Juullimut 1991-imi allaaserisaq: Orpiliara siulleq savat nerivaat

Anaanaga 1926-imi inuuvoq, Atammimmilu meeraanermini juullisiortarsimalluni. Qatanngutinilu tallimat 23. December unnukkut innajaartinneqartarput, marlullu eqqaani itersarneqarlutik. Taamaalilluni nunaqarfeerannguami juullisiortarneq aallarnertarpoq.

- Niuertorutsimit 23-iani agguagarsisarpugut. Tamatta kissinik, sukkunik, kaffinik suaasat suaasarsuarnillu agguarneqartarpugut. Ilaqutariit tamarmik pisarput. Unnukkut innajaartinneqartarpugut, illunnguattali qanoq isikkoqarnissaa pissangaginermit sinissinnaanngingajattarluta.

- Aqaguani ullaaralaaq, ullaassakkut marluk eqqaani, kingusinnerpaamillu pingasunut itersarneqartarpugut, inersimasummi ullaassakkut sisamat eqqaani orpiliartarput, uagullu meeqqat tallimat missaani orpiliartinneqartarluta. Atuarfimmi orpiliartarpugut. Makitsilluta tunioraattussaasaratta ippassaammalli tunissutissagut majuutereertarpagut, tunisassatta atianik atsiorlugit.

- Utoqqartagut kakillarnanit orpilialiortarput. Kusanartaqaat. Ullumikkummi pisiassanilluunniit kusanarnerusoraakka. Naneruuteeralersorlugu, rosanik uummataasanillu utoqqartatta sanaavinik pinnersaasersoriaraangami kusanarluinnartarpoq. Qiortagassaqarpallaartanngimmat uagut meeqqat qiortaatinneqarneq ajorpugut. Ilernikkulli utoqqartatta atussanngisaat katersoriarlugit atuakkatsinni toqqortarisarpagut, taartigiiaassutigisarlugillu.

Iikkat aviisilersorlugit

- Orpiliareeraangatta tunioqqaatereerlutalu uagut meeqqat kaffisoriartoqqusisaqattaartarpugut. Tunissutisiarinerusarpagut naneruuteeqqat mamakujuttualunnguillu. Ullullu ingerlanerani nunaqqatitsinnut kaffisoriaqattaartarpugut.

- Uagutsinni utoqqartatsinnit tunissutisereertarpugut. Kisianni ullumikkutut tunissuterpassuusanngikkaluarput. Atorfissaqartitatsinnik tunissutisinersarpugut. Kamissatsinnik atisassatsinnilluunniit allanik. Ila kisianni nuannertassusia.

- Kaffisoriartoqqusisaqattaarluni nuannertaqaaq. Juullileraangammi illut iigaat tamarmik aviisilersorneqartarput. Aviisit Nuummiit pisarpagut. Aviisillu isiginnaarniangaaraangatsigit iserfigut tassaqaluunniit iluamik ilassisarpagut. Juullikkut nalaanni qallunaatut atuffattaqaagut, anaanaga illarluni oqarpoq, oqaasertaami paasinngivikkaluarlugit assiliartai alutorivittaramikkit.

- Illunnguit iserlugit alianaattaqaat. Naneruuteeralersorlutik, ulluinnarni atorneqarneq ajortunik. Aatsaammi juullikkunni naneruusersortarpugut, qaamanerillu kusanarluinnartarput.

- Ulloq tamaat kaffisoriartoqattaartarput, Unnukkullu immikkut ittunik nerisassaqartarpugut. Qaqorteqqasortortarpugut paarnalerlugit, ilaannilu eertarsuit amitsukujuut pilorsualerlugit, qajuusaleriarlugit sukkulerlugit. Allamimmi taama mamartigisoqarunanngilaq. Juullerujussuarmi annerusumik kalaaliminertortarpugut.

Nuummi juullisiortarnera

- Taamatut juullisiorluni nuannertaqaaq. 1951-imilu Nuummiilerama angerlarsertaqaanga. Taamanimiillimi maani inuuneq nunaqarfimmi inuunermit allaanerulereersimavoq. Soorlumi kiserliornerusorluunniit.

- Maani orpiliavimmik takornarpunga. Orpiliaqqaatinnguaralu sunaaffa aana savat nerissammassuk.

- Qalipaasorsuarmi Ivan-imi taamani kiffaavunga. Meerai ilagalugit juullimut orpiliassarsiniarpugut. Assut pissangavunga, sulimi orpiliavimmik takusimannginnama. Pisiarereerakku aamaarsuaasiviup qaanut ilivara. Sunaaffa unnuakkut anorlilersimariarmat nakkarsimasoq.

- Ullaakkullu uitsattunnguaqalerpoq. Eqqarsaatiginngilara uannut tunngasuusinnaanera. Illartupilussuullutik qaaqqummannga anillappunga. Orpiliassannguaq nunamut nakkarsimavoq. Kanaartaannanngorsimavoq, meqqutaasartannguillu sumut tamaanga siammarsimapput, aamakkulu savarpassuit. Taamaattoq takugaluarlugu qissasiinnarpunga. Nallinnaqimmammi illaatiginissaanut pissutissaqannginnama.

Ukiotoqaq

Ataguli Atammimmi ukiutoqqap tungaanut pisartut eqqaalaariarlakka.

- Juullip ukiutoqqallu akornanni eqqissisimaartaqaagut, kaffisoriartoqattaannguaq. Utoqqaat ulloqarput, inuusuttullumi aamma immikkut ulloqarlutik.

- Ukiutoqqami unnuaqeqqarluinnartoq igippallattoqartarpoq. Ataasiaannarluni igittoqartarpoq. Taamanimi ukiutoqaq seqqorlugu aallarnerneqartarpoq. Taava paasisarparput ukioq naagaluttualersoq. Ilaanni igeqqaanniuuttarpugut, igeqqaartormi niuertorutsikkunnit akissarsisarami.

- 31-iani unnuakkut unnuap qeqqata qeqqanut naalagiartarpugut. Taavalu unnuap qeqqariartoq seqqorpalussuaq kisimiulersarpoq. Taamanimi aallaasaannarnik eqqartaramik. Makku qummoroortartut allallu Nuummut nuunnerma kingunerujussua aatsaat takkuttalerput, anaanaga Asuba Eugenius taama oqaluttuarpoq.