Kalaallit Nunaanni Filminstitutimi pisortaq siulleq
Kalaallit Nunaanni Filminstitutip siulersuisuisa Inunnguaq Petrussen institutimi siullersaalluni aqutsisunngortussanngorlugu atorfinitsippaat.
Kalaallit Nunaanni Filminstitutimi Inunnguaq Petrussen pisortatut toqqarneqarpoq.
Assi: Naalakkersuisut
Inatsisartut 2024-mi ukiakkut ataatsimiinnermi filmliortarneq pillugu inatsit nutaaq akuersissutigaat, taamaalillunilu Kalaallit Nunaanni
Filminstituti pilersinneqarluni.
Instituttip pilersinneqarnissaa 2025-mi sulissutigineqarpoq, siulersuisoqalereerneratalu kingorna pisortamik maanna toqqaasoqarluni.
Inunnguaq
Petrussen decembarip aallaqqaa aallarnerfigalugu filminstitutimi
pisortanngussaaq. Politikkikkut
allaffissornikkullu suliat kiisalu Kalaallit Nunaanni kulturi pillugit ilisimasaqarluarnera tunngavigalugu siulersuisunit toqqarneqarpoq, Naalakkersuisut
tusagassiuutitigut nalunaarummi allapput.
Inunnguaq
Petrussen ukiorpassuarni Atassummi siunnersortaavoq, aamma
nipilersoqatigiinni Inummi erinarsortuulluni.
Filminstituttimi siulittaasoq Malik Kleist oqarnera naapertorlugu Inunnguaq Petrussen Kalaallit Nunaata
Filminstituttiani pisortatut siullertut ivertinnera siulersuisut nuannaarutigigaat.
-
Inunnguaq kulturimut tunngasunik
annertuunik piginnaasaqarpoq aaqqissuusaasumillu
sulisinnaassuseqarluni allaffissornikkullu suleriaatsinik
ilisimasaqarluarluni, piginnaasassallu pineqartut aallartisarnitsinni
atorfissaqarteqigatsigit atorluassavagut.
-
Filminstititutimik ingerlalluartumik siunissamullu
isiginnittumik kalaallit filmiliaannik kulturiannillu nunatsinni
nunanilu allani saqqummersitsisarnissatsinni siuttussatsinnik
siulersuisut suleqateqarnissartik qilanaaraat, Malik Kleist oqarpoq.
Inunnguaq
Petrussen atorfittaani pillugu ima oqarpoq:
-
Atorfimmut pissanganartumut nutaajusumullu aallartinnissara
qilanaareqaara. Filmiliortortatta periarfissaasa annertusarnissaat,
nunattalu qissiminneqarnera atorluarlugu filminstitutteqalernikkut
periarfissanik ujartueqataaffiginissai qilanaarivara.
