Koda Awards 2026: Innersuunneqartullu tassaapput...

Matu februaarip 20-ani nal. 19:00 ammassaaq, ukioq mannalu iserneq akeqassanani. Koda Awards Katuami Hans Lyngep Inersuani ingerlanneqartussanngorpoq, tassanilu inissat amerlanerpaamik 350-iupput. Inissat ulikkaareerpata matu matuneqassaaq – taamaattumik issiavimmik qulakkeerinnikkusukkuit takkutiaarnissat innersuussassaavoq.

Nersornaasiineq KNR-ikkut toqqaannartumik nalunaaqutaq 19:45 aallartittumik aallakaatinneqassaaq, nersornaasiinerlu nalunaaqutaq 20:00 aallartissalluni.

Tôrtia Reimer-Johansen ukioq manna unnummik aqutsisuussaaq.

Innersuunneqartut tassaapput:

• Ukiumut Nersornaat taalliortumut imaluunniit erinniortumut ukiumi nipilersukkamik pitsaanerpaamik saqqummersitsisimasumut tunniunneqartarpoq. Innersuunneqartullu tassaapput:

• Aleq - Inuunerma Hiningani - Nuuteeraq
• Tûtu - Qunneq - Nuuteeraq
• SIGU & Míké - Malungivara - Nuuteeraq
• Andachan & Ivaana - Andachan x Ivaana - Nuuteeraq
• Chemnitz - Misileraatit - Nuuteeraq

Isumalluarnartumu Nersornaat tassaavoq erinarsortartumut, taalliortumut nipilersortartumulluunniit nersornaasiunneqartartoq.

• Athena Lings - Dominant fly - EP
• Aleq - Inuunerma Hiningani - Nuuteeraq
• Mucaaka - Qaamaninnguara - EP
• Leillah - Unammilerpunga - Single
• Hansinnguaq - Aqagu - Nuuteeraq

Koda awards pillugu

Ukioq manna nersornaatinut innersuunneqartut naliliisussat tassaapput: Leillah Nora Olsen, Pauli Wille, Pipaluk Lynge Berthelsen, Jorsi Sørensen, Karl Enok Mathiassen aamma Nukannguaq Petersen.

Koda Awards Kodap kalaallit kulturiannut aningaasaliissutaanik aallaaveqarpoq. Kodap kulturimut aningaasaliissutai kalaallit nipilersuutaannut nipilersortartunullu tapersersorpaat. Koda Awardsimik, taamanikkut Kalaallit Nunaanni nersornaammik taaneqartartumik, Ole Kristiansen 1991-imi siullersaalluni nersornaaserneqarpoq. Koda Awards kalaallinik nipilersullaqqissunik saqqumilaartitsilluni taamanili ukiumoortumik ingerlanneqartalerpoq.

- Kalaallit Nunaanni nipilersornikkut ukioq nuannerluinnarpoq, Ukiumut Nersornaat Isumalluarnartumullu nersornaat ukioq manna tunniunneqassapput, toqqaanissaq uagutsinnut imaannaanngilaq. Innersuunneqartut assigiinngiiaarlutillu piviusorsiortuupput, siunissamullu isumalluarnarlutik. Tulluusimaarutigaarput tusaamasat nutaat sapiissuseqartullu nersorniarnissaat, Nukannguaq Petersen oqarpoq.