aallartissinnaassasut.
Saqqummersitassamut tulliuttumut takorluukkakka suli annertunerusumik
oqaatigerusunngikkallarpakka, neriuppungali piviusunngorumaartut,
Ivaana Kristiansen Olsen naggasiivoq.
