Nuuk Snow Festip ukioq manna sammisassaq nalunaarutigaa
Maanna Nuuk Snow Fest 2026-mut nuannarineqaqisumut nalunaarfissaq ammaanneqarpoq, tassanilu holdit 18-t aputip 3x3x3 meterip eqqumiitsulianngortinnissaannut pilersitsisinnaassutsiminnik suliaqarsinnaanissamut inissaqarput.
Ulloq allaaqqissoq Nuumilu umiarsualivimmi apummit eqqumiitsuliat, ukiut siuliini Snow Festimit.
Arkivfoto: Leiff Josefsen
Ukiumoortumik ukiuunerani unammisitsisarneq ukioq manna sisamanngornermit marsip
tallimaanit sapaammi marsip arfineq pingajuata tungaanut ingerlanneqassaaq,
ukioq mannalu Issittoq allanngoriartortoq qulequtarineqassaaq.
- Marsimi unammisitsinermi kiinnat ilisarnartut nutaallu takunissaat
qilanaarisupilussuuarput. Kikkut tamarmik unamminissamut ilaanissamut
nalunaarsinnaanermut tikilluaqqusaapput, tassanilu apummi eqqumiitsuliat piviusumit
assilisat eqqumiitsuliallu, ukioq manna qulequtarineqartumut attuumasut
sananeqarsinnaapput, Nuuk Snow Festimi suliniummi ingerlatsisut Lars Kruuse
Jørgen Springilu tusagassiuutinut nalunaarummi allapput.
UKIOQ MANNA SAMMISAQ - ISSITTOQ ALLANNGORIARTORTOQ
Issittumi pissutsit allanngorsimanerat malugisinnaavarput.
Sikuniaataarnerusalerpoq. Sila allanngorarnerusalerpoq. Uumasut nuuttarput tammarlutilluunniit, tamannalu piniarnitsinnut, aalisarnitsinnut inuunitsinnullu sunniuteqarpoq.
Naleqqussartarnerput sungiusimavarput — taamaaliortuarnikuuvugut. Maannali suna tamarmi sukkanerusumik allanngoriartulerpoq. Ilisimasagut ilaat naammattuussaarpagut.
Misigissutsit eqqumiitsuliornermi saqqummersinneqarsinnaapput. Allannguutillu takutinniarneqarsinnaapput.
Issittoq najugaqarfigaarput. Oqaluttuassagullu pingaaruteqarput.
Najoqqutaq: snow.gl
Peqataanissamut inuussutissarsiutigalugu eqqumiitsuliortuunissaq
pisariaqanngitsoq, taakku ilisimatitsipput.
Suliaq ilungersunartoq
- Isumassarsiatsialaqarnerit taassumalu apummit
eqqumiitsulianngortinnissaanut ilungersorlutik sulinissamut piumassuseqarnerit
pingaarnerpaavoq. Holdissatit piareeqqappat, holdiliornissalluunniit soqutigiviuk,
suliniummi ingerlatsisut aperipput, nittartakkakkullu qupperneq www.snow.gl annertunerusumik paasisaqarfiusinnaasoq nalunaarfiusinnaasorlu
innersuussutigalugu. Unamminerpiami peqataanissaq kissaatiginngikkaanni ataatsimoortuni nammineq
piumassutsikkut suleqataasoqarsinnaavoq. Unamminissaq sioqqullugu, nalaani
kingornalu assaat pisariaqartinneqarput, nammineerlunilu nalunaaquttap
akunnerini qanoq amerlatigisuni peqataasinnaaneq toqqarneqarsinnaasoq,
ilisimatitsissutigineqarpoq.
Unammineq kikkunnut
tamanut
- Nuuk Snow Fest illoqarfiup innuttaanut tamanut ammavoq, aaqqissuisutullu
illoqarfiup tamakkerlugu peqataatinnissaa kissaatigaarput. Piffimmi
ingerlatsisut suliffeqarfiillu unamminerup suli pikkunarnerulersinnissaanut
suleqataanissamut ilaseraagut, aaqqissuisut nalunaarput.
Grønlandsbanken Air Greenlandilu ukioq manna pingaarnertut
aningaasaliisuupput.
