Nunaqarfimmi juulli: Qeqertarsuatsiaani juullimut qilanaarneq

Ataatsimuualaarneq, asanninneq pilluarnerlu. Illut mikisut ukiumi taartumi qaamanerisa nuannaarnermik tunisisarnerat. Meeqqat inersimasullu juullisiutinik sungiusartut nipaat . Utoqqaat kaffiliorusaarlutik illallattaarpalunnerat, ningiullu ulitaliai mamartut tipigissullu. Tassaapput juullip tipaatsunnartui.

Issileruttorfiani Qeqertarsuatsiaani juullip immikkuullarissusai tamakkuupput. Ataatsimuualaarneq, qanilaarneq toqqissisimanerlu.

- Nunaqarfinni juulli illoqarfinniit eqqissisimanarnerusutut ippoq, Unu Kirstine Berthelsen, Nuup Paamiullu akornanniittup qeqertap Qeqertarsuatsiat avannaatungaaniittumi, Qeqertarsuatsiaani peroriartoq oqaluttuarpoq.

37-nik ukioqarpoq, uinilu marluullutik nunaqarfimmi niuertarfeeraqarput.

- Juullikkunni kikkut tamarmik tipaatsuataartarput, nunaqarfimmiullu tamarmik katersuuttarmata suut tamarmik matoqqasarput. Ataatsimoornerit asanninnermik pilluarnermillu pilersitsigaangata eqqissineq nalliuttarpoq, taanna oqarpoq.

Unu Kirstine Berthelsen oktoberip aallartinneraniit juullisiutinik tussiaqattaarutinik sungiusarluni aallartittarpoq. Unu Qeqertarsuatsiaat nipaani qataannerni tussiartartuvoq, inuusuttuarannguullunili peqataasalernikuvoq. Juulli tussiaqattaarnertaqanngitsoq Unumut isumaqarpallaanngilaq.

Sapaassuit aallartileraangata piareersarneq aallartittarpoq, soorlu kaageeraliornerit allallu juullimut ulapputissat.

- Meeraagallarama nunaqarfimmiut ilaannut kiffaasarpugut. Illulerinermi assigiinngitsunik ikiuuttarpugut, ikiukkatsinniillu qujaffigineqarluta tunissutisingaatsiartarluta, Unu Kirstine Berthelsen oqaluttuarpoq.

Inersimasut qiortaaqatigiinnerat unnuap qeqqanullu kaffillerneq

Sarfaq Ittuk juullimut naggammik kujammukarluni Qeqertarsuatsiaat aqqusaaraangagu aqaguani pingasunngornermi nunaqarfimmi aqutsisut peqatigiiffinnik suleqateqarlutik inersimasunut juullerpalaartitsisarput.

- Juullerpalaarneq qiortaaqatigiinneq ataatsimoorlu assigiinngitsunik juullimut piareersaasarluta. Aamma tussiaqatigiittarpugut, aammalu atuffassisoqartarpoq juullisiutinik oqaluffimmi tigusanik, Unu Kirstine Berthelsen oqarpoq.

Qiortaallaqqinnerit pingasut eqqummiinnerpaamillu qiortaasoq unnuup ingerlanerani pissarsitinneqartarput.

Nunaqarfimmiut juullisiorngaartoqaraangat decembarip 23-ani unnuap qeqqaniit kaffillertarput.

- Inunngortoqarsimagaangat angajoqqaavisa juullisioqqaartoorlutik unnuap qeqqaniit kaffillerutigisarpaat. Nuan! Juulliaqqamut aqagukkaangat kikkut tamarmik nuannaarlutik ataatsimoortarput, oqaluttuarpoq.

Unu Kirstine Berthelsenip uia ernutartaarnikuummat ukioq manna taakku kaffillertussaapput. Kaffillernermi kalaaliminertuuteriarlutik mamartutoreersimallutik sinilaareeraangamik juulliaraq nalliutereertarpoq.

- Meeqqat juulliaqqami naalagiaqatigiinnerminni juullip evangilianiit atuaasarput. Meeraagallaramali taamaattoqartarpoq, Unu Kirstine Berthelsen oqarpoq.

- Meeraagallarama aamma unnukkorsiupallariarluta Qeqertarsuatsiaani illut silataanniit silatangiartarnikuunerat eqqaamavara, eqqaamasalersaarpoq.

Pisut annertunngitsut ilitsoqqussallu

Unu Kirstine Berthelsenip oqarneratut Qeqertarsuatsiaamiut maanna 180-it missaanniipput.

Nunaqarfimmiullu ataatsimuukulasaraluartut juullikkunni isumaqarnerulersarpoq. Allaannginnami inuit nuannaarnerulersartut, persuarsiornerullutik eqqissisimanerullutillu.

Pisut annertunngikkaluartut juullimut alianaaqutaanerusarput, nalliuttorsiornermilu ilitsoqqussat piuaannarlutik. Taakkuupput juullip tipaatsunnarneranik nassatallit qanilaarnerulersitsisartut.

- Assersuutigalugu decembarip 25-ani unnukkut nipaarsaartussaavugut. Meeraagallarama pinnguaqqusaanatalu nipituumik oqaloqqusaaneq ajornikuuvugut. Ileqqoq taanna meeqqannut ingerlateqqippara, oqarpoq.

Ilitsoqqussat – ilaqutariit juulliaqqami angutaata appanik siataanik nereqatigiittarnerisa saniatigut – katerngaanut decembarip 26-anngoraangat, tassa unnuap qeqqanut, silatangiaasarneq ilagaat. Ulloq ‘aappariit ulluannik’ taaneqartartoq.

- Katiffissiornerminni akunnaatsuliisut aamma silatangiartarpagut, aamma ajoqikkut niuertukkullu, Unu Kirstine Berthelsen oqarpoq.

Nissiaqqat siaartartullu

Ukioq manna aamma allaanerujunnanngilaq. Juullerpalaartoqarujussuassaaq Unulu angerlarsimaffimminni nissiaqqanik siaartartunillu pisatsersuleruni annikinaarsinavianngilaq.

- Ataatattulli ippunga. Angerlarsimaffitsik pisatsersorujussuartarpaa, juullerpalaarnerulersitsisarlunilu, Unu Kirstine Berthelsen oqarpoq.

Juulli qallivoq. Meeqqat pisarnermittut juulliaqqami itiaassapput, apuserissallutik, nerisassat naamallugit, juullerpaluttunik erinarsoqataallutik nuannersunilu pisuni ataatsimuussallutik – pisartut kinguaariinnik ataatsimoorfiullutillu Qeqertarsuatsiiani juullikkunni immikkuullarissititsillutillu alianaarsaarfiusartut. Juullimi Pilluaritsi!