Juulleriartornera iffiornermut atorneqartartoq

Tiiu Jens Dahl iffiullammassuuvoq. Iffiorneq - minnerunngitsumillu kaagit mamasaarlugit kusanartunngortinniarlugillu pinnersassallugit - nuannareqaa.

- Iffiortuaannarnikuuvunga - iffiornermullu najoqqutassiarpassuakka Qaqortumi meeraallunga anaanannit ilikkarpakka, Tiiu Jens Dahl oqaluttuarpoq.

Ukiorpassuarni umiartortuusimavoq – soorunamilu umiarsuup igaffiani sulisarluni. Ilaatigut Sarfaq Ittummi kitaata sineriaa sinerlugu angalasarnermini.

- Ilaasunut inuttanullu nerisassiortarpugut. Pingasunngornerit tamaasa inuttat katerisimaartittarpagut – tassanilu tamatigut boorluliortuaannarpunga. Boorlut qalarlaat kissalaartut. Iluatsilluarpoq – kikkullu tamarmik qilanaarisarpaat, umiartortartoq iffiornermik nuannarisaqartoq oqarpoq, taassumalu ukiut arfineq-pingasut matuma siorna Aalborgimut nuukkami iffiorneq ingerlatiinnarpaa.

Juullimut iffiugai piumaneqartartut

Maanittaaq iffiugai piumaneqarput - Aalborgimi Kalaallit Illuutaanni nerisarfimmi kaagiliorlunilu boorluliortarpoq.

Tassani kalaalerpassuit ullut tamangajaasa naapillutik nallukattaallutik, erinarsorlutillu nipilersortarput – aamma sisamanngornermi ualikkut nereqatigiittoqarnerani kaaginik sassaalliisoqartarpoq.

Sapaatit-akunneri marlussuit matuma siorna aalisakkat pujuukkat unnukkut nerisassiarineqartarput, tamannali sioqqullugu Tiiu igaffimmi boorlunik, romkuulinik kalaallillu kaagiannik iffiorlunilu sassaalliivoq.

- Juullingajalerpormi - juulleriartorneralu iffiornermut atorneqartarpoq, Tiiu nassuiaavoq, taannalu romkuuliliorami Else Josefine Sørensenimit, Sisimiuneersumit, ikiorneqarpoq.

- Anaanamali najoqqutassiaraa. Allanneqarnikuunngilaq, tassami eqqaamavara — tallimanillu ukioqarlunga romkuulilioqqaaramali eqqaamavara.

Kalaallit kaagiat

Aajuna Tiiu Jens Dahlip kalaallit kaagiannut najoqqutassiaa.

Akussat:

• Qapuaqqat poortaq ataaseq
• Sioraasat 100 g
• Manniit marluk
• 150 gram punneq
• Qajuusat 1 kiilu missaanniittut
• Taratsut alussaateeraq ataaseq
• Honning alussaatit marluk
• Kardemomme alussaateeqqap affaa
• 100 g paarnaaqqat
• Vanillesukker alussaatit marluk

Siullermik imerpalasut – manniit, punneq aatsitaq honningilu - akuliunneqassapput. Taava naqittakkap ilusilersorneqarsinnaalernissaata tungaanut sinneri akuliunneqassapput. Kingorna naqittagaq minutsini 2 x 20-ni pullasseriarlugu kissarsuutip qeqqanut ilillugu 200 gradimut minutsini 30-35-ni uunneqassaaq.